Hatutan.com, (09 Setembru 2022), Díli- Lider Karizmátiku, Kay Rala Xanana Gusmão, Sesta (09/09/2022), to’o hikas fali Timor-Leste hafoin liu semana ida hala’o vizita bá Itália ho Indonézia.

Lee Mós : Dom Virgílio Kardeál do Carmo husu GAM ho GAR Haburas Virtude Domin

Lider Karizmátiku, Kay Rala Xanana Gusmão. Foto/Elio dos Santos da Costa

To’o iha Aeroportu Internasionál Prezidente Repúblika, Nicolau Lobato, ho aviaun komersiál Citilink, Xanana   husu atu joven sira labele lakon espíritu sidadania hodi tau iha neon, dever boot atu sai sidadaun di’ak hodi kontribui bá garante pás no estabilidade iha sosiedade nia lete.

Xanana Gusmão, nu’udár reprezentante Espesiál no Estraordináriu Prezidente Repúblika  nian bá hasoru Papa Francisco iha Vatikanu no asiste mós serimónia investidura Sua Eminénsia Virgílio Kardeál do Carmo da Silva, SDB nian iha Bazílika Santu Pedro, Roma,   ne’e sente triste haree joven sira lakon tiha Espiritu sidadania  ho idade ne’ebé aumenta bá beibeik hanesan foin-sa’e tenke tau bá iha ulun dever boot ida atu sai sidadaun di’ak bá rai ida ne’e.

Advertisement

Jerasaun tuan sira lakon hotu ona, iha tinan 23 hahu husi 1999 mai too ohin loron katus-ferik no sira barak mate la’ós ho riku, mate ho terus nafatin mas ho kontente entrega hela rai ida ne’e bá sira nia oan sira tamba ne’e dunik bainhira foin-sa’e sira lakon tiha Espiritu sidadania sente katak rai ne’e loron ruma bainhira joven sira boot hotu ona iha rai ida ne’e lahatene ona eduka oan sira tamba imi nia ezemplu fó no hatudu daudauk fahe-malu, baku-malu, tuda-malu to’o oho-malu.

“Ha’u husu bá joven sira labele haluhan katak imi nia aman karik, imi nia tiun karik imi nia avó sira karik, terus tebtebes, mate inimigu oho, mate hamlaha, terus hamlaha, terus kastigu, hotu-hotu atu hetan ukun aan ida ne’e hodi entrega bá imi,” Xanana Gusmão hateten.

Apelu nafatin no husu bá joven sira atu sente katak timoroan hotu-hotu iha dever no obrigasaun boot ida nu’udár sidadaun ne’ebé di’ak, hatene respeita malu no buka atu hahú husi sira nia uma laran rasik too iha viziñu no komunidade nia let hamosu no kria armonia hodi garante pás no estabilidade.

Xanana hateten, ohin loron labarik sira lakon deit tempu ho google no Facebook, favor ida akompaña oituan mundu bá, hodi haree katak mundu la’ós di’ak liu, iha dunik funu no terus, maibé rai Timor nia naran iha mundu sira foti as tamba maske foin tinan 20 ukun na, maibé halo no fó ona kontribuisaun ki’ik ruma bá mundu ida ne’e.

“Foin-sa’e sira hadomi malu bá, fó liman bá malu, kria armonia ho dame iha Timor-Leste hahú hosi uma laran sai bá li’ur too iha bairu no komunidade atu ema hotu bele fiar katak hamutuk lori rai ida ne’e bá di’ak hodi ikus fali mai bele iha konfiansa boot atu husik hela rai ne’e bá jerasaun foun sira nia liman,”  Xanana tenik.

Advertisement

Lider Karizmátiku ne’e hatutan bá arte-marsiál sira tenke hanorin mós foin-sa’e sira atu sai ema diak, favor boot ida tur hamutuk ba hodi hanoin hikas atu fo kontribuiasaun ba rai ne’e

Ba lider sira arte-marsiál no arte rituál sira, Xanana dehan, imi iha responsabilidade boot liu bá sosiedade no ba rai ida ne’e, atu hanorin imi nia labarik sira ne’ebé tama iha imi nia grupu atu labele uza buat ida ne’e hodi haterus fali ema seluk no foin-sa’e sira soe tiha hahalok aat sira hodi adkiri fali hanoin foun no sai sidadaun di’ak.

Jornalista: Vito Salvadór

Advertisement