Hatutan.com, (12 Setembru 2022), Díli- Prezidente Repúblika (PR), José Ramos-Horta, hateten Governu Austrália lataka dalan atu kadoras greater sunrise dada  mai Timor-Leste.

Lee Mós :  Horta Konsidera Prosesamentu Gáz Natural Nu’udár Asuntu Kompleksu

PR José Ramos-Horta to’o hikas fali Timor-Leste, Segunda (12/09/2022). Foto/Elio dos Santos da Costa

Ramos-Horta tenik kadoras greater sunrise mai Timor-Leste depende bá Wodside no empreza sira ne’ebé iha joint venture mak sei halo diálogu ho parte Timor-Leste ne’ebé iha maioria investimentu atu hetan solusaun ida.

Xefe Estadu José Ramos-Horta, Segunda (12/09/2022), bainhira fila hosi nia vizita bá Austrália hateten  Timor-Leste hakarak iha solusaun ida iha tempu badak no Austrália mós hakarak atu iha solusaun ida,

“Semana sira mai ne’e bele haree dezenvolvimentu foun ruma kona-bá implementasaun projetu greater sunrise,” Ramos-Horta konfirma.

 Governu Austrália rasik hateten e setór Wodside joint venture sira mak investidór no sira mak sei bele halo diálogu parte Timor-Leste ne’ebé agora iha maioria investimentu atu hetan solusaun ida.

“Ha’u nia misaun bá Austrália, la’ós atu buka solusaun ho Austrália kona-bá kestaun greater sunrise, la’ós ha’u mak negosiadór, maibé ko’alia bá ida ne’e, ha’u nia intervensaun públiku ne’e koñesidu, la’ós novidade, kontinua defende dada kadoras greater sunrise mai Timor-Leste,” José Ramos-Horta hateten.

Austrália rasik hateten hodi defende katak Timor-Leste halo ona estudu lubuk ida kona-bá viabilidade téknika, viabilidade komersial finanseira kona-bá opsaun greater sunrise mai Timor-Leste no Wodside hanesan empreza nunka halo ida ne’e tamba iha interese no Wodside prefere liubá Darwin kompara mai Timor-Leste.

Estudu sira ne’ebé Timor-Leste halo hatudu uainhira kadoras  greater sunrise dada mai Timor-Leste iha liu viabilidade tékniku, ekonomiku no komersiál ne’ebé di’ak tamba ne’e tenke la’o bá oin iha tempu badak.

“Greater sunrise tenke la’o ba oin no dada mai Timor-Leste tamba ne’e ita-nia interese nasionál, bayu undang maran daudaun ona, ita tenke garante bá futuru rai ida ne’e nian, projetu ida  boot no bele hatama billaun dollar mai ita-nia ekonomia bá futuru,” Horta dehan.

Durante vizita Estadu iha Austrália alem ko’alia makas kona-bá greater sunrise , Ramos-Horta husu mós ba governadór Austrália, oinsá atu apoiu Timor-Leste iha área edukasaun no formasaun profisionál bá joven sira.

Jornalista: Vito Salvadór