crossorigin="anonymous">
Connect with us
Pakote Ahi

Ekonomia

Kompañia Stevedore Lima Haruka Karta Aberta Bá PM Taur

Published

on

Hatutan.com, (25 Novembru 2022), Díli-Empreza ka kompañia  stevedore (perusahaan bongkar muat) lima iha Portu Díli konsidera sira sai vítima bá mundasa portu Dili bá Tibar. Tanba ne’e, sira halo karta aberta ona bá Primeiru-Ministru (PM), Taur Matan Ruak, atu bele halo intervensaun no buka solusaun.

Kompañia estevidore sira-nia ekipamentu ne’ebé uluk hala’o servisu iha Portu Díli, agora labele hala’o servisu iha Portu Tibar. Foto/Elio dos Santos da Costa

Durante tinan naruk nian laran kompañia stevedore  lima halo estevedoring (bongkar muat) iha Portu Díli, mak hanesan, kompañia Ariana Oceano Agency, kompañia TLS, Kompañia Bed Hoven, kompañia Bikeli ho Kompañia MSI.

Kompañia hirak-ne’e mak fasilita ekipamentu hanesan forklift no absorve forsa traballu Timoroan hodi hatún no hasai sasán sira hosi ró laran sai mai rai-maran iha arredores Portu Díli nian.  Maibé, atividade ne’e, sira la bele halo ona hodi oin bá oin, tanba kondisaun iha Portu Tibar la uza ona kompañia ne’e nia ekipamentu inklui sira-nia traballadór timoroan sira.  

Iha loron hirak liubá Primeiru-Ministru (PM) Taur Matan Ruak, fó duni resposta hodi enkamiña empreza sira-nia “susar” ka “halerik” ne’e bá Ministru Transporte no Komunikasaun (MTK), José Agostinho da Silva, atu buka solusaun. Infelizmente, empreza Stevedore   hirak ne’e hein besik fulan ida ona, Ministru José Agostinho da Silva, seidauk fó resposta no seidauk bolu sira atu tuur hamutuk buka solusaun.

Advertisement
Monta Publisidade

Liuhosi konferénsia imprensa, Sesta (25/11/2022), iha Díli, na’in bá kompañia Ariana Oceano Agency, Constâncio Xavier Guterres, difikuldade ne’ebé kompañia stevedore lima enfrenta, hato’o ona karta “aberta” ida bá Primeiru-Ministru (PM), Taur Matan Ruak, hodi toma pozisaun ida bá sira-nia situasaun tanba sira  sente sai vítima tebes bá mudansa portu Dili bá Tibar no husu oinsá atu Xefe Governu bele buka solusaun ruma.

Primeiru-Ministru Taur Matan Ruak responde sira-nia karta ne’e hodi enkamiña  bá iha Ministru Transporte no Komunikasaun (MTK), José Agostinho da Silva, atu haree kestaun ne’e. Maibé, kompañia sira hein durante besik fulan ida ona, seidauk fó resposta ruma.

“Ami triste, tanba ami hein para depois bele konvida ami bá, depois hodi diskute uitoan, hodi hetan solusaun ruma, maibé laiha,” Constâncio Xavier Guterres kestiona.

Kompañia stevedore hirak-ne’e submete mós karta bá iha Prezidente Parlamentár Nasionál (PPN), Aniceto Longuinhos Guterres, inklui Prezidente Repúblika (PR), José Ramos-Horta, atu oinsá mak bele buka solusaun ruma.

“Ami hein to’o agora, semana tolu (3) liu tiha ona atu tama bá fulan-ida (1) ami la hetan konvite ida hosi Ministru José Agostinho da Silva, para bolu ami bá tuur hamutuk,” Constâncio haktuir.

Advertisement
Monta Publisidade

Konferénsia imprensa, na’in bá kompañia stevedore sira iha Díli, Sesta (25/11/2022). Foto/Elio dos Santos da Costa

Na’in bá kompañia Ariana Oceano Agency, Constâncio Xavier Guterres, dehan, sira-nia ezijénsia prinsipál hosi karta ne’ebé hato’o maka, husu Governu fó kompensasaun (ganti rugi), tanba traballadór barak ne’ebé durante sira emprega, seidauk selu, no sira-nia transporte sira ho forklift  mós labele ona utiliza bá servisu operasaun iha portu laran.

“Sé ami haruka traballadór timoroan  sira para servisu,  ami atu fó saida bá sira. Ami hatete bá sira, ami atu fó saida bá imi. Ami mós laiha rendimentu  ida. Ami husu tebetebes bá Governu, molok atu halo inaugurasaun bá Portu Tibar bele haree ami nia kondisaun,” Constâncio Xavier Guterres, hateten.

