Hatutan.com, (28 Outubru 2022), Díli—Empreza nasionál Timor Ocean, lamenta tebetebes rezultadu konkursu públiku kona-bá fornesimentu ró (boat) ho unidade rua (2) bá Polísia Nasionál Timor Leste (PNTL).

Modelu ró ka Boat ne’ebé Governu atu sosa tán bá PNTL. Foto/Google

Konkursu públiku fornesimentu ró (boat) bá PNTL ne’e hala’o iha loron 27 fulan-Setembru 2022 ho númeru ICB 22-14-B. Iha ne’ebé tuir Timor Ocean katak sira submete dokumentu ho presu $230,000, maibé rezultadu final ne’ebé fó sai hosi Aprovizionamentu Ministériu Interior nian  fó manan fali bá empreza Crown Unipesoal, Lda  ho presu $400,000.

Tuir regra aprovizionamentu nian bá kualkér konkursu públiku tenke liuhosi faze rua, mak hanesan faze selesaun dokumentu no faze komparasaun presu.

Iha faze selesaun dokumentu ne’e mak empreza ka konkorrente sira nia dokumentu falla ka la kompetu ka dokumentu ruma invalidu, automatikamente esklui ka la bele liu bá faze komparasaun presu. Ho nune’e, iha faze komparasaun presu, maka empreza ne’ebé aprezenta nia presu ki’ik no prestasaun  servisu ho kualidade, automatikamente bele manan.

Gunawan Andiguna Rahman, nu’udár na’in bá empreza Timor Ocean, iha loron 12 fulan-Outubru 2022, hato’o karta ho asuntu “protesta kona-bá  tenderizasaun “Supply Launch Boat for PNTL”  bá Ministru Interiór, Taur Matan Ruak, no haruka mós karta koñesimentu bá Komisáriu Komisaun Anti Korrupsaun (CAC, sigla  portugés) ho Komandante Jerál PNTL, Komisáriu Faustino da Costa, hodi aprezenta nia lamentasaun bá konkursu ne’ebé nia rezultadu fó sai iha loron 07 fulan-Outubru 2022, hatudu nia empreza ho presu ki’ik $230,000 bele lakon fali ho empreza Crown Unipesoal, Lda  ne’ebé manan ho presu $400,000.

Iha karta protesta ne’e, Gunawan Andiguna Rahman, fó razaun katak;

1. Kompañia Crown Unipesoal, Lda manan konkursu públiku (tenderizasaun) ne’e ho montante kontratu $400,000 bazeia bá kotasaun ne’ebé Timor Ocean submete $230,000 sura ona bele hetan ró (boat) rua no benefísiu bá empreza lokal 20% hosi montante $230,000. Empreza Timor Ocean  iha esperiénsia kona-bá área ró nian no mós agora halo hela mautensaun bá ró Berlin Nakorma.
2. Tuir Timor Ocean nia hatene katak empreza manan ne’e (Crown Unipesoal, Lda) la iha asset hanesan ofisina ruma iha parte téknika nian, kompara ho Timor Ocean hanesna empreza nasionál iha ofisina lokaliza iha Fatuhada ho Mandarin.

Karta Protesta Timor Ocean. Foto/Repro

Hatutan.com, Sesta (28/10/2022), iha Ministériu Finansa, Díli, halo konfirmasaun direta ho Vise-Ministru Interiór, António Armindo kona-bá lamentasaun Timor Ocean nian ne’e.  

Vise-Ministru Interiór, António Armindo, lia-tun dehan, ida-ne’e Aprovizonamentu Ministériu Interiór sei harre hela ida-ne’e no sei submete bá Gabinete Ministru Interiór ho Vise-Ministru Interiór

“Diretór sira no ekipa mak halo avaliasaun, la’ós ha’u. Atu avansa ho $20,000 ka $40,000, há’u haree de’it mak tekniku nia avaliasaun, ita bazeia de’it bá rekomendasaun,” Vise-Ministru Interiór, António Armindo hateten.

