Hatutan.com, (15 Novembru 2022), Díli—Média online Hatutan.com selesionadu hanesan manán-na’in ka primeiru lugár iha kompetisaun bá produtu jornalístiku di’ak liu, kona-bá tinan-10 ezisténsia Telkomcel iha Timor Leste (TL).

Jornalista Vito Salvadór hosi Hatutan.com simu sertifikadu hosi VP Finance & Human Capital Telkomcel, Dedy Edward Ambarita. Média online Hatutan.com selesionadu hanesan manán-na’in ka primeiru lugár iha kompetisaun bá produtu jornalístiku di’ak liu, kona-bá tinan-10 ezisténsia Telkomcel iha Timor Leste (TL). Foto/Elio dos Santos da Costa.

Eventu ida-ne’e realiza hodi komemora ezisténsia Operadór Telekomunikasaun Telkomcel iha Timor Leste bá dala-X ne’ebé monu iha 17 fulan Setembru 2022.

Lee Mós: Tinan Sanulu Telkomcel, Serví ho Domin Hafutar ho Sasadik

Telkomcel loke kompetisaun ne’e hahú hosi 30 Agostu 2022, ho tema “Telkomcel tinan 10,” no iha média nasionál hitu mak submetu sira nia produtu jornalístiku hanesan, Timor Post, Díli Post, Independente, MediaMudansa, Lafaek News, Bussines Timor no Hatutan.com.

Ohin, Tersa (15/11/2022), Telkomcel liu hosi serimónia “Media Gathering ho tema Servi ho Domin,” servisu hamutuk ho Embaixada Repúblika Indonézia iha Timor Leste oferese formasaun Public Speaking ne’ebé formadór mai hosi Atase Polri KBRI Díli, Colonel Don G.M da Ccosta, anunsia ofisialmente manán-na’in sira iha ámbitu serimónia ida ne’e.

Bazeia ba rezultadu avaliasaun hosi ekipa juri, Telkomcel halo anunsiu no atribuisaun prémiu ba manán-na’in sira, Hatutan.com hetan primeiru lugar, Timor Post Segundu lugar, Lafaek News Terseiru lugar, Independente Kuartu lugar, no Díli Post Kintu lugar, enkuantu MediaMudansa no Bussines Timor hetan sertifikadu apresiasaun hosi Telkomcel nu’udár rekoñesimentu ba kontribuisaun ne’ebé iha hodi partisipa iha kompetisaun ne’ebé Telkomcel organiza.

Hatutan.com manán kompetisaun ne’e ho títulu notísia, “Tinan Sanulu Telkomcel, Serví ho Domin Hafutar ho Sasadik,” ne’ebé hakerek hosi Jornalista Vito Salvadór, Edita hosi Editór hanesan mós koordenadór kobertura Hatutan.com Cipriano Colo.

Maneger Bilco & Corcom Telkomcel, Cesaltina Jannet da Rosa Maia hateten programa kompetisaun ne’ebé Telkomcel iha, atu kontribui bá hadi’a no hasa’e abilidade jornalista sira nian.

Tanba ne’e, Parte Telkomcel iha esperansa katak, atividade ne’ebé Telkomcel iha fó duni impaktu pozitivu ba maluk jornalista sira hotu, nune’e labele haree ba montante orsamentu ne’ebé iha, maibé haree ba valór hosi atividade ida-ne’e.

“Telkomcel hakarak atu involve an iha prosesu hasa’e koñesimentu bá jornalista sira, hasa’e abilidade no iha unidade ne’ebé di’ak ho jornalista sira seluk. Tanba ne’e, bom susesu ba ita hotu,” Cesaltina Jannet da Rosa Maia hateten iha serimónia atribuisaun prémiu iha Kantor Pusat Budaya Indonésia Merkadu-Lama, Díli.

