Hatutan.com, (19 Setembru 2022), Díli—Enkontru Asembleia Jerál Liga Futeból Timor Leste (LFTL) adia hikas bá Kinta (22/09/2022), atu diskute kle’an kona-bá pedidu rezignasaun Prezidente LFTL, Nilton Gusmão nian.  

Lee Mós : Nilton Gusmão Submete Pedidu Rezignasaun Bá Asembleia Jerál LFTL

Prezidente Asembleia Jerál LFTL, Miguel Manitelo. Foto/Binistimor

Tuir ajenda no komunikasaun entre Prezidente Asembleia Jerál LFTL, Miguel Manitelo  ho dirijente ezekutivu LFTL nian katak Segunda (19/09/2022), atu iha enkontru hodi bele haree karta pedidu rezignasaun Nilton Gusmão nian hosi prezidente LFTL ne’ebé submete bá Prezidente Asembleia Jerál LFTL iha loron 16 fulan-Setembru 2022.

“Loos. Enkontru ne’e adia fali bá Kinta (22/09/2022),” prezidente Asembleia Jerál LFTL, Miguel Manitelo hateten hodi responde Hatutan.com.

Hosi sorin seluk, prezidente Federasaun Futeból Timor Leste (FFTL), Francisco Pereira da Costa Martins Jerónimo hateten, maske prezidente LFTL, Nilton Gusmão rezigna-an ona, maibé futeból tenke la’o bá oin.

Hafoin hasoru malu ho Primeiru-Ministru (PM), Taur Matan Ruak, iha rezidénsia Estadu Primeiru-Ministru nian iha Farol, Díli, Prezidente FFTL nu’udár mós Ministru asuntu Parlamentár no Komunikasaun Sosiál (MAPKOMS), Francisco Jerónimo, klarifika katak, futeból tenke la’o bá oin ho modelu saida de’it. Katak ema se deit mak rezigna-an hosi nia kargu ka nia funsaun la iha problema. Importante bola tenke la’o bá oin.

Prezidente FFTL, Francisco Jerónimo rekoñese katak nia simu ona karta rezignasaun prezidente LFTL, Nilton Gusmão nian hanesan koñesimentu no nia haree katak konteúdu karta rezignasaun ne’e ho razaun tanba Nilton nia atividade serbísu barak liu no ladún iha tempu atu bele atende enkontru sira ho di’ak intermu atividade LFTL nian.

Kona-bá Liga Futeból Timorense ne’ebé tuir kompromisu prezidente FFTL nian atu realiza iha fulan-Agostu ne’e to’o agora seidauk, Francisco Jerónimo argumenta katak asuntu ne’e kontinua iha komunikasaun hela, maibé liga la’ós FFTL mak organiza, maibé órgaun liga mak sei organiza.

“FFTL ho Governu liuhosi Sekretária Estadu Juventude no Desportu (SEJD) hanesan patrosinadór de’it, tanba ne’e mak FFTL prepara osan $200,000 no SEJD mós prepara $200,000 bá apoiu Liga Futeból Timorense,” Francisco Jerónimo tenik.

Hosi sorin seluk, Nilton Gusmão ne’ebé Hatutan.com konfirma hateten katak, nia la hatene enkontru ne’e atu halo ohin no atu adia fali bá Kinta (22/09/2022), tanba nia la mete ona desizaun LFTL nian.

“Lahatene. Mas ha’u rezigna ona, ha’u la mete ona desizaun ne’ebé sira halo,” Nilton Gusmão tenik.

Jornalista : Vito Salvadór