Hatutan.com, (12 Setembru 2022), Díli—Polísia Nasionál Timor-Leste (PNTL), Komandu Munisípiu Díli, liuhosi pasa revista konsege halo apreensaun ba motór ho karreta 142 iha kapitál Díli, tanba viola Lei Kódigu Estrada.

Polísia Nasionál Timor-Leste (PNTL), Komandu Munisípiu Díli, liuhosi pasa revista konsege halo apreensaun ba motór ho karreta 142 iha kapitál Díli, tanba viola Lei Kódigu Estrada, Domingu (11/09/2022).

Evidénsia sira ne’ebé PNTL liuhosi unidade Polísia Tránzitu preende ne’e, durante atividade operasaun kuaze iha semana nia laran, hahú hosi loron 01 to’o 12 Setembru 2022.

Lee Mós: PNTL Detein Sidadaun Na’in-rua ‘Sadik-Malu’ Iha Média Sosiál

“Parte tránzitu hala’o pasa revista hahú hosi dia 01 to’o mai iha horisehik, hamutuk dala-haat no ita hetan evidénsia motór de’it 129 no restu ne’e karreta. Karreta sira ne’e, maioria mikrolete ne’ebé la uza farda ka uniforme bainhira hala’o operasaun,” Komandante PNTL Munisípiu Díli, Superintendente Xefe Polísia, Henrique da Costa hateten iha kna’ar fatin Caicoli, Segunda (12/09/2022).

Alende preende evidénsia hirak ne’e, PNTL preende mós dokumentu stransporte nian hosi motorista ka infratór sira hamutuk 59 no billete ka tikete preende ne’ebé fó-sai hamutuk 93. Hosi operasaun refere, kontribui osan hamutuk $5.395.

“Oras-ne’e mak infratór sira selu ona ba iha kofre Estadu ninian. Depois, sira ne’ebé mak seidauk selu hamutuk $963.  Ita nafatin ezije ba sira, nune’e bainhira selu tenke aprezenta ninia invoice ka resibu ne’e mai iha parte tránzitu, hodi bele foti sira nia motór no karreta,” Komandante Henrique hateten.

La’ós ne’e de’it, durante iha semana ida nia laran, PNTL rejista mós asidente tráfegu ne’ebé mak akontese iha área sira jurisdisaun Díli nian hamutuk 19. Hosi númeru asidente hirak ne’e rezulta ema ida mate no haat kanek grave.

PNTL liuhsoi unidade Tránzitu sei kontinua halo operasaun, la’ós halo de’it pasa revista maibé komandu orienta membru sira nune’e halo movimentu ho karreta no motór. Bainhira hetan hanesan ema balun ne’ebé mak viola lei kódigu estrada ninian, iha Dekretu Lei númeru 06/2003, membru PNTL sira ne’e sei foti kedan medida.

“Bainhira ita halo pasa revísta ne’e, balun mak tama no balun la tama. Entaun, sira hakarak fó orientasaun ba sira, nune’e sira halo movimentu ne’e, sai ba iha dalan públiku sira, hodi implementa orientasaun ne’ebé maka ita fó sai,” nia hateten.

Polísia Nasionál Timor-Leste (PNTL), Komandu Munisípiu Díli, liuhosi pasa revista konsege halo apreensaun ba motór ho karreta 142 iha kapitál Díli, tanba viola Lei Kódigu Estrada, Domingu (11/09/2022).

Hahú hosi loron 04 to’o 11 fulan-setembru 2022, parte Investigasaun Kriminál Munisipiu Díli, rejísta kazu insidente hamutuk ualu ne’ebé mak agora daudaun parte investigasaun sira halo hela prosesu ba iha kazu sira ne’ebé mak akontese iha munisipiu Díli no kazu balun liuhosi keixa.

Kona-bá operasaun konjunta ne’ebé oras-ne’e forsa rua liuhosi FALINTIL Forsa Defeza (F-FDTL) ho PNTL halo, ninia alvu maka ema kriminozu sira, ka liu-liu ema hirak ne’ebé mak sempre kria perturbasaun, ka kria problema iha kapitál nasaun.

Operasaun konjunta ne’e rasik, hala’o ho modelu la’o-ain, nomós ho karreta, hodi esplika ba komunidade ka iha inan-aman sira ne’ebé maka hanesan negosiante, husu ba sira nune’e labele fó situasaun ne’ebé mak foin daudaun liuba kotuk ne’e halo sira tauk, hodi la fa’an sira nia sasán.

Jornalista: Rogério Pereira Cárceres