Hatutan.com, (29 Novembru 2022), Díli- Prezidente Repúblika (PR), José Ramos-Horta, Tersa loraik  (29/11/2022), ofisiálmente inaugura no lansa Galeria Memória Viva iha Rezidénsia Eis-Titular, Farol, Díli.

Lee Mós : Ramos-Horta Husu Joven Sira Estuda ho Dixíplina

Ramos-Horta hatudu hela foto istoriku balun bá Governadór Nusa Tenggara Timur (NTT)-Indonézia, Viktor Bungtilu Laiskodat iha lansamentu Galeria Memória Viva, Tersa (29/11/2022). Foto/Elio dos Santos da Costa

Galeria Memória Viva sai hanesan fatin akumulativu ida atu halibur estudante no ai-leba sira ne’ebé buka fatin mahon atu aprende no estuda hodi hatene kona-bá istória luta Timor-Leste to’o Independénsia.

Foto arkivu sira ne’ebé enfeita ka orna iha  uma Galeria Memória Viva foti hosi prosesu luta bá ukun rasik aan dezde inísiu 1975 to’o mai 1999. Hodi refleta kona-bá Frente tolu nia memoria luta, kompostu hosi Frente Armada, Frente Diplomátika ho Frente Klandestina.  

Ramos-Horta hateten, Galeria Memória Viva hanesan pesoál no la’ós buat ida ofisiál, maibé ne’e hanesan kontribuisaun pesoál ba istória Timor-Leste nian.

Galeria Memória Viva ne’e sei aprezenta de’it istória visual tamba kuaze testu laiha, iha de’it mak fotografia no vídeo rasik de’it mós laiha.

Ramos-Horta rekoñese katak Galeria ida-ne’e mós la halo tuir planu akadémika ruma ka planu polítika ruma ne’ebé iha, maibé ne’e hanesan improvizasaun pesoál ne’ebé iha hodi halo dokumentasaun kona-bá luta Timor-Leste nian.

“Ita hatene katak ita-nia luta ne’e iha parte tolu importante mak luta klandestina, armada no luta diplomátika iha  internasionál, no luta tolu ne’e tenke reprezentadu lolós iha Galeria ida-ne’e,” Xefe Estadu hateten.

Iha luta Frente Diplomátiku, Ramos-Horta mak hanesan ema ida ne’ebé nomeia hosi Xefe Estadu Maior FALINTIL, Kay Rala Xanana Gusmão, hodi sai ibun, tilun no liman-ain povu terus na’in  Timor-Leste iha luta diplomasia iha diáspora.

Ramos-Horta rasik hateten, Galeria Memória Viva ne’e la’ós buat ida kompletu tamba fatin kloot hela. Maske ho kondisaun ne’ebé natoon, Galeria Memória Viva nakloke ba públiku, estudante no se-se de’it bele mai, bá ain-tanan sira, ai-leba sira bele bá tuur iha resintu Galeria nian hodi aprende, haree fotografia no bele mós aproveita tempu hodi estuda atu hakro’at liután koñesimentu kona-bá istória Timor-Leste nian.

“Ba estudante sira, ne’ebé laiha fatin atu estuda bele mai iha ne’e, sei iha kadeira, meza no intranet atu sira bele estuda. Iha galeria ne’e sei laiha livru atu konsulta, maibé bele bá hakle’an konsulta sira iha Muzeu Rezisténsia no iha biblioteka sira seluk ka iha sentru áudio vizuál Max Stahl ne’ebé sei kompleta ho vídeo,” Ramos-Horta hateten.

Ramos-Horta hatudu hela foto memória luta Timor-Leste nian bá bainaka sira iha Galeria Memória Viva, Tersa (29/11/2022). Foto/Elio dos Santos da Costa

Iha Galeria Memória Viva, estudante no vizitante sira laiha formalidade, tur avontade, no sei hetan mós kafe no nú-been tuir nesesidade ne’ebé iha.

Galeria Memória Viva, Prezidente Repúblika José Ramos-Horta halo ho osan eis titulár, no laiha ajuda externa ruma mai hosi Governu tamba Xefe Estadu rasik la husu.

Galeria Memória Viva ne’e mós iha espasu bá mídia Nasionál no Internasionál sira hodi tau mos galeria ne’ebé dedika espesiál ho servisu jornalista nian.

Marka prezensa iha serimónia inaugurasaun Galeria Memória Viva ne’e, Primeiru-Ministru Taur Matan Ruak, Prezidente Parlamentu Nasionál Aniceto Longuinhos Guterres, Governadór Nusa Tenggara Timur (NTT)-Indonézia, Viktor Bungtilu Laiskodat, membru Governu, membru parlamentu nasionál, korpu diplomata no mós setór privadu no parseiru dezenvolvimentu sira ne’ebé iha Timor-Leste.

Jornalista: Vito Salvadór