Hatutan.com, (17 Setembru 2022), Díli—Prezidente Liga Futeból Timor Leste (LFTL), Nilton Gusmão, submete ona nia karta pedidu rezignasaun hosi pozisaun prezidente LFTL bá Asembleia Jerál Liga Futeból Timor Leste.

Lee Mós : Liga Futeból Timorense Presiza Tán Fundu $416,516

Prezidente LFTL, Nilton Gusmão. Foto/Desportivo

Karta ne’ebé Nilton Gusmão hasai iha loron 15 fulan-Setembru ne’e, dirije diretamente bá Prezidente Asembleia Jerál LFTL, Miguel Manitelo no koñesimentu (Cc) bá mós Sekretáriu Estadu Juventude no Desportu (SEJD), Abrão Saldanha ho Prezidente Federasaun Futeból Timor Leste (FFTL), Francisco Martins da Costa Pereira  Jerónimo.

Prezidente Asembleia Jerál LFTL, Miguel Manitelo ne’ebé Hatutan.com konfirma hateten katak, iha loron 16 fulan-Setembru 2022, nia simu duni karta pedidu rezignasaun Prezidente LFTL, Nilton Gusmão nian ne’e no nia hola inisiativa kontaktu kedas Sekretariadu LFTL hodi prepara hela Estatutu LFTL nian.

“Ha’u simu karta pedidu rezignasaun  prezidente LFTL, Nilton Gusmão nian ne’e, ha’u presiza hare Estatutu Orgánika LFTL nian hodi bele haree oinsá atu responde ba asuntu ida ne’e,”  antigu Sekretáriu Estadu Juventude no Desportu  (SEJD) ne’e haktuir tan.

Miguel Manitelo hateten, iha posibilidade bele iha Assembleia Jerál Estraordináriu hodi foti desizaun bá asuntu ida-ne’e tanba Diresaun Ezekutivu  LFTL eleitu iha Assembleia Jerál.

Nilton Gusmão ne’ebé Hatutan.com konfirma ko’alia badak de’it hodi dehan, nia rezignasaun hosi kargu prezidente LFTL atu bele salva futeból iha Timor-Leste.

Hosi sorin seluk, informasaun ne’ebé Hatutan.com  rekolla hosi fontes oioin iha klube sira primeira divizaun ho segundu divizaun, inklui fontes sira iha LFTL rasik hateten katak posivel  rezignasaun prezidente LFTL, Nilton Gusmão nian ne’e iha relasaun forte iha Liga Futeból Timorense Époka 2022-2023.

Liga Futeból Timorense Époka 2022-2023 ne’e to’o ohin loron seidauk bele realiza tanba fundu ne’ebé aloka hosi Governu liuhosi SEJD ho montante $200,000, fundu hosi FFTL mós $200,000, inklui LFTL rasik prepara $131,530 la sufisiente atu bele organiza  Liga Futeból Timorense Époka 2022-2023.

Prezidente Asembleia Jerál LFTL, Miguel Manitelo. Foto/Binistimor

Iha enkontru entre LFTL ho FFTL iha loron 12 fulan-Setembru 2022, parte rua (LFTL ho FFTL) mós rekoñese katak fundu ho montante $531.53 la sufisiente no tenke presiza  tan fundu $416,516 atu bele kompleta to’o $948,046 hodi organiza Liga Futeból Timorense Époka 2022-2023.

Infelizmente, iha enkontru entre FFTL ho SEJD, iha loron 14 fulan-Setembru ne’e, Sekretáriu Estadu Abrão Saldanha, deklara mantein ho apoiu hosi SEJD ho montante $200,000 no sei la aumenta tán. Nune’e mós Prezidente FFTL, Francisco Jerónimo deklara mantein ho montante osan FFTL nian $200,000 bá Liga Futeból Timorense ne’e.

“Desizaun SEJD ho FFTL nian ne’e hodi mantein ho osan hosi parte rua ho montante $400,000 ne’e ho intensaun atu “kebra” ka hafraku Liga atu bele dudu fali ema seluk. Tan ne’e, talvés Prezidente LFTL, Nilton Gusmão  toma inisiativa hodi rezigna an atu salva futeból,” fontes seluk hosi klube sira primeira divizaun ho segundu divizaun nian hateten hodi halo predisaun de’it.

Tuir kalkulasaun finanseiru bá Liga Futeból Timorense Époka 2022-2023 ne’e sei presiza tan fundu $416,516 atu bele kompleta to’o $948,046 bá finansia nesesidade tomak Liga nian.

Nilton Gusmão re-eleitu nu’udár prezidente LFA ne’ebé transforma bá LFTL  iha loron 15 fulan-Agostu 2020 bá períodu 2020-2023 ho votu afavór 32, kontra zero (0) no abstensaun mós zero (0).

Klube futeból primeira divizaun hamutuk 10 mak hanesan AD SLB Laulara, AS Ponta Leste, Karketu Dili FC, Assalam FC, Emmanuel FC, Aitana FC, Lalenok United FC, Atletico Ultramar, Academica FC, ho FC Porto Taibessi.

Klube segundu divizaun hamutuk sia (9), mak hanesan Nagardjo FC, Kablaki FC, DIT FC, Lica-Lica FC, Lemorai FC, AS Marca, FIEL FC, Zebra FC ho Boavista FC Timor.

Jornalista : Vito Salvadór