Hatutan.com, (10 Setembru 2022), Díli—Vise-Primeiru Ministru Vatikanu, Sua Eminênsia Arsebispu Edgar Peña Parra sei halo vizita mai Timor-Leste hodi inaugura sede Santa-Sé ka Nunsiatura iha Díli ne’ebé lokaliza iha Igreja Motael nia sorin.

Arkedioseze Metropolitana Díli fó-sai ona anunsiu ofisiál ba sarani sira liuliu ba Padre, Pároku, Relizioju, Relijioza sira iha Díli katak, Arsebispu Edgar Peña Parra, hanesan Substitutu Sekretária Estadu Santa Sé ninia estadia iha TL hahú iha loron 19 to’o 22 Setembru.

Lee Mós: Xanana ho Kardeál Dom Virgílio Hahú Ko’alia Papa Nia Vizita Mai TL

“lha vizita ida-ne’e sei inaugura Sede Santa Sé ka Nunsiatura iha Díli iha Igreja Motael nia sorin iha dia 20 Setembru 2022,” Hatutan.com sita komunikadu.

Sei iha Missa hamutuk ne’ebé sei prezide hosi Arsebispu Edgar Peña Parra, iha Sé Katedrál, Vila Verde, Díli, iha Kinta 22 Setembru 2022, horas 17:00 loro kraik.

Arkedioseze Metropolitana Díli husu atu Pároku sira no Padre sira atu imprime no fó-sai informasaun ida ne’e iha Parókia sira no kapela sira hotu iha Díli laran, fó-sai mós iha eskola sira públika no privada.

“Husu Padres, Relijiozu, Relijioza, sarani sira, seminaristas, formandus konsagradu, grupu kategoriais sira, estudante sira atu partisipa ho máxima iha Missa ida-ne’e,” subliña.

Husu kolaborasaun hosi ema hotu-hotu nian durante realizasaun atividade ida-ne’e nune’e bele la’o ho di’ak.

Jornalista: VitoSalvadór