Hatutan.com, (19 Setembru 2022), Díli—Iha Tempu badak Ministériu Justisa (MJ) sei halo avariguasaun ba Rai disputa iha área Marconi tanba konsidera fatin ne’e nu’udár Terrenu Estadu.

Ministru Justisa, Tiago Amaral Sarmento Konvoka ona reuniaun ho Dirijente sira Ministériu nian hodi deskuti kona-bá Disputa rai iha aldeia 04 Marconi, iha Segunda (19/09/2022). Foto/MJ.

Ministru Justisa, Tiago Amaral Sarmento Konvoka ona reuniaun ho Dirijente sira Ministériu nian hodi deskuti kona-bá kestaun ne’e, iha Segunda (19/09/2022).

Lee Mós:Xefe Suku Fatuhada Husu Governu Monta Plaka Avizu iha Rai Disputa Markoni

“Ko’alia kona-bá Problema disputa rai iha klínika 333 nia oin iha Marconi. Ministru Justisa husu ba Diretor Jerál Terras e Propriedades no Diresaun Nasionál Assesoria Juridika atu bele finaliza lalais despaixu ida, nune’e  iha  tempu badak  Ministériu Justisa ho parte kompetetente tun kedan hodi halo avariguasaun ba fatin refere,” Hatutan.com sita komunikadu.

MJ hakarak halo indeminizasaun tanba Kompañia la kumpri notifikasaun ne’ebé Diretór Jerál  Diresaun Terras e Propriedades hasai ona, hodi hamamuk fatin refere no labele kontinua halo konstrusaun iha fatin refere.

“Tanba  Ministru Justisa konsidera fatin refere nu’udár Terrenu Estadu nian ne’eb’e durante ne’e halo hela arrendamentu ho arrendatáriu balun, hahú kedan hosi Juñu 2017 to’o  Maiu 2022,” subliña.

Infelizmente, kontratu arrendamnetu refere tama mós iha kompañia 85 ne’ebé la kumpri sira nia devér hodi selu kontratu arrendamnetu nune’e sira mós iha dívidas kuaze $36.000-resin. 

Aleinde ne’e, Ministru Justisa mós sei hatama partisipasaun ba  arrendatáriu hirak ne’ebé la kumpri devér, inklui  terrenu ne’ebé sai polémika daudaun iha Marconi ne’e.

Ministru Justisa mós husu ba Diresaun Jerrál Terras e Propriedades nomós Diresaun Jerál Rejistu Notariadu atu bele halo preparasaun ba atribuisaun sertifikadu titlu na’in ba rai, iha selebrasaun loron Proklamasaun Independénsia 28 Novembru, iha Rejiaun Administrativa Espesiál Oecusse-Ambeno (RAEOA).

Iha parte loraik Ministru Justisa Tiago Amaral Sarmento kontinua simu no reuniaun ho komunidade no Rede ba Rai, ne’ebé preokupa ho terrenu iha Marconi ne’ebé utiliza hosi kompañia internasionál balun, ne’ebé tuir Ministru Justisa katak rai refere partense ba rai Estadu nian no prosesu konstrusaun  iha terrenu refere mós seim autorizasaun hosi Ministru Justisa no Ministériu Obras Publikas tanba konsidera rai refere serve ba haríi espasu públiku.

Hatutan.com sita komunikadu hosi paret Rede ba Rai katak, Rede ba Rai sei nafatin hamutuk ho Komunidade atu akompaña Ministru Justisa iha prosesu tomak ba investigasaun Kazu Rai Marconi.

“Prosesu tomak Ita entrega ba Estadu nu’udár na’in ba propriedade ne’e hodi foti medida rigorozu ba individu Sira ne’ebé fa’an Rai Estadu hodi buka lukru.

Rede ba Rai husu Públiku hodi matan Moris neon na’in atu hamutuk sobu Mafia da Terra iha Timor-Leste no Kazu Marconi ne’e nu’udár Kazu ezemplu ba Kazu Sira seluk.

Lee Mós:MJ Orienta GIA Halo Investigasaun Urjente bá Rai Estadu iha Markoni

Jornalista: Elio dos Santos da Costa