Hatutan.com, (22 Outubru 2022), Díli-Pertamina International Timor SA (PITSA) prontidaun no kompromete selu taxa ka impostu bá Governu Timor-Leste tuir lei ne’ebé regula hosi Autoridade Tributária.

Lee Mós : Kada Fulan, Pertamina iha Obrigasaun Selu $10,000 Bá Estadu Durante Tinan-30

Sosializasaun Lei Tributária Autoridade Tributária, Ministériu Finansas (MF) bá empreza Pertamina International Timor SA (PITSA), Sábadu (22/10/2022). Foto/Elio dos Santos da Costa

Prontidaun ida ne’e hato’o direta hosi Corporate Secretary & Legal Representative Pertamina Internasional Timor, SA iha Dili, Rudolfo Sinambela, hafoin hetan sosializasaun informasaun kona-bá lei no mós oinsá sistema sira selu impostu nian ne’ebé mak fasilita hosi Ministériu Finansas iha Díli, Sábadu (22/10/2022).

Rudolfo Sinambela,  orgullu no agradese  bá atividade sosializasaun ne’ebé hato’o direta hosi Autoridade sira Tributária nian, liga ho program Governu nian kona-bá impostu, atu nune’e, sira iha obrigasaun atu hakru’uk bá regra sira impostu nian iha Timor-Leste.

“Ami mós iha kompromisu atu nafatin la’o tuir regularizasaun impostu nian, ne’ebé mak sai hanesan obrigasaun ida bá selu impostu no tuir estratéjia Governu nian hodi la’o hamutuk atu bele dezenvolve Timor-Leste liuhosi taxa ka impostu ne’ebé ami rasik kontribui,” Corporate Secretary & Legal Representantive Pertamina Internasional Timor, SA iha Dili, Rudolfo Sinambela hateten.

Reprezentante legál ne’e dehan, dehan, Pertamina Internasional Timor, SA nia esperansa bá oin maka, la’ós de’it pertamina sira mesak mak atu selu impostu, maibé, indústria sira hotu ne’ebé mak eziste iha  TL iha obrigasaun mós atu selu impostu bá Governu, atu nune’e bele fó efeitu di’ak bá dezenvolvimentu infra-estrutura iha TL.

Lee Mós : Tinan 23, Laiha Kontratu Arrendamentu ho Pertamina Internasionál Timor SA

Rufolfo Sinambela, garante mós katak, impostu ida ne’e, sira sei selu tuir lei ho norma sira ne’ebé mak Governu estabelese, no impostu ida-ne’e mós fó liután konsekuénsia bá folin produtu mina ne’ebé mak sira fa’an. Maibé, ho estratéjia atu deside folin ka presu mina, sira sempre halo esforsu,  atu nune’e, folin ne’ebé iha, populasaun ka konsumidór sira bele simu ho di’ak.

Pertamina mós sei bele nafatin ezekuta desizaun Governu ka Estadu iha nasaun ida ne’e nian, liuhosi lei sira ho saida de’it mak hatuur ona, tuir regularizasaun sira impostu nian.

Presu kombustível ne’ebé mak oras ne’e daudaun fa’an iha Postu Kombustivel sira mak pertense bá Pertamina International Timor SA, hanesan iha Bebora no fatin seluk tán, maioria hanesan de’it.

“Ami hanoin ho loloos ona katak, bele simu hosi populasaun no nafatin prienxe bá elementu sira seluk ne’ebé ami tenke selu, tantu impostu importasaun, no mós impostu sira seluk tán. Entaun, nia presu ne’e, dala-ruma flutiativu. Maibé, atu haree besik liután, bele direta mai iha ami nia sentru kombustivel,”  Sinambela hateten.

Totál traballadór sira ne’ebé mak serbisu iha Pertamina International Timor SA, hamutuk na’in-130. Hosi númeru ne’e, maioria timoroan mak traballadór permanente, no hetan tulun hosi traballadór Indonézia sira balu hamutuk na’in-9 hosi Sentrál Indonézia.

Iha fatin hanesan, Diretór Komunikasaun iha Autoridade Tributária, Ministériu Finansas (MF), Luis Norberto, konsidera katak, informasaun sira kona-bá impostu ne’e importante, tanba Pertamina rasik mós estabelese ona ninia negósiu iha Timor-Leste, tinan barak ona, no mós sira rasik mós hanesan empreza boot ida hosi Indonézia.

Lee Mós : Pertamina Internasionál Sei Kumpre Lei TL ba Arrendamentu no Prontu Selu Dívidas

“Nia kontribui mós ho impostu ne’ebé maka’as, selu bá Estadu ida ne’e. Nune’e, ha’u hanoin katak, nia integridade hanesan empreza, ita tenke koñese, tanba nia mós hola parte iha parseiru Governu nian,” Luis Norberto tenik.

Ho kontribuisaun boot hosi Pertamina International Timor SA, ida ne’e, Ministériu Finansas liuhosi Autoridade Tributária, iha hanoin hela oinsá mak bele  fó apresiasaun ruma ka prémiu ruma tanba sira-nia estabelesimentu negósiu iha TL. Maibé, desizaun sira bá ida ne’e, tenke mai hosi desizaun nivel altu nian, depois desizaun ida ne’ebé mak bele haree katak, Governu bele fó hanesan kondekorasaun ida bá kompañia sira ne’ebé mak durante sira fó sira-nia kontribuisaun maka’as no selu impostu bá Estadu  TL.

Ministériu Finansa  liuhosi Autoridade Tributária husu bá kontribuinte hotu, hanesan sidadaun, sira tenke kumpre ninia direitu ho devér, tanba impostu ne’ebé selu ne’e, sai hanesan sasukat ida, liu-liu tanba iha kontribuisaun boot bá dezenvolvimentu Timor-Leste nian bá oin liuhosi selu impostu.

“Ha’u nia mensajen mak ida ne’e, ha’u hanoin katak, mai ita hotu servisu hamutuk, kontribui bá ita dezenvolvimentu, liu-liu ita nia nasaun TL ne’ebé ita hotu hadomi,” Diretór Komunikasaun iha Autoridade Tributária, Ministériu Finansas (MF), Luis Norberto, hateten.

Rejime lei tributária númeru 08/2008, ko’alia kona-bá impostu no nia regra sira. Bainhira selu taxa la tuir tempu ne’ebé determinadu, autoridade tributária sei hasa’e taxa, nune’e parte kompañia na’in tenke selu tuir medida ne’ebé Governu foti ona, tanba selu la tuir tempu ne’ebé loloos.

Jornalista: Rogério Pereira Cárceres