Hatutan.com, (30 Novembru 2022), Díli—CEO Bolloré Port, Philippe Labonne husu ba públiku atu labele halo komparasaun entre Portu Tiba ho Portu Díli.

CEO Bolloré Port, Philippe Labonne hasoru-malu ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Kuarta (30/11/2022).

Philippe Labonne  husu ne’e tanba portu Tibar hanesan portu modernu ho sistema operasaun ne’ebé modernu duni nune’e ninia kustu ka presu operasaun karun tanba presiza iha retornu ba investimentu ne’ebé empreza halo.

Lee Mós: Kompañia Stevedore Lima Haruka Karta Aberta Bá PM Taur

Prosedur no sistema servisu iha portu Tibar, empreza uza sistema elektróniku hotu, iha ne’ebé operasaun portu ne’e lao ho transparente no sistema ne’ebé mak modernu tebe-tebes no sei fó benefísiu ba aban bainrua.

Advertisement

“Kona-bá presu ita labele haree ba komparasaun entre portu Tibar ho portu Díli tanba kondisaun la hanesan. Maibé, intensaun saida mak ita halo, ida-ne’e investimentu entre seitór privadu no públiku halo investimentu hamutuk kria fasilidade modernu ho padraun internasionál,” Philippe Labonne hateten hafoin hasoru-malu ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Kuarta (30/11/2022).

Parte Bolloré sei kria fasilidade ne’ebé atrai ba ró boot sira ne’ebé sei mai no sei kria kompetisaun, sei hatun presu selu ró nian, sei fó benefísiu ba populasaun Timor tomak iha aban bainrua no ida ne’e mak parseiru entre governu no seitór provadu nia planu ba futuru.

Presu ne’ebé sae iha portu Tibar la’ós tanba atendimentu ne’ebé di’ak maibé tanba portu Tibar iha hela investimentu nia laran.

Ko’alia kona-bá investimentu presiza recover fila-fali ka foti fila fali osan ne’ebé hodi halo investimentu, nune’e tenke iha kustu ba ida-ne’e no empreza hanoin ona atu buka kompetitór ne’ebé makas atu bele hatun presu aluga ró nune’e bele hatun kustu ba buat seluk ne’ebé sei lori impaktu pozitivu ba Timor tomak.

Kona-bá krítika hosi empreza sira no estevedores sira relasiona ho kustu taxa ne’ebé karun, CEO ne’e dehan, tuir loloos sira labele hetan krítika, maibé presiza apoiu-malu tanba bainhira de’it iha buat foun ruma sempre iha kritika maibé nia implikasaun pozitivu labele haree agora maibé sei bele hetan iha futuru.

Advertisement

“Husu mós públiku liuliu empreza importadór no esportadór inklui estevidór sira atu fó espasu to’o tinan ida hodi haree nia progresu, tanba fiar katak sei fó benefísiu ba Timor laran tomak,” nia tenik.

Iha sorumutu ne’e,  empreza Bolloré Port agradese ba Prezidente Repúblika ba konfiansa ne’ebé Estadu no governu Timor Leste fó ba empreza Bolloré Port no portu ida ne’e sei sai portu ida importante ba Timor Leste.

Portu ne’e mós sei fasilita ró sira ne’ebé sei mai hodi hatun presu ba selu ró sira ne’ebé atu tama mai tanba oras ne’e daudaun ró kiik sira mak tama, maibé aban bainrua ró boot sei tama tanba portu ne’e bele fasilita kontentór to’o 700. Ida-ne’e sei bele fó benefísiu ba ekonomia Timor Leste iha futuru.

Prezidente Repúblika satisfas ho investimentu ne’ebé empreza Bolloré halo iha portu Tibar no husu atu mellora di’ak liután servisu balun.

“Xefe Estadu mós husu atu Bolloré bele haree oinsa kria kondisaun atu bele iha fatin manutensaun ba ró sira iha futuru,” nia hateten.

Advertisement

Empreza hanoin katak, parte rua iha hanoin hanesan atu iha futuru bele iha fatin adisionál hodi fasilita halo manutensaun ba ró sira tanba ida ne’e mós sei lori benefisiu ba Timor Leste.

Jornalista : Vito Salvadór