Hatutan.com, (14 Setembru 2022), Díli—Prezidente Repúblika (PR), José Ramos-Horta promete sei buka atu reforsa servisu Judicial System Monitoring Program (JSMP) hodi sai instituisaun independente nune’e apoia halo monitorizasaun ba servisu judisiál iha Timor-Leste (TL).

Diretora Ezekutiva JSMP, Ana Paula Marçal simu Prezidente Repúblika, José Ramos-Horta ho tara tais iha edifisiu JSMP Kolmera, Kuarta (14/09/2022). Foto/JSMP.

Xefe Estadu hato’o promesa ne’e hafoin hala’o vizita ba edifísiu JSMP Kolmera, Díli, no haree katak JSMP servisu di’ak durante tinan hirak nia laran ho rekursu ne’ebé la barak, instituisaun ida ne’ebé laiha meius finanseiru ho fatin ne’ebé simples tebes.

Lee Mós: JSMP Husu Ema Hotu Servisu Maka’as Redús Violénsia Bazeia Bá Jéneru

“Ha’u sei tau-matan atu reforsa servisu JSMP nian, nune’e sira bele tau-matan ba indepedénsia podér judisiál nian iha Timor-Leste. Bainhira podér judisiál politizadu, ita lakon hotu.  Nune’e mós bainhira polísia no forsa armada sai politizadu ita lakon hotu,” Ramos-Horta hateten iha edifisiu JSMP Kolmera, Kuarta (14/09/2022).

Advertisement

Maski foin primeiravéz Xefe Estadu mai vizita JSMP, maibé iha tinan lubuk nia laran Horta akompaña, koñese servisu ne’ebé JSMP halo importante, nu’udár monitorianente ba sistema justisa ne’ebé iha fatin barak vítima no akuzadu sira iha.

Iha fatin hanesan Diretora Ezekutiva JSMP, Ana Paula Marçal konsidera vizita Prezidente Repúblika nu’udár onra boot no momentu istóriku ida  hanesan organizasaun sosiedade sivíl ne’ebé durante ne’e tau-matan no halo advokasia ba serbisu no funsionamentu setór justisa no lejislativu nian.

“Prezidente Repúblika mai to’o iha ne’e atu bele haree, rona no diskute hamutuk kona-bá serbisu no kontribuisaun JSMP ba iha setór justisa no lejislativu. Alende ne’e bele esplora posibilidade atu serbisu hamutuk ho Gabinete Prezidénsia Repúblika nian hodi kontribui ho di’ak liu ka másimu ba hadi’ak no promove serbisu no funsionamentu seitór justisa no lejizlativu,” Ana Paula Marçal hateten.

Prezidente Repúblika nu’udár advogadu eminente Estadu nian, liuhosi enkontru no diskusaun ne’e bele haforsa liután JSMP ninia papél iha advokasia ba hadi’ak no promove serbisu no funsionamentu setór justisa no lejislativu hodi bele asegura justisa ida ne’ebé asesível no justu ba ema hotu-hotu ne’ebé buka justisa.

JSMP hato’o observasaun jerál ba Xefe Estadu kona-bá seitór justisa no lejizlativu, aprezenta mós ba Prezidente Repúblika kona-bá situasaun alarmante no preokupante sosiedade Timor-Leste nian relasiona ho kazu violénsia bazeia ba jéneru, liuliu violénsia hasoru feto no labarik feto sira.

Advertisement

JSMP aprezenta situasaun ne’e bazeia dadus estatístika monitorizasaun JSMP nian ba iha tribunál sira iha Timor-Leste no mós dadus estatístika hosi asisténsia legál ne’ebé JSMP fornese ba vítima feto no labarik sira, hahú hosi meadu 2020 to’o ohin loron.

Situasaun ne’e presiza atensaun másimu hosi parte relevante no interesadu sira, inklui Gabinete Prezidénsia Repúblika rasik.

JSMP mós aprezenta kona-bá problema no dezafiu sira ne’ebé instituisaun hasoru durante hala’o nia programa sira.

Parte rua konkorda atu halo hamutuk semináriu nasional ida kona-bá efetividade funsionamentu setór justisa iha futuru.

Aproveita oportunidade ne’e, JSMP entrega relatóriu anuál setór justisa no lejislativu 2021 no entrega mós lembransa JSMP nian ba iha Prezidente Repúblika.

Advertisement

Vizita ofisiál ne’e mai hosi inisiativa Prezidente Repúblika, hafoin JSMP halo audiénsia iha fulan hirak liubá hodi diskute kle’an kona-bá oinsa atu promove di’ak liután dezenvolvimentu serbisu sira iha seitór justisa no lejislativu nian, inklui asuntu sira ne’ebé ligadu ho kazu violénsia bazeia ba jéneru iha Timor-Leste.

Jornalista: Vito Salvadór