Hatutan.com, (19 Setembru 2022), Díli—Ministru Justisa (MJ), Tiago Amaral Sarmento orienta ona dirijentes iha estabelesimentu prizionál Becora hodi haketak prezu sira ne’ebé ho moras mentál.

Ahi han bloku ida iha Prizaun Becora, Sesta (16/09/2022). Foto/Elio dos Santos da Costa

Tiago Amaral Sarmento fó-sai orientasaun ne’e tanba deskonfia inséndiu ka ahi hán bloku ida iha prizaun Becora iha semana kotuk, deskonfia prezu ida ho kondisaun moras mentál mak sunu.

Lee Mós: Deskonfia, Dadur Sunu Bloku Ida iha Prizaun Becora

“Ministru Justisa hateten katak, sorti bee nia sunu de’it, mais se ne’e mak nia komete fali aktu seluk hanesan halakon ema ruma nia vida, ida-ne’e aat liu tán. Nune’e Ministru Justisa husu atu muda ketak prezu hirak ne’ebé iha moras mentál,” Hatutan.com sita komunikadu.

Kona-bá kestaun ne’e Ministru rasik konvoka ona reuniaun ho Dirijentes sira Ministériu Justisa nian hodi deskuti kle’an kona-bá akontesimentu iha establesimentu Prizionál Becora atu bele buka rezolva iha tempu badak hamutuk ho dirijente sira prizaun Becora nian.

Líde máismu iha Ministériu Justisa ne’e mós husu  ba Diretór Nasionál  Servisu Prizionais no Diretór Estabelesimentu Prizionál Becora hodi bele submete relatóriu sobre  inséndiu iha  Estabelesimentu Prizionál Becora mai Ministru Justisa, nune’e haree hodi buka solusaun lalais.

Jornalista: Elio dos Santos da Costa