Iha fatin hanesan, reprezentante traballadór ne’ebé emprega hosi Kompañia Ariana Oceano Agency, Lourenço Manuel, sente triste ho sistema foun sira ne’ebé mak oras ne’e la’o iha Portu Tibar.

“Ha’u hanesan traballadór bá kompañia ida ne’e, ha’u triste, tanba ho sistema ida iha Portu Tibar la bele absorve ami atu servisu. Sé Governu nonook de’it, ami timoroan atu bá servisu iha ne’ebé,” nia hateten. 

Na’in bá kompañia Ariana Oceano Agency, Constâncio Xavier Guterres, afirma tan, ho desizaun Governu nian ne’ebé tuir planu iha loron 30 fulan-Novembru ne’e  ofisiálmente halo inaugurasaun bá Portu Tibar ne’e sei lori tristeza boot bá sira tanba  durante ne’e sira halo tiha investimentu hanesan transporte ho forklift sira ne’ebé sosa, la vale hotu ona, tanba iha Portu Tibar, buat hotu modernu.

“Transporte sira ne’ebé mak ami sosa, kontentór sira ne’ebé mak ami tau iha ne’e, depois kolega sira seluk ne’ebé mak iha transporte nian, sira uza sira-nia transporte, prontu halo mobilizasaun bá sasán sira ne’e, to’o agora, buat sira ne’e hotu, ami la uza. Sé ami la uza, agora ami atu bá ne’ebé. Portu Tibar la uza, ami atu bá ne’ebé. Tanba ida  ne’e, ami husu bá Governu para bele foti pozisaun ida bá ami, bele haree fali oinsá atu lori ami bá ne’ebé,” Constâncio Xavier Guterres afirma. 

Advertisement
Monta Publisidade

Constâncio Xavier Guterres, dehan, hanesan timoroan satisfeitu, tanba Timor-Leste iha ona Portu ida ne’ebé mak tuir padraun internasionál. Maibé, iha parte seluk, sira triste tebes tanba sira sai hanesan fali vítima bá investimentu ida ne’ebé mak agora iha.

Constâncio Xavier Guterres informa, ligadu bá problema ne’ebé ma koras ne’e sira hasoru, na’in bá kompañia Estividóre lima ne’e, konsege hapara traballadór lubun ne’ebé sira emprega bá, tanba kompañia sira ne’e mós la hetan ona fatin atu bá servisu.

Constâncio Xavier informa mós katak, oras daudaun sira-ninia transporte no forklift ne’ebé durante uza iha Portu Díli, labele tama tán ona bá Portu Tibar, tanba sistema sira hotu iha laran, parte kompañia Bollore ne’ebé jere mak responsabiliza hotu.

To’o notísia ne’e publika seidauk iha konfirmasaun ho Primeiru-Ministru Taur Matan no Ministru Transporte no Komunikasaun, José Agostinho da Silva, inklui Prezidente Parlamentu Nasionál (PPN, Aniceto Guterres ho Prezidente Repúblika (PR), José Ramos-Horta.

Jornalista: Rogério Pereira Cárceres

Advertisement
Monta Publisidade

 

Kontinua Le'e
Advertisement
Monta Publisidade
Hakarak Hato'o Komentariu?

Husik Hela Komentariu

Your email address will not be published. Required fields are marked *

Ekonomia

Governu Ezekuta Ona OJE 2023 Millaun $40 Inklui Viajen Lokál-Estranjeiru

Published

on

Hatutan.com, (30 Janeiru 2023), Díli—Governu ezekuta ona Orsamentu Jerál Estadu (OJE) tinan 2023 iha fulan Janeiru hamutuk millaun $40.

(more…)

Kontinua Le'e

Ekonomia

Impostu Seletivu Hodi Hasa’e Folin Masin-midár Lori Impaktu Negativu bá Indústria Ki’ik Sira

Published

on

Hatutan.com, (26 Janeiru 2023), Dili-Asociação Tane Consumidor konsidera impostu seletivu ne’ebé aplika hosi Ministériu Finansas (MF) hodi hasa’e folin masin-midár, fó impaktu ‘negativu’ maka’as liu bá indústria ki’ik sira.

(more…)

Kontinua Le'e

Ekonomia

KM Autoriza Ministru Rui Gomes Asina Akordu Subvensaun Públiku Millaun $37,5 Hosi JICA ba Projetu Aeroportu Comoro

Published

on

Hatutan.com, (25 Janeiru 2023), Díli—Konsellu Ministru (KM) liu hosi reuniaun iha Kuarta (25/01/2023) iha Palásiu Governu, autoriza Ministru Finansas, Rui Gomes hodi reprezenta Governu Timor-Leste asina Akordu Kontribuisaun Finanseira (Grant) ho montante millaun $37,5 hosi Ajénsia Kooperasaun Internasionál Japaun (JICA, sigla Inglés).

(more…)

Kontinua Le'e

Trending