Hatutan.com, (16 Setembru 2022), Díli—Dadur lubun ne’ebé kumpre hela sira nia sentensa pena iha Prizaun Becora, Díli hamutuk ho Guarda Prizaun sira, Sesta (16/09/2022), hakfodak  tanba derrepente de’it hai suar-maka’as no lakan iha bloku ida iha Prizaun Becora nia laran.

Lee Mós : MJ Promete Rezolve Difikuldade Carro Célula iha Prizaun sira

Ahi han bloku ida iha Prizaun Becora, Sesta (16/09/2022). Foto/Elio dos Santos da Costa

Ahi ho maka’as  no lalais de’it han mutuk tiha sasán balun, hanesan televizaun no nesesidade balun iha bloku ne’e nia laran, inklui ahi han to’o plafond laran hodi rezulta uma kakaluk balun ahi han tiha.

Ahi foin bele mate bainhira korpu Bombeiru  ho rapidamente halo esforsu no rega mate-ahi ne’ebé lakon ho suar maka’as sai hosi bloku refere.  Maibé sasán balun la aproveita ka labele salva tanba ahi han mutuk didi’ak.

Informasaun ne’ebé Hatutan.com rekolla iha fatin akontesimentu katak deskonfia forte dadur ida ho inisiál FA maka baku sasán rahun to’o rasta televizaun no fiu sira iha bloku ne’e nia laran hodi provoka sirkúitu eletrisidade no rezulta ahi han  bloku ne’e.  

Tuir informasaun hosi Guarda Prizaun balun katak dadur ho inisiál FA ne’e iha kondisaun moras mental ka defisiénsia mental. Dadur ne’e, maka uluk sunu antigu merkadu Comoro loron 19 fulan-Dezembru 2019.

Dadur ho inisiál FA ne’e derrepente de’it hamriik baku rahun televizaun no rasta fiu sira ne’e hodi halo eletrisidade sirkúitu maka hamosu ahi han bloku ne’e.  

Dadur ne’e haree ahi han daudaun, nia foti ahi baluk ne’ebé lakan hela hodi lori bá sunu tan kolizaun iha bloku laran no rezulta ahi lakan maka’as liután.

Bloku ida ne’ebé ahi han ne’e hanesan fatin te’in foun ne’ebé kakuluk ida de’it ho fatin ka sela bá dadur foun sira. Hatutan.com tenta ona atu konfirma ho Diretór Estabelesimentu Prizaun Becora, João Domingos, maibé seidauk bele ko’alia buat ruma tanba sei okupadu hela ho situasaun ne’e no organiza hela forsa traballu sira iha Prizaun Becora, inklui organiza dadur sira atu salva uluk sasán sira ne’ebé merese ho mós sei halo levantamentu bá motivu loloos insidente ne’e.

Jornalista : Rogério Cárceres