Hatutan.com, (03 Dezembru 2022), Díli-Organizasaun Rezistência Nasional dos Estudantes de Timor-Leste (RENETIL), durante loron rua, hahú hosi loron 02 to’o loron 03 fulan-Dezembru 2022, hala’o sira-nia kongresu bá dala-ualu hodi hili sira-nia estrutura.

Lee Mós : RENETIL, Organizasaun Tranzversál Sai Ezemplu bá Unidade Nasionál

Sekretáriu Jerál RENETIL Períodu 2022-2026, Joaquim Fonseca “Russuo”. Foto/Elio dos Santos da Costa

Iha kongresu ne’e ba loron daruak nian, Sábadu (03/12/2022), kongresista sira aprezenta pakote hamutuk tolu (3), atu asume estrutura ezekutivu  RENETIL nian bá períodu 2022-2026.

Pakote A, kompostu hosi José AMX “Siak”, nu’udár Sekretáriu Jerál, Antónino Delimas “Maukuit”, hanesan Primeiru Vise Sekretáriu Jerál, no Ana Guterres “Indira”, nu’udár segundu Vise Sekretáriu jerál.

Kandidatu sira hosi Pakote B nian kompostu hosi Joaquim Fonseca “Russuo”, Sekretáriu Jerál, Metodio Caetano Moniz “Lalatak”, nu’udár primeiru Vise Sekretáriu Jerál, no Glenda Inamori, hanesan Segunda vise Sekretáriu Jerál.

Pakote C, kompostu hosi Eusébio Guterres “Hakim”, kandidata aan hanesan Sekretáriu Jerál, Francisco Borja da Costa Soares, nu’udár primeiru vise Sekretáriu jerál, no Ade Nuak dos Santos Dias Ximenes “Lux”, hanesan Segundu Vise Sekretáriu jerál.

Liuhosi  eleisaun kongresu RENETIL nian ne’e, kongresista sira hili kandidatu sira hosi Pakote A, hetan totál votu 121. Kandidatu sira hosi Pakote B, ho totál votu 199, no kandidatu sira hosi Pakote C, ho totál votu 72.  Nune’e, kandidatu sira hosi Pakote B nian mak hetan barak liu.

“Bazeia bá pakote sira ne’ebé kongresista sira aprezenta, hatudu katak, iha pakote B mak kualifikadu nu’udár  elejivel ka vensedór bá iha prosesu eleisaun ida-ne’e nian,” Prezidente Komisaun bá Eleisaun iha Kongresu RENETIL, Sergio Hornai, deklara rezultadu eleisaun.

Kongresista sira ne’ebé  vota hamutuk 402. Hosi númeru ne’e, votu 5 mak Nulu, no votu rua mak Branku.

Kompromisu Sira

Kongresu RENETIL bá Da-Ualu iha CCD, Díli. Foto/Elio dos Santos da Costa

Molok hakat bá eleisaun, iha kampaña, Joaquim  Fonseca “Russuo”, kompromete katak, sei fortaleza sekretariadu RENETIL nian, inklui kontinua avansa ho programa sira ne’ebé mak antes ne’e iha ona.   

Joaquim “Russuo” ne’ebé re-eleitu ona tán bá Sekretáriu jerál RENETIL ne’e dehan, sé karik tinan haat hotuk ne’e, pandemia COVID-19 laiha, mak buat hothotu la’o di’ak, nia laiha mehi atu sai kandidata aan tán bá sekretáriu jerál.

Russuo fó razaun katak, iha tempu ne’ebá mak, nia sei toba dukur liu, mehi di’ak liu, tanba nia hatene katak, RENETIL iha kondisaun di’ak atu kontinua bá oin.

“Saida mak ami sei halo iha tinan haat mai oin, Fortaleza Sekretariadu, sistema balu ne’ebé mak ami koko atu instala iha tinan haat liubá, balu ne’ebé mak sei funsiona di’ak, ami kontinua sei halo metin, halo di’ak liután, sira ne’ebé la funsiona, hasai, halo polítika ne’ebé di’ak liután,” Sekretáriu jerál re-eleitu, Joaquim Fonseca “Russuo”, hateten durante halo kampaña bá eleisaun kuadru másimu RENETIL nian  iha ámbitu kongresu RENETIL nian dala-8 iha CDD, Caicoli, Díli.

Iha biban ne’e, “Russuo” kompromete mós katak, ho ninia re-eleitu ida ne’e, sei kontínua atu hametin organizasaun ne’e nia ezisténsia bá futuru, tanba kongresu ida ne’e rasik ko’alia mós kona-bá ida ne’e.

