Hatutan.com, (24 Outubru 2022), Díli-Tribunál Distritál Díli (TDD) liuhosi kontinuasaun audiénsia julgamentu primeiru interrogatóriu, Segunda (24/10/2022), aplika medida koasaun Termu Identidade Rezidénsia (TIR) no aprezentasaun periódika bá diretór ajénsia viajen New Generation  ho inisiál  SM tanba faktu sira la provadu.

Lee Mós : MP Alega Medida Koasaun Prizaun Preventiva Bá Diretór Ajénsia Viajen ho Inisiál SM

Diretór ajénsia viajen New Generation ho inisiál SM. Foto/Elio dos Santos da Costa

“Despaxu hosi Tribunál ninia bá primeiru interrogatóriu, aplika nia TIR, no aprezentasaun periódika kada semana ida, dala-ida bá iha arguido tanba tribunál nia haree katak, faktu ne’ebé maka Ministériu Públiku promove hela mai iha tribunál, liu-liu akuza arguido ho krime tráfiku umanu, inklui mós krimes Kuestro, tribunál haree katak, laiha prova,” Defeza Eustáquio Guterres, ne’ebé fasilita asisténsia legal bá arguido SM hateten bá jornalista sira, hafoin rona Juis sira-nia desizaun bá nia kliente iha TDD.

Eustáquio Guterres, dehan tán, desizaun TDD nian ho medida koasaun TIR no aprezentasaun periódika ne’e, tanba faktu sira dun hosi Ministériu Públiku bá nia kliente katak, komete krime tráfiku umanu ne’e, la provadu.

Tuir Defeza ne’e katak, kona-bá Tráfiku Umanu ne’e, bainhira nia kliente haruka ema, obriga ema, kaer ema, lori ema bá rai-li’ur, hodi bá atu buka serbisu, no ema ne’ebé haruka, hetan benefísiu hosi lezada sira ne’e.

“Mais nia lae, ha’u nia kliente, durante ne’e nia halo nia serbisu hanesan kompañia ne’ebé maka eziste, rejistu, no halo ninia serbisu, no rekruta ema, tuir regra ne’ebé mak iha, nia haruka bá. La’ós tanba nia mak haruka, mais ema sira ne’ebé mak hakarak bá mak husu ajuda, liuhosi hosi nia kompañia, mak lori nia bá, no nia trata tuir regara ne’ebé maka iha,” dehan Eustáquio Guterres.

Hanesan Defeza, Eustáquio Guterres, konsidera desizaun hosi TDD ne’e, adekuadu, no tuir duni regra sira lei nian, tanba atu akuza ema ida, no hakarak atu haruka bá tama prizaun preventiva ne’e, tenke iha prova ne’ebé sufisiente.

Iha Domingu, (23/10/2022) ne’e, iha prosesu primeiru interrogatóriu, Ministériu Públiku (MP) ne’ebé reprezenta hosi Prokuradora Lídia Soares, imputa arguido ho krime Tráfiku Umanu ne’ebé mak previstu iha artigu 163 no 164 hosi Lei Kodigu Penál Timor-Leste.

MP alega Prizaun Preventiva bá arguido SM, tanba liuhosi Ajénsia New Generation, arguido halo rekrutamentu ilegál bá timoroan sira hodi bá iha Portugál atu serbisu, infelizmente oras ne’e la hetan serbisu, ho barak mak abandona de’it iha sidade Lizboa-Portugál.

Prosesu Primeiru Ineterogatóriu ne’e Prezide hosi Juiz Singular Alvaro Maria, Ministériu Públiku (MP), reprezenta hosi Prokuradora Lídia Soares no arguido hetan asisténsia legál hosi Defensór Públiku, Eustáquio Guterres.

Jornalista: Rogério Pereira Cárceres