Hatutan.com, (18 Agostu 2022), Díli—Primeiru-Ministru (PM), Taur Matan Ruak, Kinta dadeer ne’e (18/08/2022), halo vizita bá Hospital Nasional Guido Valadares (HNGV), Dili, hodi bá fó korajen bá Vise-Prezidente Parlamentu Nasionál (V-PPN), Maria Angelina Lopes Sarmento ho família no mós  fó korajen bá Deputadu hosi Bankada CNRT, Arão Noe de Jesus ho nia família.

Lee Mós : Breaking News : Vise PN Maria Angelina Sarmento Hetan Asidente “Karreta Baku-Fila”

PM Taur vizita Vise-PPN, Maria Angelina Sarmento iha HNGV, Dili, Kinta (18/08/2022). Foto/Hatutan.com

Vise Prezidente Parlamentu Nasionál (V-PPN), Maria Angelina Lopes Sarmento, hala’o tratamentu intensivu iha HNGV hafoin asidente tráfiku “karreta baku-fila” iha área Bua-lo, Aldeia Tori-lalan, Suku Orlalan, Postu Laclubar, Munisípiu Manatuto, Kuarta kalan 17 fulan-Agostu ne’e.

Membru Parlamentu Nasionál hosi Bankada CNRT, Deputadu Arão Noe de Jesus, baixa iha HNGV tanba sofre moras balun no tuir informasaun katak Prezidente Parlamentu Nasionál (PPN) iha Kuarta Lejislatura ne’e sei  transfere bá hala’o tratamentu saúde iha rai-li’ur, Sesta aban (19/08/2022).

Iha oportunidade ne’e, Primeiru-Ministru (PM), Taur Matan Ruak mós koloka tempu hodi haree pasiente sira ne’ebé baixa ka halo hela tratamentu iha HNGV.

Informasaun kona-bá kronolojia asidente ne’ebé  Hatutan.com asesu hosi Polísia Nasionál Timor-Leste (PNTL) Munisípiu Manatuto kona-bá asidente  “karreta baku-fila” ho Vise PPN Angelina Sarmento ne’e  katak  iha loron 17 fulan-Agostu 2022, hale’u   tuku 20:00 Otl, akontese asidente “karreta baku-fila” ne’ebé transporta Vise-PPN Maria Angelina Sarmento iha área Bua-lo, Aldeia Tori-lalan, Suku Orlalan, Postu Laclubar.

PM Taur Matan Ruak, vizita Deputadu Arão Noe de Jesus iha HNGV, Díli, Kinta (18/08/2022). Foto/Hatutan.com

Karreta Parlamentu Nasional nian ne’e, tuir informasaun katak kondús hosi Vise-PPN, Angelina Sarmento nia katuas oan rasik. Ema ne’ebé mak asidente hamutuk na’in-haat (4); Vise-PPN, Angelina Sarmento hetan sofre iha parte hirus matan, kanotak no ain rua,  maibé lá tohar, Vise-PPN nia katuas oan ne’ebé kondús karreta refere hetan sofre iha parte hirus matan, Vise PPN nia oan mane hetan sofre kanek iha parte ulun no Vise-PPN nia oan feto nia ain de’it mak bubu.

Motivu hosi asidente ne’e tamba Vise-PPN nia katuas oan kondús karreta hola liuhosi estrada ninin, ne’e-duni rai-mamar  hodi rezulta karreta baku fila.

Komunidade sira ne’ebé hela besik fatin akontesimentu informa kedas liuhosi telefone  bá Xefe Saúde hodi orienta kedas ambulánsia bá evakua vítima asidente bá Sentru Saúde Laclubar no evakua kedas mai HNGV.

Jornalista : Carmelita Isaac