Hatutan.com, (07 Novembru 2022), Díli- Atu reduz no hakotu konflitu entre Grupu Arte Marsiál (GAM) ho Grupu Arte Ritual (GAR),  Sekretáriu Estadu Juventude no Desportu (SEJD) sei  halo diálogu ho membru organizasaun hotu iha nivel suku hodi organiza no garante disiplina membru sira nian.

Lee Mós : Kazu Dare, MP Promove Arguidu 27 ho Krime Omesídiu Simples no Krime Arma Branka

SEJD Abrão Saldanha. Foto/Dok. SEJD

Sekretáriu Estadu Juventude no Desportu (SEJD), Abrão Saldanha, Segunda (07/11/2022), hateten violénsia joven sira iha fatin-fatin ne’e akontese balun baze bá arte marsiál no balun la’ós baze bá arte marsiál, nune’e seguransa sei tau matan, prosesu kontinua la’o oinsá mak halo disiplina, organiza di’ak liután arte marsiál.

Abrão Saldanha husu atu sosiedade tomak, ema hotu-hotu hamutuk oinsá mak ajuda atu dezenvolve, transforma mentalidade joven sira nian.

“Uluk la reativa arte marsiál mós konflitu barak la halimar. Ha’u atu fó ezemplu semana ida kotuk liubá ha’u bá Baucau uluk kedas konflitu ho arte marsiál, sira dehan depois reativa ne’e tinan ida resin sira seidauk iha insidente ruma iha baze arte marsiál,” Abrão Saldanha hateten.

Governante ne’e rekoñese katak konfrontu entre arte marsiál iha Díli mak sei iha duni, maibé ne’e kulminante husi problema sosiál, ekonómika no problema oi-oin ne’ebé sosiedade ne’e enfrenta.

“Labele halo julgamentu de’it katak hun bá problema iha Timor mak arte marsiál, ne’e kontribuisaun husi problema oin-oin ne’ebé ita-nia rain iha. Entaun ita ajuda malu hodi dezenvolve di’ak liután ita nia foin-sa’e sira,” Nia subliña.

Kona-bá arte rituál iha duni dezafiu ida, tanba tarefa ne’ebé Sekretária Estadu Juventude no Desportu (SEJD) iha ne’e bá sira ne’ebé nia baze Desportu iha, rituál seidauk, SEJD halo ona diálogu ho sira atu kompriende sira-nia hanoin no hakarak atu enkuadra oinsá iha  Timor Leste hanesan estadu direitu ida, sei iha hela prosesu hamutuk ho sira.

Sede ka padepokan bá arte marsiál agora daudauk iha hela prosesu ba levantamentu bá sira nia dadus, sira mak iha rai, se mak laiha rai ida atu antes la’o.

La’ós atu fó osan estadu nian, ba harii fali ema ida nia uma privadu lae, ba organizasaun ida nian, entaun haree organizasaun sira ne’ebé iha ona prióriedade ka lae, la’ós de’it harii sede bá arte Marsiál.

Jornalista: Vito Salvadór