Hatutan.com, (10 Novembru 2022), Díli-Autoridade Polísia Nasionál Servisu Investigasaun Kriminál (PNSIK) hamutuk ho Alfándega, Kinta (10/11/2022), hale’u tuku 15:47 oras Timor-Leste, hasai ona sasán hirak ne’ebé transporta ho Ró   Belin Nakroma  atu bele husik ró refere mamuk hodi halo operasaun Dili-Oé-Cusse, Atauro  no Oé-Cusse, Atauro-Díli.

Lee Mós : Raul Lemos: Bero 22 Tula iha Ró Berlin Nakroma La’ós Sasán Ilegal

Na’in bá empreza Sheramor Sucesso Supply LDA, Raul dos Reis Lemos, aprezenta dokumentu relevante bá Alfádega ho PSIK iha Portu Díli, Kinta (10/11/2022). Foto/Rogério Cárceres

Sasán hanesan bero hamutuk 22 hosi empreza Sheramor Sucesso Supply LDA no motór Harley ida  (seidauk hatene na’in mak sé), inklui mobiliáriu lubun mós seidauk hatene na’in mak sé hatún ona hosi Ró-laran Berlin Nakroma nian hodi tau hamutuk iha arredores Portu Díli atu hein dokumentu komprovativu sira, liuliu manifestu atu bele identifika motór Harley ho sasán mobiliáriu sira ne’e se nian no bele submete bá prosesu tuir mai.

Sasán hirak ne’e ekipa konjunta kompostu hosi Autoridade Aduaneira ka Alfándega, Polísia Nasionál Servisu Investigasaun Kriminál (PNSIK)   no parte intelijénsia sira halo apreensaun  bainhira Ró Belin Nakroma atraka iha Portu Díli iha Tersa, 08 fulan-Novembru 2022 tanba sasán sira ne’e la iha dokumentu ka manifestu.

Advertisement

Kona-bá bero 22 hosi empreza Sheramor Sucesso Supply LDA nian ne’ebé transporta mós iha Ró Berlin Nakroma ne’e nia dokumentu hanesan  paking list  ho invoce kompletu hela hodi hein de’it ajénsia navegasaun ka Kapitaun Ró Berlin Nakroma nian aprezenta manifestu hodi kompleta para bele prosesa selu taxa ka impostu tuir baze legal ne’ebé vigora.

Iha ámbitu hatún sasán sira-ne’e iha Portu Díli,  na’in bá empreza Sheramor Sucesso Supply LDA, Raul dos Reis Lemos, aprezenta dokumentu komprovativu sira bá autoridade relevante, hanesan Alfándega ho PNSIK. Nune’e, Alfándega ho PNSIK hatene klara ona katak na’in bá bero 22 ne’e mak empreza Sheramor Sucesso Supply LDA, maibé kona-bá motór Harley ida ho mobiliáriu lubun ne’e parte sira seidauk hatene tanba na’in bá sasán sira ne’e la aprezenta an no la aprezenta dokumentu.

Hatun sasán sira hosi Ró Berlin Nakroma. Foto/Rogério Cárceres

“Dokumentu sira empreza Sheramor Sucesso Supply LDA aprezenta ne’e prosesu ida. Importante liu mak  ajénsia navegasaun, Kapitaun Ró ka Autoridade Portu Timor-Leste (APORTIL)  ne’ebé mahan bá Ró Estadu nian hanesan Berlin Nakroma tenke aprezenta manifestu, tanba sasán sira ne’e sai hosi nasaun ida ba nasaun seluk tenke iha dokumentu ka manifestu,”  Diretór Nasional Risku Alfándega, Julião José Ximenes, esplika bainhira partilla informasaun bá malu ho na’in bá empreza Sheramor Sucesso Supply LDA, Raul Lemos, ne’ebé akompaña  mós hosi ekipa PNSIK ne’ebé lidera hosi Inspetór Polísia Almério Quintas  ho autoridade sira APORTIL nian iha Portu Díli.

Inspetór Polísia Almério Quintas   iha nia intervensaun hateten, importante agora APORTIL hatudu hela espasu ida atu parte sira asegura sasan sira ne’e no hamamuk ona Ró Berlin Nakroma atu bele hala’o nia operasionál normal.

“Sasán sira ne’e ita tenke hatún hodi asegura no tau hamutuk iha fatin ida para hein prosesu sira tuir mai. Ho nune’e, bele fó espasu movimentu iha Portu Díli ho di’ak no bele garante operasionál Ró Berlin Nakroma nian tanba Ró Berlin Nakroma tenke hala’o operasaun ona,” Inspetór Polísia Almério Quintas.

Sasán hira ne’e hatún ona hosi Ró laran Berlin Nakroma nian hodi fó tempu bá Ajénsia Navegasaun (Broker) ka Kapitaun Ró nian, inklui APORTIL atu bele aprezenta manifestu hodi submete bá prosesu tuir mai.

Advertisement

Jornalista : Rogério Cárceres

Advertisement