Hatutan.com, (24 Novembru 2022), Ataúro- Primeiru-Ministru (PM), Taur Matan Ruak, Kinta (24/11/2022),  enxera ona Festival Múzika no Kultura Ataúro 2022.

Lee Mós : Abertura Festivál Múzika-Kultura, Ramos-Horta Fiar Ataúro Koñesidu iha Mundu

Primeiru-Ministru (PM), Taur Matan Ruak,  enxera ona Festival Múzika no Kultura Ataúro 2022, Kinta (24/11/2022). Foto/Vito Salvadór

Iha nia lia-menon, Taur Matan Ruak husu  Ataúro-oan mantein servisu hamutuk ho autoridade munisipál to’o suku no aldeia sira, hodi dezenvolve no esplora potensialidade ne’ebé munisípiu ne’e iha.

Iha  diskursu serimónia enserramentu Festival Múzika no Kultura Ataúro, Xefe Governu ne’e lori Prezidente Repúblika José Ramos-Horta nia naran hodi agradese ba administrador Munisípiu Ataúro, xefe suku sira, funsionáriu sira, lia-nain sira, veteranu sira, reprezentante konfisaun relijioza sira, organizasaun la’ós Governu nian no inan-aman, joven sira hotu  iha Ataúro.

Taur Matan Ruak agradese bá Ataúro-oan sira-nia badinas tanba bainaka sira hosi Dili no bainaka internasionál sira ne’ebé partisipa iha Festival Múzika no Kultura la hetan susar ruma.

 Primeiru-Ministru agradese mós bá komisaun organizadora, bá voluntáriu sira, no ema hotu ne’ebé direita no indiretamente fó kontribuisaun boot bá realizasaun Festival Múzika no Kultura bele akontese iha rai Ataúro ne’ebé foin nakfilak bá munisípiu.

“Laiha prezente ida diak liu ne’ebé Prezidente Repúblika fó bá Ataúro, Governu hasa’e estatutu Ataúro nian ba munisípiu, Prezidente Repúblika hili Ataúro para haksolok, harame ho Festival Múzika no Kultura, parabéns bá imi,”  Taur Matan Ruak hateten.

Aproveita oportunidade ne’e,  Xefe Governu hameno hela ba Ataúro oan sira atu tulun-malu, tulun xefe suku sira, lia-na’in, veteranu sira, no liliu administradór Munisípiu hodi hamoos tasi ibun sira.

Taur Matan Ruak promete  sei fila hikas ba Ataúro, uluk kedas hanesa Prezidente Repúblika vizita Ataúro durante semana rua hodi fó volta Ataúro maibé agora Ataúro oin-seluk tamba fo’er hahú domina Ataúro.

“Há’u triste loos, tamba Ataúro fo’er maka’as loos. Há’u lakohi bainhira fila fali mai Ataúro nafatin foer, tamba ne’e ferik, katuas, foin-sa’e hotu-hotu tenke ajuda administradór para hatudu buat ne’ebé iha imi nia laran no mós li’ur,  kaber, halo imi nia rai ne’e furak liu para dada ema barak liu mai tan vizita Ataúro,” Xefe Governu tenik.

Primeiru-Ministru hatutan Ataúro oan hotu tenke kompromete atu halo Ataúro sai munisípiu ida moos liu munisípiu 12 iha Timor Leste.

Ataúro iha tempu português sulan ema, iha tempu Indonézia mós nune’e Ataúro sai fatin kastigu tamba ne’e lakohi atu Ataúro sai kadeia, maibé tenke sai fatin ida bá ema atu kontente, no labele sai fatin ida atu kastigu ema.

Ikus liu, Xefe Governu husu atu partisipante sira ne’ebé mai hosi Munisípiu Díli no munisípiu sira seluk labele haluha Ataúro.

Iha oportunidade hanesan, Administradór Munisípiu Ataúro, Domingos Soares agradese bá konfiansa ne’ebé Prezidente Repúblika ho Primeiru-Ministru depozita bá povu Ataúro hodi realiza Festival Múzika no Kultual iha munisípiu Ataúro.

Nune’e mós koordenadór jerál Festival Múzika no Kultura Ataúro, Azevedo Marçal lori komisaun organizadora Festival Múzika no Kultura Ataúro nia naran hakarak agradese ba parte hotu-hotu,  bá liña ministeriál sira, bá entidade sira setór privadu nasionál no internasionál ne’ebé fó apoiu ba mobilizasaun no premiu sira durante kompetisaun ba modalidade desportu sira iha Festival Múzika no Kultura Ataúro.

“Hakarak agradese bá Prezidente Repúblika ho nia gabinete, bá Primeiru-Ministru no membru Governu sira, inklui ba prezidente konsellu ministru ne’ebé foin bá dahuluk realiza reuniaun Konsellu Ministru iha munisípiu no hili Ataúro hanesan munisípiu dahuluk,” Azevedo Marçal hateten.

Xefe Gabinete Primeiru-Ministru ne’e  agradese mós bá média nasionál no internasionál hosi Indonézia ne’ebé fó kontribuisaun hodi halo kobertura, atu mundu tomak bele hatene Festival Múzika no Kultura Ataúro.

Durante Festiva Múzika no Kultura Ataúro, komisaun organizadora realiza kompetisaun desportivas sira hodi harame festival ne’e no iha modalidade sira mak hanesan Kurida Bero, Nani taru ka natasaun, Kurida Bisikleta, Halai taru, Sae foho, Lee poezia, múzika kore-metan no ikus liu mak kompetisaun tein hahan tradisionál (kulinária) ne’ebé kompete hosi suku lima iha Munisípiu Ataúro hanesan Bikeli, Makili, Makadade, Beloi no Villa Maumeta.

Jornalista: Vito Salvadór