Estrutura foun ida ne’e, sei kontinua fó atendimentu bá membru sira  RENETIL nian, liu-liu rejista ema iha baze dadus. Tanba molok ne’e mós, estrutura  anterior verifika, análize no depois konsege prodús sertifikadu bá membru sira hamutuk ema-361, ne’ebé partisipa ona iha kongresu ida ne’e, no ida programa ida ne’e sei kontinua.

Estrutura foun ne’ebé re-eleitu ne’e, koko, espalla informasaun di’ak liután bá membru sira hotu, atu ema bele bá foti formuláriu hirak ne’ebé prodús iha sekretariadu, depois bele prienxe, no bele haruka fila-fali bá sekretariadu RENETIL.

Rezultadu eleisaun bá estrutura ezekutivu RENETIL períodu 2022-2026. Foto/Elio dos Santos da Costa

“Só bazeia bá ida ne’e mak, ita foin bele hatene membru RENETIL loloos ne’e hira. Agora, ha’u de’it, uluk hanesan sekretáriu rejiaun, la’ós adiviña, mais informasaun ida ne’e mai hosi asaun ida DPU ne’e, ema hira mak afiliasaun, 2800 itál. Mais membru RENETIL loos ita la hatene. Entaun, baze de dadus ne’e funsaun ida mak atu verifika loloos, membru RENETIL ne’e hira,” Joaquim “Russuo” hateten.

Baze dadus ka dadus membru sira verifika, bele ajuda diresaun atu apoia di’ak liután membru sira, iha situasaun ne’ebé sira presiza apoiu, inklui, iha situasaun ne’ebé sira tenke liga ho asuntu sira veteranu nian.

“Ida ne’e, durante ida ne’e, ita haree katak, util tebetebes, tanba kompañeiru sira, dala-ruma presiza surat ruma, kuandu ita husu dehan, naran iha baze de dadus iha ka lae, ooh loos, ha’u hatama formuláriu ona, entaun, loos ona, aban ka bainrua, bá foti surat iha sede, tanba sistema ita tau ona iha fatin para atu atende ida ne’e,”  Russuo haktuir.

Programa seluk maka, estrutura re-eleitu ho mandatu 2022 to’o 2026 ne’e, sei revitaliza departamentu bá estudu estratéjiku, no espera katak, to’o tinan-haat, CESTIL ne’e bele hamriik ona, tanba CESTIL mak bele fó kbiit boot liután bá organizasaun, atu bele halo segunda pontu ne’ebé mak ohin ko’alia, maka atu kontribui bá hametin estadu.

Atu hametin estadu ho saida, Russuo dehan, hametin estadu liuhosi halo komentáriu bá polítika estadu nian. Halo imput bá polítika estadu, ho lei sira ne’e. tanba ida ne’e maka sira tenke foka iha tinan-haat mai ne’e, atu nune’e, organizasaun ko’alia, ema labele dehan RENETIL ne’e arbiru de’it. Tanba RENETIL ko’alia bazeia bá dadus, bazeia bá análize, no bazeia bá peskiza.

Kona-bá estatutu kombatente nian, Russuo dehan, asuntu ida ne’e, buat ne’ebé mak ema dala-ruma ko’alia ne’e fasil, maibé atu halo, tenke muda lei, no diresaun sira nian ida ne’e mós, komprometidu, atu serbisu ho estadu, para muda lei ne’e  hodi bele fó rekoñesimentu ne’ebé apropriadu bá ema sira ne’ebé mak lori funu bá inimigu nia dapur.

Joaquim Russuo dehan, RENETIL lalika hein to’o situasaun ne’ebé perfeitu. Sé membru sira iha organizasaun ne’e sólidu, sei bele muda.

Hatán kona-bá krítika hirak mak hato’o hosi nia kompañeiru sira durante iha kongresu ne’e, Joaquim “Russuo“ tenta halo reflesaun badak ida hodi konta katak, iha tempu ida, ema ida konversa ho nia, hodi lansa krítika hasoru Primeiru-Ministru Timor-Leste nian, iha altura ne’ebá, José Alexandre “Kay Rala Xanana” Gusmão, katak, primeiru ministru halo programa arbiru de’it, ida ne’e laloos, no oioin de’it.

“Ha’u rona-rona, to’o pontu ida, ha’u la aguenta ona, ha’u hatete, husu bá nia, señor, sé ita-boot maka iha ha’u nia primeiru ministru nia fatin, ita-boot sei halo saida? Nia para uitoan, depois nia dehan, ha’u labele hatete, tanba ha’u nunka sai primeiru ministru. Ha’u dehan, loloos kedas ida ne’e, ó la hatene,” Joaquim Fonseca “Russuo” hateten.

Lee Mós : RENETIL “Hakas-an” Tulun Estadu Iha Dezenvolvimentu Nasionál

Jornalista: Rogério Pereira Cárceres