Hatutan.com, (19 Setembru 2022), Díli– Maske Ministériu Justisa liuhosi orientasaun Ministru Justisa (MJ) Tiago Amaral Sarmento, bá Diresaun Jerál Terras no Propriedade (DNTP) hodi hasai notifikasaun bá parte relevante sira hapara atividade iha rai disputa ne’ebé lokaliza iha klínika 333 nia oin iha Tasi-ibun Markoni, Díli, maibé ema balun hamutuk ho empreza internasionál kontinua halo atividade hodi la interese bá notifikasaun Estadu nian ne’e.

Lee Mós : MJ Orienta GIA Halo Investigasaun Urjente bá Rai Estadu iha Markoni

Maske Governu hasai ona karta notifikasaun atu hapara atividade iha rai disputa iha Markoni, Dili, maibé parte seluk konintua halo atividade hodi taka ona kaleng hale’u rai refere. Foto/Elio dos Santos da Costa

Iha Sábadu (17/09/2022), parte sira ne’ebé reklama dehan rai ne’e sira nian privadu hamutuk ho empreza internasionál balun ne’ebé ikus mai deskobre hosi nasaun Xina, kontinua orienta traballadór sira hodi monta kalén hale’u hodi taka tiha rai disputa ne’e atu iha tempu badak bele hala’o atividade konstrusaun.

Despeza Administrativu Estadu nian liuhosi orientasaun MJ bá DNTP ne’e haruka hapara atividade bá propriedade Estadu nian ne’e hodi fó koñesimentu mós bá Xefe Suku Fatuhada, Macelino Soares. Infelizmente,  karta notifikasaun ne’e hanesan la vale iha parte sira seluk, liuliu hirak ne’ebé halo atividade iha rai refere nia laran.

Iha Sesta (16/09/2022), Xefe Suku Marcelino Soares, simu ona karta ne’e no buka ona tempu bá hasoru Ministru Justisa (MJ), Tiago Amaral Sarmento, atu bele hola medida hodi monta plaka avizu iha rai disputa ne’e atu ema la bele halo lai atividade. Infelizmente, Esforsu Xefe Suku nian ne’e seidauk hetan resposta tanba Ministru Justisa okupadu no la konsege hasoru malu.

“Karta  ne’e lori mai ona ha’u iha loron 16 fulan-Setembru  ne’e no ha’u simu ona no konteúdu atu hapara konstrusaun ne’ebé komunidade halo iha terrenu. Ha’u la’ós halo intervensaun kona-bá rai-ne’e tanba laiha karta mandatu ruma mai ha’u hanesan autoridade komunitáriu,” Marcelino Soares hateten bá Hatutan.com.

Karta notifikasaun hosi Governu.

Iha loron ne’e kedas Xefe Suku ne’e tun duni bá iha terrenu tanba traballadór sira serbísu hela iha ne’ebá no komunidade mós bá atu sobu lutu nee, ne’e mak autoridade komunitáriu ne’e mosu bá atu hateten bá sira katak, ne’e la loos.

“Tuir loloos ne’e parte Ministériu Justisa  tenke mai ona lori karta despezu administrativu iha ne’e no tenke lori ai-kabelak ida ka plaka ida ho avizu no tau iha ne’e katak, bandu ona labele halo konstrusaun no harii lutu iha ne’e, nune’e ema bele haree katak rai-ne’e tama ona iha rai konflitu no laiha ema ida mak intervein ka halo konstrusuan,”  Xefe Suku Mercelino Soares hateten.

Nia dehan, bainhira Ministru Justisa mai halo de’it intervensaun verbál ho ko’alia de’it ne’e mós labele tanba legalidade laiha.

“Kestaun ne’e mós ha’u halo ona audiénsia ho Ministru Justisa  atu bele lori duni ai-kabelak ida mai harii iha ne’ebá. Tanba Governu de’it mak iha direitu atu halo impedimentu,” nia haktuir.

Xefe Suku ne’e mós esforsu hela atu oinsa maka parte sira bele hetan solusaun bá disputa ne’e, nune’e maka loron rua tutuir malu Sesta-Sábadu (16-17/09/2022), nia prezensa iha iha lokál rai disputa tanba atu neutraliza ema sira ne’ebé serbísu iha ne’ebá ho komunidade sira ne’ebé hakarak bá sobu sasan ne’e hodi ko’alia ho sira oinsa mak bele rezolve ho ulun malirin tuir dalan legál. Katak, se mak iha dokumentus bele aprezenta.

Iha loron 16 fulan-Setembru nee, Xefe Suku mós simu telefone hosi Advogadu privadu Pedro Aparicio no konsege hasoru-malu ona ho nia, konkorda malu atu hapara atividade ne’e, maibé iha loron 17 fulan-Setembru dadeer, komunidade sira telefone fali Xefe Suku katak, ema kontinua halo nafatin lutu.

“Nune’e ha’u tun tán dala ida bá iha fatin hodi ko’alia ho tarballadór sira atu labele kontinua halo serbísu hodi hein advogadu ne’e mai atu bá hasoru Ministru Justisa hodi ko’alia oinsa mak rezolve tiha ho na’in bá rai ne’e mak foin bele halo serbísu. Se la’e, traballadór sira ne’ebé la hatene buat ida ne’e tanba de’it osan no sira bá servisu, ikus mai ema baku fali sira,” nia esklarese.

Hanesan autoridade komunitáriu nia fó hatene ona bá tarballadór sira labele kontinua serbísu no tenke para ona, maibé hanesan autoridade sei kontinua akompaña nafatin atu labele mosu problema entre komunidade.

Advogadu privadu Pedro Aparicio ne’ebé Hatutan.com tenta konfirma via telefone, maibé seidauk bele fó klarifikasaun ruma tanba sei okupadu ho serbisu seluk.

Ministériu  Justisa rasik tuir informasaun katak iha loron ida ka rua ne’e nia laran sei iha solusaun bá disputa rai ida-ne’e.  

Jornalista : Elio dos Santos da Costa