Timor Ocean Nia Proposta Komplikadu

Diretór Nasional Aprovizonamentu Ministeriu Interiór, Patricio Moreira da Silva, bá Hatutan.com iha nia servisu fatin, Vila-Verde, Díli, klarifika katak  iha proposta finansial hosi Timor Ocean hato’o nia proposta ida ne’ebé halo Aprovizonamentu komplikadu, tamba oorsamentu $400,000 ne’e bá ró (boat) rua, tamba ida ne’e tuir avaliasaun Aprovizonamentu nian bá iha Timor Ocean nia finansiamentu bainhira ekipa aprovizonamentu loke Timor Ocean nia proposta halo ekipa komplikadu tamba nia sumáriu Timor Ocean tau kuantidade ida deit ho valor $229,000 no bainhira sosa ro rua nia kustu liu ona $400,000 ka $458,000.

“Sé ami hakarak ró (boat) rua nia over bazet ona, tamba iha proposta nia sumáriu ida maibé iha detail Timor Ocean mensiona aluminium rua, no asesoris sira seluk ne’e rua-rua too hotu, entaun signifika nia alvu ka arah ne’e atu dehan katak atu oferese rua. Nune’e,  iha situasaun rua mak ami analiza, komplikadu bá ami, sumariu nia (Timor Ocean) mensiona ida, mais iha detail nia mensiona rua, no se rua mak ho ro ida espesiál bá iha Unidade Polísia Marítima (UPM) ne’ebé ho asesoris no ró ida ne’ebé integra nia fasilidade no boat hotu iha ne’eba kompletu susar kuandu ami nia avaliasaun atu hetan ró rua ne’e no bele impaktu bá nia kualidade no bele mós Timor Ocean lahetan tan ró,” Patricio Moreira da Silva esplika.

Diretór Nasional Aprovizonamentu Ministeriu Interiór, Patricio Moreira da Silva. Foto/Vito Salvadór

Diretór ne’e hatutan, iha situasaun rua ne’e sé Timor Ocean avansa ida, tuir nia sumáriu ne’ebé iha ho kustu $229,000, signifika Timor Ocean over budget, nune’e  otomatikamente eskluidu. Tamba bazet ne’ebé iha ne’e  $400,000 para sosa ró (boat) rua, no bainhira ró ida tuir Timor Ocean nia budget ho kustu $229,000 otomatikamente over no tenke eskluidu.

“Se Timor Ocean mensiona katak ró (boat) rua ne’e ho nia budget maka $229,000  nia impaktu bá kualidade tamba ita sosa ró ida bá siguransa nian tenke integra fasilidade no buat hotu-hotu iha laran no ami haree katak difísil ho osan ida hanesan Timor Ocean nia proposta,”  Patricio Moreira da Silva haktuir.

Timor Ocean mos manda ona karta protesta ba iha Ministériu Interiór nune’e parte Aprovizonamentu halo ona resposta ida liuhosi Gabinete Vise-Ministru Interior nian hodi hatutan bá iha gabinete Primeiru-Ministru nian atu bele hatan bá protesta ne’ebé maka Timor Ocean halo tamba karta hosi Timor Ocean direitamente bá Primeiru-Ministru hanesan mos Minustru Interiór.

Diretór Aprovizionamentu Ministériu Interiór nian ne’e hateten, Timor Ocean em-prinsípiu lakon tanba submisaun proposta mak komplikadu tamba ne’e karta resposta ne’e parte Aprovizonamentu iha anexa mós ho kopia teknikal, finansial, atu nune’e, bele iha resposta ida klaru bá reklamasaun hosi Timor Ocean.

Patricio Moreira da Silva mós esplika kona-bá tansá mak Crown Unipesoal.Lda manan, tanba empreza Crown Unipesoal.Lda  mai ho proposta ida relevante, razoável,  tuir budget  ka orsamentu  $400,000 bá ró (boat) unidade rua (2) no tuir duni proposta ne’ebé Ministériu Interior presiza.

Jornalista : Vito Salvadór