Hatutan.com, (22 Novembru 2022), Ataúro—Prezidente Repúblika (PR) José Ramos-Horta hateten, Primeiru-Ministru (PM), Taur Matan Ruak sei konvoka reuniaun Konsellu Ministru (KM) ida iha munisípiu Ataúro no sei sai hanesan enkontru KM dahuluk ne’ebé Xefe Governu halo fora hosi Palásiu Governu.

Prezidente Repúblika (PR) José Ramos-Horta konversa hela ho Primeiru-Ministru (PM), Taur Matan Ruak iha Vila Maumeta Munisípiu Ataúro, Segunda (21/11/2022).

Ramos-Horta afirma, Xefe Governu hatene katak halo reuniaun Konsellu Ministru iha Ataúro, tenke iha desizaun ruma sai iha reuniaun ne’e nune’e rezolve problema konkretu ne’ebé komunidade munisípiu ne’e enfrenta.

Lee Mós: Governu Tau Millaun $13 Dezenvolve Atauro

“Reuniaun Konsellu Ministru ne’e bele iha desizaun ida hodi rezolve tiha problema bee moos no estrada iha munisípiu Ataúro,” Prezidente Repúblika hateten suku Vila Maumeta, Tersa (22/11/2022).

Xefe Estadu observa katak, problema infraestrutura, bee-moos no eletrisidade sai problema prinsipál komunidade Ataúro nian, governu mós bele haree didi’ak posibilidade hodi hadi’a tiha portu Ataúro no pista aviaun nian, klínika saúde ne’ebé di’ak liu kompletu ho ekipamentu, atu bele fó atendimentu ba komunidade ho di’ak.

Alende ne’e,  Ramos-Horta dehan bele mós atende komunidade hosi nasaun viziñu Indonézia tanba desde uluk kedan hahú hosi tempu Português sira mai iha ne’e no bainhira Timoroan sira balun problema ho autoridade Português halai mós ba illa sira Indonézia nian.

Ne’e hatudu katak, komunidade Ataúro família barak loos ho komunidade sira ne’ebé illa besik malu ho Timor Leste, ne’e dunik Governu tenke haree prioridade sira ne’ebé povu Ataúro merese atu hetan.

“Há’u fiar katak Primeiru-Ministru sei haree no aselera prosesu sira iha munisípiu ne’e no há’u pessoalmente mós sei tau-matan ba ida-ne’e,” Xefe Estadu subliña.

Komunidade Ataúro Halerik

Komunidade iha aldeia Adara, suku Beloi halerik ba bee moos tanba semana ida kuru dala ida hodi sustenta moris.

“Komunidade hosi aldeia Adara difísil loos asesu bee moos, tanba iha ne’ebá bee mai dala ruma semana ida, dala ida de’it,” Komunidade hosi aldeia Adara, Dan Gomes hateten iha Vila Maumeta, Segunda (21/11/2022).

Suku Beloi iha aldeia haat mak hanesan aldeia Vemasi, aldeia Maker, aldeia Arlo, no aldeia Adara. Totál Uma-ka’in iha aldeia Adara hamutuk 59.

Alende ne’e, eletrisidade, estrada seidauk to’o iha aldeia Adara, komunidade uza mak solár panel iha tempu kalan.

Tuir nia, aldeia Adara hanesan fatin potensiál id aba turizmu liu hosi rai henek mutin, natureza ne’ebé furan atrai tebes ema atu ba vizita maibé kondisaun susar liu.

Nune’e mós komunidade husi Suku Watulela, Domingas Ximenes hateten, to’o oras ne’e aldeia ne’e seidauk asesu eletrisidade no uza de’it solar panel iha tempu kalan.

Kona-bá Preokupasaun hirak ne’e, Ministru Administrasaun Estatál (MAE), Miguel Pereira de Carvalho hateten, Ataúro hahú 01 Janeiru 2022 muda ona nia estatutu hosi Postu Administrativu ba iha Munisípiu no pela primeiravéz istória Timor Leste katak nia sai ona Munisípiu ida. Bainhira nia sai ona munisípiu, nia iha atribuisaun kompeténsia atu bele tau-matan ba vida populasaun.

Kompeténsia no atribuisaun munisípiu sira ne’e iha dominiu oi-oin atu garante eskola sira iha kondisaun ne’ebé di’ak liu tán, komunidade iha asesu bá bee moos, eletrisidade, dalan ne’ebé di’ak liu tán foin mak hahú iha tinan ida-ne’e.

“Governu kria mekanizmu hotu-hotu atu garante kondisaun populasaun iha illa ida-ne’e di’ak, liu hosi Munisípiu Atauro iha tinan ida-ne’e ho orsamentu rasik purvolta millaun $2.5 atu bele tau-matan bá vida populasaun iha área ida-ne’e,” Miguel Pereira de Carvalho hateten.

Kona-bá problema populasaun sira iha Ataúro tinan barak, desde restaurasaun indepedénsia espera kona-ba dezenvolvementu sira nia área, espesifikamente kona-bá eletrisidade.

Eletrisidade iha Atauro ne’e loron ida lakan oras neen, eventu feira ne’e mak eletrisidade lakan oras 24. Tanba ne’e, nia dehan Governu liu hosi Eletrisidade De Timor Leste no mós liu hosi fundus espesiál dezenvolvementu atu fó solusaun ba probelma eletrisidade iha illa ida ne’e.

Jornalista: Vito Salvadór