Hatutan.com, (13 Setembru 2022), Díli– Komisaun B Parlamentu Nasionál bá Asuntu Defeza ho Seguransa, hein hela rezultadu investigasaun bá kazu matebian José Bernardo ne’ebé mate ho tali iha sela detensaun Polísia Nasionál Timor-Leste (PNTL) Munisípiu Díli, Segunda, 01 fulan-Setembru 2022.

Lee Mós : Xefe Estadu Sei Buka Hatene Investigasaun Kona-bá Padre Abito ho José Bernardo Nia Mate

Matebian José Bernardo. Foto/Ilustrasaun

“Ida ne’e ha’u ko’alia kleur tiha ona katak, presiza relatóriu ida hosi investigasaun kriminál. Komandu PNTL atu ami bele iha pozisaun di’ak, hodi ko’alia bá públiku. Sé lae, ami mós hanesan azneira barak, ko’alia situasaun sira ne’ebé dala-ruma ami kondena ami nia aan rasik ka kondena instituisaun seguransa ninian,” Prezidente Komisaun B, José Agostinho Sequeira ‘Somotxo’ hateten  bá Hatutan.com iha PN, Tersa (13/09/2022).

Antigu Ministru Interiór ne’e hateten, Komandu PNTL liuhosi unidade Servisu Investigasaun Kriminál Nasionál (SIKN) seidauk submete rezultadu ruma kona-bá kazu José Bernardo nia mate iha sela detensaun PNTL Munisípiu tanba dala-ruma sira mós hatene katak Parlamentu Nasionál sei iha períodu resesu (ferias) nia laran.

Advertisement

“Sira PNTL mós hatene katak, PN sei iha resesu. Tanba ida ne’e mak relatóriu sira la to’o iha ne’e, normalmente situasaun hanesan ne’e, relatóriu sira sempre to’o ona iha ami nia meza leten. Ida ne’e komplikadu tebes. Maibé, to’o agora, relatóriu ami seidauk simu,” Somotxo haktuir tan.

Liga ho kazu ne’e, Somotxo haktuir, situasaun kuaze la’o tiha ona, Governu rasik mós hasai ona medida ne’ebé barak, liuhosi Operasaun Konjunta entre forsa instituisaun rua, PNTL ho F-FDTL. Nune’e, nia fiar katak, ho medida ne’ebé Governu hasai, bele solusiona problema sira ne’ebé mosu, iha ne’ebé konsidera sai hanesan preokupasaun ida bá sosiedade no bá governante tomak.

Somotxo  mós fiar katak, prosesu investigasaun tomak bá kazu ne’e, sei la’o ho transparénsia, tanba kazu ne’e responsabiliza hosi Servisu Investigasaun Kriminál Nasional (SIKN), Policia Ciêntífica e de Investigação Criminal (PCIC)  no akompaña ka monitoriza hosi Provedória dos Direitos Humanos e Justiça (PDHJ), inklui Ministériu Públiku (MP).

Hosi sorin seluk, Diretór Ezekutivu Fundasaun Mahein (FM), Abel Amaral, seidauk bele fó opiniaun  ruma kona-bá kazu ne’e tanba prosesu kazu ne’e sei iha investigasaun laran no konsidera sei segredu justisa.

Hatán kona-bá membru PNTL na’in-ualu (8), ne’ebé oras ne’e Komandu PNTL deside fó ona suspensaun, Abel Amaral dehan, desizaun bá ida ne’e, foti  tuir lei sira iha regulamentu dixiplinár PNTL nian.

Advertisement

“Sansaun suspensaun ne’e, labele to’o de’it iha ne’e, maibé, tenke kontinua loke mós ho investigasaun kriminál, atu nune’e, ita bele hatene katak, sansaun dixiplinár ne’e, la’o iha internal instituisaun. Maibé, investigasaun kriminál ne’e, atu hatene katak, oinsá, sira-nia envolvimentu ne’e iha ka lae, tenke loke mós investigasaun kriminál, hasoru membru PNTL na’in-ualu (8) ne’e, para atu hatene, sira envolve ka lae, nune’e públiku bele fiar bá iha instituisaun seguransa,” Abel Amaral hateten.

Jornalista: Rogério Pereira Cárceres

Advertisement