Jornalista sira hosi Média nasionál sira ne’eb’e selesionadu hanesan manán-na’in iha kompetisaun bá produtu jornalístiku, kona-bá tinan-10 ezisténsia Telkomcel iha Timor Leste (TL). Foto/Elio dos Santos da Costa.

Iha fatin hanesan, Sekretáriu Estadu Komunikasaun Sosiál (SEKOMS), Mericio Juvinal dos Reis Akara konsidera kompetisaun kona-bá hakerek bá jornalista sira ne’ebé operadór Telkomcel oferese ne’e di’ak tebes no governu apresia ho inisiativa ida-ne’e, tanba bele fasilita kompetisaun sira nune’e atu hasa’e tán kualidade entre jornalista sira, hodi bele hahú hatudu sira nia talentu, kapasidade ba iha kompetisaun ida ne’ebé mak saudável.

“Inisiativa sira nune’e bele hala’o mós hosi operadór sira seluk, atu bebeik tanba bainhira kompetisaun sira nune’e iha jornalista sira mós loron-loron bele prepara an, hasa’e sira nia kapasidade. Bainhira tuir kompetisaun bele hatudu katak, iha kapasidade di’ak atu kompete,” Mericio Juvinal dos Reis Akara hateten.

Governu apresia ho inisiativa di’ak sira hanesan ne’e no hein katak kompetisaun ne’ebé Telkomcel organiza sei kontinua iha tinan oin, tanba ida ne’e mak hanaran kooperasaun entre governu no seitór privadu sira funsiona, nune’e hodi tulun seitór komunikasaun liu-liu jornalista sira bele iha kapasidade liu atu kontribui informasaun ba públiku ho kualidade no kredível hodi eduka sosiedade Timor Leste.

Kona-bá ne’e, Jornalista Timor Post, Orlando Oki ne’ebé kompete mós iha eventu ne’e ho klasifikasaun segundu lugar konsidera Hatutan.com manán tanba produtu kualidade duni.

“Ha’u fiar katak iha prémiu ida-ne’e, kompetisaun ida-ne’e Hatutan.com mak sai manán-na’in, tanba haree ba rezultadu hakerek. Hanesan jornalista ida ne’ebé mak reprezenta Timor Post, ha’u sei la lakon vontade tanba kolega hosi Hatutan.com mak manán mós ha’u sei iha oportunidade atu hadi’a ha’u nia difikuldade no faillansu sira ne’ebé iha,” Orlando Oki hateten.

Orlando agradese ba Telkomcel ne’ebé organiza ona eventu ida ne’e hodi fó oportunidade bá jornalista Timoroan sira atu espresa sira nia abilidade hakerek, no husu atu kontinua programa ne’e iha tinan sira tuir mai.

Nune’e mós Jornalista Vito Salvadór hosi Hatutan.com sente kontente tanba sai manán-na’in iha kompetisaun ne’e.

Oportunidade ida ne’e enkoraza Vito Salvadór atu hadi’a di’ak liu tán ninia abilidade hakerek iha futuru liu liu buka aprende nafatin ho maluk jornalista sira iha Hatutan.com no média sira seluk.

“Ha’u orgullu tanba antes ne’e la espera atu produtu ida ne’e bele selesionadu iha kompetisaun Telkomcel nian. Maibé, ha’u agradese tanba ida-ne’e enkoraza ha’u atu apreende liu tán, disiplina iha kobertura, hatene análiza oinsá hakerek notísia ida ho títulu interesante, identifika fontes kredível, Elaborasaun Tetum Patronizadu, Estrutura notísia kompleta ho valór notísia inklui piramida invertida, sistemátiku ho nia identifikasaun problema ho solusaun,” nia espresa.  

Agradese ba Hatutan.com hanesan instituisaun ne’ebé Vito serbisu bá, agradese mós ba Telkomcel  ne’ebé realiza programa ne’e no husu atu kontinua programa ne’e iha futuru.

Jornalista: Vito Salvadór