Hatutan.com, (01 Dezembru 2022), Díli—Polísia Nasionál Timor-Leste (PNTL), liuhosi Komandante Jerál, Komisáriu Polísia Faustino da Costa, fó ona orientasaun bá membru sira iha munisípiu 13 ho Rejiaun Administrativa Espesiál Oecusse Ambeno (RAEOA), atu halo operasaun tama no sai loja ho kióske sira, hodi kontrola sidadaun ne’ebé fa’an fugetes ilegál.

Membru Polísia Nasionál Timor Leste (PNTL) hosi Bataliaun Orden Publika (BOP) organiza formatura jerál hodi hala’o patrullamentu konjunta iha Dili, Sesta (09/09/2022). Foto/Elio dos Santos da Costa.

Orientasaun ida-ne’e, Komisáriu Faustino fó-sai relasiona ho selebrasaun loron boot Natál nian ne’ebé besik daudaun ona iha 25 dezembru tinan ne’e, inklui tinan foun 01 janeiru 2023.

Lee Mós: UPF Halo Apreensaun ba Sigaru Pakote 373, Suspeitu Halai Lakon

“Orientasaun komandu nian la’o ona bá komandu munisípiu sira, liu-liu kontrola bá iha parte entrada sira. Mais komandu mós orienta ona, tenke halo revista bá kios no loja sira ne’ebé kontinua fa’an sasán hirak ne’e,” Komisáriu Polisia Faustino da Costa hateten hafoin fó pose bá Ofisiál Superiór na’in-haat, iha Kuartél Jerál Caicoli, Kinta (01/12/2022).

Operasaun kona-bá fugete sira ne’ebé fa’an ilegál, durante ne’e mós hala’o tiha ona no iha buat rua mak membru PNTL sira detekta.

Ida konsege hetan sasán restu balun ne’ebé iha tinan uluk nian, la konsege uza, kaptura ona balun no halo ona prosesu.

“Iha fronteira, buat foun lubuk ida mak tama, liu-liu fugetes, ita kaer no detein inklui  prosesa ona sasán sira ne’e,” Komisáriu Faustino informa.

Jornalista: Rogério Pereira Cárceres