Hatutan.com, (17 Novembru 2022), Dili—Tribunál Distritál Díli (TDD), iha Kuarta (16/11/2022) tuku 20:38, liberta totalmente manifestante na’in-26 hosi kastigu tanba faktu sira hosi Ministériu Públiku (MP) la provadu.

Sertidaun ba Libertasaun hosi Tribunal Distital Dili.

TDD liberta estudante hirak ne’e liuhosi karta sumáriu ne’ebé Hatutan.com, asesa iha Kinta, (17/11/2022), ho Númeru Crime (NUC) 0245/22.DIDIL, kona-bá “Certidão de Libertação” bá arguidu sira ho insial AF, TdAdC, AdCS, JdS, LJdCS, NP, AdS, MG, FBG, MTX, EW, AF, BCdR, AV, DVXG, PA, CM, RM, SH, OP, AdFdC, GSdC, LdC, APP, JM, ho PNdS.

Lee Mós: Hafoin PN Kansela Sosa karreta Foun, Reitór UNPAZ Organiza Estudante Ejize-tán Alterasaun LPV

Iha segunda (14/11/2022), oras dadeer, Polisia Nasional Timor-Leste (PNTL), halo intervensaun bá asaun estudante universitáriu sira nian durante atividade Manifestasaun iha resintu Kampus Sentrál Universidade Nasionál Timor-Lorosa’e (UNTL), tanba kontra desizaun membru Parlamentu Nasionál nian ne’ebé hakarak atu sosa tán karreta foun bá mandatu deputadu sira iha Sesta-Lejislatura.

Intervensaun PNTL ne’e, kaptura manifestante na’in-39 no transporta bá Kuartél Jerál PNTL Caicoli, hodi halo prosesu identifikasaun.

Rezultadu hosi identifikasaun ne’e, Polisia liberta ka haruka fila manifestante na’in-13 no na’in-26 mak konsege detein iha Sela Detensaun Komandu Munisipiu Dili, durante oras 72.

Hafoin kumpri tiha oras 72 iha sela detensaun, PNTL submete kedan estudante sira ne’e nia kazu bá Ministériu Públiku (MP).

Nune’e, iha Kuarta (16/11/2022), hahú tuku 11:00 dadeer Otl, manifestante sira ne’e sai arguidu iha Tribunál Distritál Dili (TDD), hodi sumbete bá prosesu judisiál.

To’o iha tuku 20:30, kalan Otl, prosesu sumáriu hosi Tribunál, deklara legalmente hodi liberta totál arguidu sira ne’e, tanba laiha indikasaun krime ruma, durante aktu sira iha manifestasaun laran.

Jornalista: Rogério Pereira Cárceres