Hatutan.com, (11 Novembru 2022), Díli—Xefe Estadu Maiór Jenerál FALINTIL Forsa Defeza Timor Leste (F-FDTL), Tenente Jenerál, Falur Rate Laek apela ba joven sira atu labele uza atributu Arte Marsiál la’o tun sa’e tanba realidade hatudu katak, la kontribui ba estabilidade nasaun no sempre hamosu problema barak iha komunidade.

Xefe Estadu Maiór Jenerál FALINTIL Forsa Defeza Timor Leste (F-FDTL), Tenente Jenerál, Falur Rate Laek. Foto/Média PR.

“Joven sira muda mentalidade ne’ebé la di’ak, labele uza atribuitu Arte Marsiais nian hodi la’o tun sa’e, hodi kria problema ba maluk sira seluk, tanba ne’e la kontribui ba kresimentu sosiedade nian,”  Falur Rate Laek hateten hafoin hasoru-malu ho Prezidente Repúblika, José Ramos-Horta, iha Palásiu Prezidensiál Nicolau Lobato, Bairru-Pité, Sesta (11/11/2022).

Lee Mós: Konfrontu Entre Grupu Artemarsiál iha Luro, Ida Grave

Falur Rate Laek husu atu foinsa’e sira haburas de’it maka espíritu toleránsia hodi garante pás no estabilidade tanba juventude mak símbolu unidade nasionál.

Advertisement

Nia fó-hanoin katak, Juventude ida uluk hanaran klamar no isin maubere, uluk luta ho espíritu nakonu ho sakrifísiu, solidariedade no hadomi malu.

Tamba ne’e, juventude ohin loron tenke kontinua lori espíritu ne’ebé juventude rezisténsia rai hela, hodi kontribui no apoiu-malu bá moris di’ak, la’ós estraga malu.

Juventude hanesan ema sarani, tenke hadomi-malu hanesan Timoroan, kria amizade, konstrui pás no hametin fraternidade ba sosiedade ida tolerante.

Durante enkontru, Falur atualiza situasaun F-FDTL em jerál no situasaun Forsa Aero nian, inklui lojístika bá Xefe Estadu hanesan komandante supremu F-FDTL.

Lee Mós: Konfrontu iha Dare Durante Finadu, Ida Mate Fatin

Advertisement

Jornalista: Vito Salvadór