Hatutan.com (19 Outubru 2022), Díli-Konsellu Ministru (KM) tau ona iha ajenda atu halo diskusaun bá “redús” remunerasaun kargu xefia sira iha Institutu Públiku (I.P) ho Empreza Públika (E.P).  

Lee Mós : Remunerasaun $6.500 Kada Fulan, Prezidente EDTL, E.P: “Husu Bá Ida-Ne’ebé Fó Servisu Ha’u”

Ministru Prezidénsia Konsellu Ministru (MPCM, sigla portugés), Fidelis Manuel Leite Magalhães. Foto/Elio dos Santos da Costa

Ministru Prezidénsia Konsellu Ministru (MPCM, sigla portugés), Fidelis Manuel Leite Magalhães,  informa katak, iha Kuarta, 26 Outubru 2022, Konsellu Ministru halo diskusaun bá “redús” montante remunerasaun bá kargu xefia sira iha ajente administrasaun indireta I.P ho E.P tanba la refleta bá rezultadu dezempeñu servisu ne’ebé sira halo.

Tuir loloos, iha semana ne’e nia laran, Governu hahú ona ajenda, atu halo diskusaun bá asuntu ne’e, maibé tanba sei hein lista ka dadus hosi Ministériu Finansas (MF), kona-bá totál institutu públiku no empreza públika hirak  mak eziste, inklui tabela remunerasaun iha kada instituisaun indireta hirak ne’e.

“Ida ne’e, asuntu ida  tenta para atu ajendamentu semana ida ne’e, maibé, ami sei hein hela lista sira ne’ebé mak seidauk finaliza hosi finansas no ministériu sira seluk, entaun, talvés, semana oin, foin re-ajenda fila-fali bá asuntu ida ne’e,”  Fidelis Magalhães, hateten bá jornalista sira hafoin reuniaun ordináriu Konsellu Ministru iha Palásiu Governu, Kuarta (19/10/2022).

Molok ne’e, iha Kuarta (21/09/2022), Ministru Fidelis Magalhães hateten vontade no kompromisu sira Governu nian atu redusaun bá montante remunerasaun kargu xefia iha I.P ho E.P sira ne’e, tanba mosu preokupasaun maka’as hosi públiku, ne’ebé ezije mós katak, Governu presiza duni halo redusaun. Maibé, desizaun ida ne’e, tenke liuhosi diskusaun iha Konsellu Ministru.

Lei númeru 07/2007, kona-bá Titulár bá Órgaun Soberanu sira, iha artigu 10, esplika kona-bá vensimentu no regalia sira seluk (remunerasaun). Konteúdu hosi lei ne’e, bandu órgaun ka titulár sira Estadu nia saláriu boot liu fali Prezidente Repúblika nia saláriu ka remunerasaun.

Atualmente  prezidente ka kargu xefia sira hosi Empreza Públiku ho Institutu Publika simu saláriu boot liu Primeiru-Ministru no Prezidente Repúblika. Ezemplu, Prezidente Eletrisidade Timor Leste Empreza Públiku (EDTL,E.P) nia saláriu ka remunerasaun kada fulan $6.500. Nune’e mós ho Prezidente Bee Timor-Leste (BTL,E.P) nia remunerasaun kada fulan $6000.

Lee Mós : Konsellu Ministru Diskute Hela Redús Remunerasaun Kargu Xefia Sira iha I.P ho E.P

Jornalista: Rogério Pereira Cárceres