Hatutan.com, (20 Outubru 2022), Díli-Komandu Jerál Polísia Nasionál Timor-Leste (PNTL) sei la demite Ajente Xefe Gastão Piedade no posivel sei promove tan.

Lee Mós : Vise-Ministru Justisa “Haruka Duni” Karta Bá PM, Vise-MI ho Komandu PNTL Ezonera Gastão Peidade

Komandante Jerál PNTL, Komisáriu Polísia Faustino da Costa. Foto/Elio dos Santos da Costa

Komandante Jerál PNTL, Komisáriu Faustino da Costa,  hateten nia parte simu duni karta hosi Vise-Ministru Justisa (V-MJ), José Edmundo Caetano, kona-bá atu demite Ajente  Xefe Gastão Piedade, maibé konteúdu karta ne’e la’ós dirije direta bá Komandu PNTL Polísia, maibé dirije bá Primeiru-Ministru nu’udár Ministru Interior.  

“Ne’ebé, ekipa konjuntu boot ida mak halo servisu. Agora, sé kuandu, keixa ne’e mak mai ha’u karik, ha’u loke prosesu. Ha’u loke prosesu rua de’it, iha violasaun, mak fó nia konsekuénsia tuir violasaun. Kuandu laiha, promosaun ha’u halo bá nia (Gastão Piedade-red),” Komisáriu Faustino da Costa  hateten bá jornalista sira iha Igreja Katedrál Díli, Kinta (20/10/2022).

Komisariu Polísia Faustino da Costa hatutan, Primeiru-Ministru (PM), Taur Matan Ruak, mak iha liu kompeténsia atu foti desizaun hodi deside entre demite ka mantein membru Polísia Nasionál Timor-Leste (PNTL), Ajente Xefe Gastão Piedade, hosi kna’ar Investigadór Xefe iha Servisu Nasionál Intelijénsia (SNI).

Razaun Vise-MJ, José Edmundo Caetano, halo karta demisaun bá komandu PNTL hodi  husu atu demite tiha Ajente Xefe Polísia Gastão Piedade, tanba konsidera Investigadór Xefe SNI ne’e ko’alia hasoru membru governu ida, maibé ‘la ho étika’.

Lamentasaun Vise-MJ nian ne’e, uainhira hetan orden hosi konselleiru másimu partidu Kmanek Haburas Unidade Nasionál Timoroan (KHUNTO), hodi bá to’o kedan iha Autoridade Nasionál Aviasaun Timor-Leste (ANATL) nia fatin iha Aeroportu Comoro, ho hanoin ida oinsá mak bele foti fila osan ho montante  $130,000.

Osan hosi partidu KHUNTO nian ne’e la konsege foti fila, to’o mosu tán diskusaun ne’ebé manas uitoan entre Vise-MJ, José Edmundo Caetano ho SNI nian Investigadór Xefe, Gastão Piedade, iha ANATL nia fatin. Ho insatisfasaun ida ne’e maka, José Edmundo ne’ebé ho ninia kualidade nu’udár governante ida bá pozisaun Vise-MJ ne’e husu bá komandu atu halo demisaun.  

“Ein-prinsípiu, karta hothotu tama, ha’u seidauk haree didi’ak konteúdu karta ne’e. Mais ida ne’ebé ha’u hetan mak, karta ne’e, dirije bá sua-exelénsia primeiru ministru (Taur Matan Ruak), hanesan ministru  interior,” Komandante Jerál PNTL, Komisáriu Faustino da Costa, haktuir.  

Komisáriu Faustino dehan, sidadaun sé de’it, no hosi ne’ebé de’it, bainhira nia iha problema ka preokupasaun ruma relasiona ho aktu hosi membru PNTL ruma karik, bele hato’o karta lamentasaun. Maibé, karta lamentasaun ka insatisfasaun ne’ebé dirije hosi Vise-MJ, José Edmundo Caetano ne’e, la’ós bá komandu, maibé, karta hato’o direta bá PM Taur Matan Ruak. Sé karta ne’e bá duni komandu PNTL, parte komandu rasik mak sei prosesa.

Maske nune’e, Komisáriu Faustino dehan, bainhira mosu diskusaun ida iha momentu ne’ebá, la’ós de’it komandu PNTL nia membru mesak, maibé, iha SNI ne’e, iha ekipa konjunta boot ida, kompostu PNTL nian, iha Servisu Informasaun Polísia (SIP), iha mós PNTL ne’ebé destakadu, Servisu Informasaun Militár J2, no Servisu Informasaun PCIC nian.

Lee Mós : PM Taur Hein Rezultadu Investigasaun Bá Intervensaun V-MJ ho V-MI iha SNI

Jornalista: Rogério Pereira Cárceres