Hatutan.com, (09 Novembru 2022), Díli—Tribunál Distritál Díli (TDD) liu hosi despaixu ikus, aplika medida prizaun preventiva bá arguidu na’in-haat no aprezentasaun periódika ba arguidu na’in 23 ne’ebé involve iha kazu Dare.

Tribunál Distritál Díli (TDD) liu hosi despaixu ikus, aplika medida prizaun preventiva bá arguidu na’in-haat no aprezentasaun periódika ba arguidu na’in 23 ne’ebé involve iha kazu Dare. Foto/Elio dos Santos da Costa.

Arguidu na’in-haat ne’ebé TDD aplika prizaun preventiva ho inisiál, CCCS, FXTB, NM no LS.

Lee Mós: Kazu Dare, Arguidu Na’in-22 Alegadu Prizaun Preventiva no Na’in-Lima TIR

Defeza, Rui António Mendonça la aseita Tribunál aplika medida prizaun preventiva ba arguidu na’in-haat no sira seluk ne’ebé hetan medida aprezentasaun periódika.

“Ami nia kliente na’in-haat hetan medida prizaun preventiva, restu hetan medida aprezentasaun periódika fulan ida dala rua iha prokuradór Matadouru. Defeza la aseita no sei halo rekursu, kontra despaisu Tribunál nian,” Defeza hateten iha TDD, Kuarta (09/11/2022).

Iha parte seluk, Prokuradór Domingos Barreto deklara sei halo rekursu hasoru despaixu Tribunál nian, tanba aplika de’it medida prizaun preventiva ba arguidu na’in-haat.

Prokuradór konsidera katak, bainhira aplika de’it medida prizaun preventiva bá arguidu na’in-haat, sira seluk iha liur ba futuru kontinuasaun krime sei bele akontese tán, tanba kauza hosi problema ne’e maka vitima ida lakon vida.

Iha alegasaun, Ministeriu Públiku husu Tribunál atu aplika medida prizaun preventiva ba arguidu na’in 23, no medida TIR ba arguidu na’in-haat ho inisiál, T, E, C ho H.

Enkuantu hosi parte defeza, husu Tribunál atu aplika medida aprezentasaun periódika ba arguidu na’in 27.

Prosesu primeiru interrogatóriu ne’e, hahu halao iha loron Domingu no kontinua nafatin iha loron Segunda no Tersa tama ba iha alegasaun iha loron Kuarta foin tama ba iha despaixu ikus.

Kazu ne’e akontese iha aldeia  Fatunaba, suku  Dare, Postu Administrativu Vera Cruz, Munisípiu Díli, ne’ebé rezulta vítima Clemetino Borges (25) mate fatin.

Kazu nne’e kontese, iha loron 3 fulan Novembru 2022 por volta tuku 24:3o kalan, iha akontesimentu  mosu asaltu malu entre Grupu Arte Marsial (GAM) Persaudaran Setia Hati Terate (PSHT) no Grupu Arte Ritual (GAR) 77.

Prosesu ne’e taka ba iha públiku, maibé hosi parte Prokuradór Domingos Barreto,   promove arguidu sira ho krimi omesidiu simples ne’ebé previstu artigu 138 hosi kódigu penál Timor-Leste no krimi arma branka hosi lei númeru 5/2017.

Prosesu Primeiru Interogatoriu ne’e prezide hosi Juiz singular, Afonso Carmona, Ministériu Públiku reprezenta hosi  Prokuradór Domingos Barreto no arguidu sira hetan asisténsia legál hosi Advogadu na’in haat.

Jornalista: Vito Salvadór