Hatutan.com, (26 Outubru 2022), Díli—Komisaun Organizadora ba dezlutu saudoszu Max Stahl nian prepara ona ajenda prinsipál sira inklui sei konvida sasin sira atu konta ka haktuir istória tomak involvimentu no dedeikasaun Max Stahl nian iha prosesu libertasaun nasionál Timor Leste (TL) nian.

Komisaun Organizadora atualiza preparasaun dezlutu Max Stahl atualiza preparasaun ba Prezidente Repúblika, José Ramos-Horta iha Palásiu Prezidensiál Bairru-Pité, Kuarta (26/10/2022). Foto/Média PR.

Ajenda hirak ne’e Komisaun Organizadora atualiza ona ba Prezidente Repúblika, José Ramos-Horta iha Palásiu Prezidensiál Bairru-Pité, Kuarta (26/10/2022).

Lee Mós: Komité 12 Novembru Hahú Prepara ba Dezlutu Max Stahl

“Prezidente Repúblika sei partisipa iha serimónia ne’e  no konta istória. Ita bele hatene fila fali saudozu Max Stahl momentu mai iha Timor-Leste, bá to’o iha ailaran, nia iha ligasaun ho se-se. Ita mós sei bolu ema sira ne’e atu mai konta saudozu ninia istória atu ema hotu bele hatene,” Prezidente Komisaun Organizadora Dezlutu Max Stahl, Rogério Castro da Cruz, hateten hafoin hasoru-malu ho Xefe Estadu.

Advertisement

Serimónia ne’ebé sei monu iha loron 28 Outubru, Komisaun Organizadora sei organiza kalan reflesaun no tau ai-funan ba saudozu nia monumentu ne’ebé governu konstrui ona iha rate Santa Cruz, tanba loron ne’e mós hanesan loron saudozu Sebastião Gomes nia loron mate.

“Prezidente Repúblika kontente, tanba iha komisaun ida ne’ebé mak preparadu, nune’e ita bele selebra loron saudozu Max Stahl nia korre metan ne’e ho di’ak. Ita hotu hatene katak maski saudozu ema estranjeiru, maibé nia ema ida ne’ebé fó nia vida tomak sai tán sidadaun Timor-Leste, kaben tan iha ne’e  no nia vida tomak fila fali iha Timor-Leste. Ida-ne’e mak buat ida úniku tebes,” Rogério Castro da Cruz hateten.

Atividade ne’ebé mak komisaun prepara mak hanesan, iha Kinta loron 27 fulan Outubru  sei hahú kalan reflesaun, halo animasaun kulturál iha Igreja Motael ninia oin.

Iha loron Sesta 28 Outubru lorokraik missa iha Igreja Motael, depois marsa ba iha semitériu Santa Cruz hodi inaugura saudozu Max Stahl nia kampa (Rate)  ne’ebé mak governu konstrui ona, aumesmu tempu halo inagurasaun ba nia kampa, remata kontinua ho kari ai-funan, sei fila fali mai iha CMSTAL saudozu ninia fatin, muzeu da rezisténsia.

Orsamentu ba selebrasaun ne’e $41.000, no komisaun organizadora fiar katak, serimónia ne’e sei la’o ho susesu ne’ebé sei konvida juventude hotu, populasaun tomak atu hola parte iha atividade ne’ebé sei hala’o durante loron rua hahú hosi 27 to’o 28 Outubru.

Advertisement

Jornalista: Vito Salvadór