Hatutan.com, (14 Novembru 2022), Díli—Estadu hakarak atu promove páz no kultura Timor Leste (TL) hahú hosi Munisípiu Ataúro ne’ebé sei realiza iha loron 21 to’o 24 fulan Novembru tinan ne’e.

Prezidente Komisaun Organizadora Festivál Múzika no Kultura Ataúro, Azevedo Marçal ho ekipa atualiza ona progressu preparasaun ba Xefe Estadu José Ramos-Horta iha palásiu Prezidensiál Nicolau Lobato Bairru-Pité, Segunda (14/11/2022). Foto/Média PR.

Promosaun ne’e liu hosi realizasaun ka festivál múzika no kultura ne’ebé ho nia objetivu prinsipál atu hasa’e kreatividae joven Timoroan iha área arte no kultura no mós hala’o sosializasaun ba identidade kulturál ba jerasaun foun sira hodi bele promove dame, estabilidade no unidade nasionál.

Prezidente Komisaun Organizadora Festivál Múzika no Kultura Ataúro, Azevedo Marçal ho ekipa atualiza ona progressu preparasaun ba Xefe Estadu José Ramos-Horta iha palásiu Prezidensiál Nicolau Lobato Bairru-Pité, Segunda (14/11/2022).

Komisaun Organizadora mós hetan orientasaun hosi Xefe Estadu kona-bá preparativu sira ne’ebé la’o ona, nune’e aproveita oportunidade ida ne’e atu partilla mós ba sidadaun tomak ne’ebé karik iha interese hakarak partisipa iha eventu ida ne’e.

Durante festivál ida ne’e sei iha atividade sira fahe ba grupu tolu mak hanesan, Primeiru sei halo atividade hamutuk ualu, sei iha konkursu ho modalidade hamutuk haat.

Atividade ne’ebé kobre maka múzika instrumentál, tradisionál, tais tradisionál hosi Munisípiu 14 atu Embaixadór sira hosi rai li’ur ida-idak hatais tais Timoroan nian hosi munisípiu ida-idak promove tais Timor nian.

Atividade seluk maka soru tais, ai-han tradisionál no mós ai-han internasionál hosi ekipa Indonézia ida sei mai partisipa.

Hamatak illa Ataúro, kuda mangro atu hamatak illa Atauro, marsa moradores, mudansa tradisionais, feira livru no espozisaun pintura.

Iha mós Konkursu kompetisaun sira tasi, rai  maran, Ataúro Adventure, noite poema, pintura, múzika koremetan. Iha korida ró, nani taru, halai sa’e foho, korida bisikleta.

Prezidente Repúblika, José Ramos-Horta agradese teb-tebes, fó apoiu tebe-tebes ba ekipa ne’ebé la’o no hetan mós orientasaun balun hosi Xefe Estadu ho apoiu hosi Primeiru Ministru Taur Matan Ruak no mós VIII Governu konstitusionál tomak, tanba ne’e mobilizasaun komisaun organizadora ne’e kompostu hosi liña ministériais sira.

“Tempu badak sei iha publikasaun, Xefe Estadu ho Xefe Governu rasik mak sei konvida liu hosi vídeo, katak Munisípiu Ataúro ne’e agora sai munisípiu ne’ebé hetan prioridade tinan ida-ne’e. Alende primeiravez eleva ninia nível Administrativu hosi postu ba munisípiu, hetan atensaun hosi mundu internasionál atu hotu-hotu promove kultura no mós arte Timor nian hahú hosi Ataúro,” nia informa.

Orsamentu ba eventu ne’e finansia hosi Prezidénsia Repúblika, governu, liña ministériais hanesan Sekretária Estadu Arte Kultura, MTKI no parseiru dezenvolvementu sira ho apoiu la’ós osan, seitór  privadu sira rai laran mós hakarak apoiu, nune’e orsamentu ne’e purvolta $500.000.

Partisipante sira iha ona konfirmasaun lista ema hamutuk 2.652 mak sei ba, hosi munisípiu sira hamutuk 386 no sira ne’ebé rejistu ona atu tuir  atividade sira ne’e 1.700.

Jornalista: Vito Salvadór