Hatutan.com, (08 Outubru 2022), Díli-Dadaun ne’e públiku Timor “sokadu”  ho vídeo dezentendimentu entre Ajente Polísia Gastão Piedade hosi Servisu Nasional Intelijénsia (SNI) ho membru Governu na’in rua hosi partidu KHUNTO; Vise-Ministru Interiór, António Armindo no Vise-Ministru Justisa José Edmundo Caetano ho mós Konselleiru Másimu partidu KHUNTO, José dos Santos “Naimori Bucar”.

Ajente Polísia Gastão Piedade simu hela telefone hosi PM Taur Matan Ruak. Foto/Repro

Iha vídeo ne’ebé ema-ui’an iha mundu virtuál fahe no halo komentáriu oioin iha Facebook ne’e hatudu, Konselleiru Másimu Partidu KHUNTO, José dos Santos “Naimori” hamutuk ho nia dirijente hois partidu KHUNTO nian na’in-rua ne’ebé asume kargu hanesan Vise-Ministru Interior ho Vise-Ministru Justisa, atu ba husu tuir no husu fali osan ho montante $130.000 ne’ebé autoridade sira halo apreensaun iha Aeroportu Internasionál Prezidente Nicolau Lobato, Díli, Tersa, 04 fulan-Outubru 2022.

Ikus mai deskobre ema na’in-tolu (3) lori osan ne’e nu’udar militante partidu KHUNTO no osan ho valor $130.000 ne’e partidu KHUNTO nian atu lori bá Indonézia liu hosi Aeroportu Internasionál Prezidente Nicolau Lobato, ho intensaun atu bá komparas nesesidade partidu nian.

Vídeo ne’ebe viral daudaun iha sosiál media (SosMed) ne’e hatudu  dezentimentu ne’e akontese tanba deskonfia iha intensaun uza podér atu halo intervensaun bá servisu investigasaun bá kazu apreensaun osan $130.000.

Ajente Polísia Gastão Piedade ho lian-maka’as hatudu nia “espertu” hodi esplika Lei Kódigu Penal  artigu 313 kona-bá Brankeamentu bá Kapital.

Ho emosaun uitoan, Ajente Polísia Gastão Piedade mós soe-lia hodi husu atu la bele iha intervensaun bá prosesu investigasaun ne’e. Nia mós hakilar Vise-Ministru Justisa, José Edmundo Caetano hodi dehan, “Ita-boot sé? Mai halo intervensaun bá servisu investigadór sira-nian. Imi nia prezensa iha ne’e hanesan mai halo intervensaun.”

Iha hela diskusaun laran, iha mós vídeo ne’e hatudu, José dos Santos “Naimori Bucar”, hanesan Konselleiru Másimu partidu KHUNTO no na’in bá osan $130.000 foti telefone hodi liga bá ema balun ne’ebé ikus mai deskobre katak ema ne’ebé Bou Naimori telefone ne’e Primeiru-Ministru (PM), Taur Matan Ruak.

Vise-MI, António Armindo akompaña Konselleiru Másimu Partidu KHUNTO, José dos Santos “Naimori Bucar” iha edifisiu SNI. Foto/Repro

Bainhira Bou Naimori, ko’alia hela ho PM Taur Matan Ruak iha telefone ne’e,  nia (Naimori-red) entrega kedas bá Ajente Polísia, Gastão Piedade. Nune’e, Gastão kontinua esplika natureza lei iha kódigu penal artigu 313 kona-bá Bankeamnetu bá Kapital.

“Exelénsia, hakarak ka lakohi tenke iha prosesu investigasaun. Se iha prosesu investigasaun ne’e mak la iha indikasaun bá krime,  osan ne’e tenke fó fila bá nia na’in. Ha’u presiza orientasaun hosi Sua-Exelénsia tanba ida-ne’e servisu tékniku liu,” Gastão Piedade lia-tun hodi ko’alia  ho emboot iha telefone ne’ebé deskonfia ema-ne’e Primeiru-Ministru Taur Matan Ruak. 

Liu tiha nee, Gastão entrega fali telefone bá José dos Santos “Naimori Bucar” hodi kontinua ko’alia no Naimori ko’alia ho ema ne’e bolu dehan, “Apa!” ka lai-fuan seluk dehan aman.

Vise-MJ Kestiona Tansá Liberta Ema Na’in-tolu Lori Osan  

Bá jornalista sira iha Parlamentu Nasional, Kuarta (05/10/2022), Vise-Ministru Justisa, José Edmundo Caetano nu’udár mós kuadru partidu KHUNTO nian ne’e hateten, osan ho montante $130.000 ne’e osan partidu KHUNTO nian no la’ós ema pesoál ka indivíduu ida nian.

Vise-Ministru Justisa ne’e afirma katak autoridade sira halo apreensaun osan ne’e tanba fallansu administrativu tanba tuir Lei katak ema ida atu lori osan fíziku  sai liu $10.000 tenke  halo deklarasaun.

Vise-Ministru Justisa ne’e mós duvida ho kapasidade kuadru sira partidu KHUNTO nian tanba  la komprende lei no la buka konsulta hodi obriga lori sai osan fíziku $130.000 ne’ebé bele iha risku tanba viola lei. 

Kona-bá viola Kódigu Penal artigu 313 kona-bá  Bankeamentu bá Kapital, Vise-Ministru Justisa, José Edmundo Caetano afirma,  se kazu ne’e viola lei Bankeamentu Kapital, nusa mak autoridade sira la halo detensaun bá ema na’in-tolu ne’ebé lori osan ne’e. Maibé prende mak osan de’it, mas ema sira ne’ebé lori osan ne’e kontinua hala’o viajen bá Indonézia. 

“Sé krime, nusa mak ema na’in-tolu lori osan ne’e husik tiha fali no prende mak osan de’it. Ema na’in-tolu ne’e kontinua halo sira-nia viajen bá Indonézia,” José Edmundo Caetano kestiona.

Nia hateten, osan $130.000 ne’ebé partidu KHUNTO fó bá nia membru na’in-tolu atu lori sai bá Indonézia ne’e atu bá kompras nesesidade partidu KHUNTO nian.

Ekipa Jornalista Hatutan.com