Hatutan.com, (25 Novembru 2022), Díli—Prezidente Tribunál Rekursu (PTR), Deolindo do Santos husu ba advogadu inan-faluk, Verônica Barreto Xavier ne’ebé hasoru problema justisa, atu aprezenta rekursu.

Prezidente Tribunál Rekursu (PTR), Deolindo dos Santos. Foto/Hatutan.com.

Deolindo dos Santos husu ne’e hafoin enkontru semanál ho Prezidente Repúblika (PR), José Ramos-Horta iha Palásiu Prezidensiál, Díli, Sesta (25/11/2022).

Lee Mós: Tribunál Hasai Hosi Uma, Inan-Faluk Verônica “Halerik” ba Xanana

“Juiz sira nunka bele pronunsia bainhira kazu ne’e sei iha prosesu nia laran. Ne’e hanesan regra mak bandu. Maibé, bainhira sidadaun sira konsidera desizaun ne’e la justu, sira bele uza rekursu hodi halo prosesu ne’e ba oin. Normalmente asisténsia legál, defensór públiku no advogadu sira bele halo ida-ne’e,” Deolindo dos Santos husu.

Advertisement

Prezidente Tribunál Rekursu ne’e esplika, juiz sira iha Tribunál hala’o servisu ho independente hodi defende direitu sidadaun hotu-hotu tuir lei, bainhira sidadaun ida sente sai vítima no la aseita ho desizaun ruma bele koopera ho advogadu aprezenta pozisaun liu hosi rekursu nu’udár dalan úniku.

Antes ne’e Tribunál Distritál Díli liu hosi despaixu ho NUC:0245/15.CVTDD-A haruka ba autoridade Suku Kamea no familia sira atu bele kolabora ho desizaun (Acção de Despejo) Tribunál Distritál Díli.

Pedidu ka karta ofisiál ne’e aprezenta hosi autór Alexandre dos Santos ho konteúdu husu bá inan-faluk Verónica Barreto ho nia família, atu kolabora ho autoridade judisiál tanba iha Sesta (11/11/2022) tuku 09:00 dader otl, TDD konjunta ho membru PNTL, tenke tun bá halo eviksaun ka hasai obrigatóriu ema ho sasán sira hosi sira-nia uma-hela-fatin.  

Ho situasaun ida ne’e maka, inan-faluk, Verônica Barreto Xavier iha Kinta (24/11/2022), hakat to’o rezidénsia lider istóriku, Kay Rala Xanana Gusmão iha Lecidere hodi hato’o ninia halerik kona-bá problema rai ne’ebé nia hasoru.

Iha Xanana nia oin, inan-faluk ne’e lamenta tebes no konsidera desizaun Tribunál Distritál Díli la justu, tanba tuir istória nia duni mak sai na’in loloos ba rai ne’ebé hahú okupa no hela kedan desde tinan 1985, maibé Tribunal afavor ba Alexandre dos Santos nu’udár autór ne’ebé tenta “hadau” rai no uma.

Advertisement

Rai ho medida 1.500m2 ne’e vítima hahú okupa no hela iha tinan 1985 no rai ne’e rasik entrega direta hosi nia aman haki’ak, “RT-Beremau” (matebian) nu’udár rai-na’in no populasaun no viziñu aldeia Bedois, Suku Kamea, sai sasin moris ba rai no uma ne’e iha tempu naruk.

Rona tiha preokupasaun ne’e iha loron ne’e duni líder nasionál Kay Rala Xanana Gusmão ba to’o duni inan-faluk ne’e nia hela fatin iha aldeia Bedois, Suku Kamea, Postu Administrativu, Kristu Rei no orienta kedan advogadu Miguel Faria atu halibur hikas dadus komprovativu sira hodi hato’o rekursu.

Lee Mós: Kronolojia Tribunál Hasai Inan-Faluk Verónica Hosi Uma Camea

Jornalista: Rogério Pereira Cárceres

Advertisement