Connect with us
Pakote Ahi

Nasionál

Timor-Leste Hato’o Sentidu Pêsames Bá Falesimentu Jill Jolliffe

Published

on

Hatutan.com, (03 Dezembru 2022), Díli- Prezidente Repúblika (PR), José Ramos-Horta hateten, Timor-Leste lakon nia belun boot jornalista no ativista Jill Jolliffe ne’ebé iha tempu naruk nia laran kontribui bá luta ukun rasik an.

Lee Mós : TL Lakon Belun Jill Jolliffe Ne’ebé Grava Memória Luta bá Ukun Rasik-Aan

Saudaoza Jill Jolliffe. Foto/Espesiál

Prezidente Repúblika, José Ramos-Horta koñese di’ak loos Jill Jolliffe, ne’ebé mai Timor-Leste iha 1974 hola parte iha sindikatu traballadór ne’ebé mai iha Timor.

Hafoin liu tiha tinan sira nia laran (1975), Jill Jolliffe servisu hanesan jornalista iha Ajensia Notisioza Britániku Reuters no jornál oin-oin, no hela iha Portugál iha tinan rua nulu ka liu.

Advertisement

“Ha’u sempre akompaña nia servisu, ko’alia ho nia, ha’u vizita nia iha Melbourne tinan ruma liubá kuandu nia tama tiha ona fatin bá ferik no katuas sira ne’ebé moras, kuandu nia iha ospitál,” José Ramos-Horta haktuir bá Jornalista sira iha Ótel Novo Turizmu, Sábadu (03/12/2022).

Jill Jolliff ema ida ne’ebé dedikadu tebes, nia is kotu ne’e hanesan buat ida ne’ebé hatene tiha ona iha fulan balun bá kotuk tamba nia moras boot no labele ona atu ko’alia no koñese ema sira ne’ebé vizita nia.

“Ita Timor-Leste lakon ema di’ak ida, ativista boot ne’ebé kontribui maka’as bá Timor-Leste nia luta ba ukun an,” Xefe Estadu Timor-Leste hateten.

Governu, Parlamentu Nasionál, sosiedade sivíl no jornalista sira hotu no kada instituisaun tenke halo votu de pesar bá Jill Jolliffe nia falesimentu nu’udár onra ida bá Jill Jolliffe nia dedikasaun no servisu bá Timor nia indepedénsia.

Governu Hato’o Profunda Pêsames Kondolénsia Bá Jill Jolliffe Nia Família

Advertisement

 Primeiru-Ministru, Taur Matan Ruak, konsidera  Jill Jolliffe nia falesimentu ne’e hanesan novidade triste: Timor-Leste lakon nia belun di’ak, Jill Jolliffe, jornalista  no ativista Australiana, ne’ebé  durante ita-nia luta bá ukun rasik an, fó apoiu maka’as  mai ita nia prosesu auto determinasaun.

“Profunda  pêsames condolências  ba Saudoza Jill Jollliffe nia famílias. Paz a sua Alma!,” sita hodi pájina Fecebook Primeiro-Ministro: S.E. Taur Matan Ruak.

RENETIL Hato’o Solidariedade

Antigu Primeiru-Ministru, Rui Maria de Araújo. Foto/Elio dos Santos da Costa

Hosi sorin seluk, Resistência Nasionál dos Estudantes de Timor-Leste (RENETIL), solidariza falesimentu jornalista no ativista Jill Jolliffe ne’ebé durante tempu rezisténsia kontribui maka’as bá luta libertasaun Timor Leste nian.

Prezidente bá meza kongresu nasionál RENETIL bá da-ualu, Rui Maria de Araújo hateten, Jill Jolliffe hanesan jornalista ida ne’ebé kuaze iha nia karreira tomak dedika bá Timor-Leste.

Hahú kedas husi 1974-1975, Jill Jolliffe hahú ona halo reportajen kona-bá Timor-Leste no ema hotu hatene katak razaun ida ne’ebé Indonézia aprezenta bá governu Portugés bainhira planeia atu haruka delegasaun parlamentár portuguesa atu mai vizita iha 1990-1991, governu português propoin mós naran jornalista ida mak Jill Jolliffe maibé Indonézia rekuza no rejeita Jill Jolliffe atu mai iha Timor-Leste, no ho ida ne’e mak kansela tiha vizita delegasaun portugés no konsekuénsia sira ne’e mak akontesimentu masakre Santa Cruz, 12 Novembru 1991.

Advertisement

“Jill Jolliffe jornalista ida ne’ebé ativu tebes-tebes, inklui mós hakerek livru balun kona-bá Timor-Leste, nia iha mós ligasaun espesiál ida ho eis prizioneiru polítiku sira no nia rekolla dadus barak tebe-tebes kona-bá akontesimentu sira Timor-Leste nian bá luta bá libertasaun nasionál,” Rui Maria de Araújo  hatete hodi responde Hatutan.com iha CCD.

Antigu Primeiru-Ministru ne’e hatutan pesoalmente hanesan eis Xefe Governu hatene no koñese di’ak jornalista Jill Jolliffe, sente lakon boot ida. Iha tinan sanulu ikus ne’e, Jill Jolliffe nia saúde hahú detereoriza ka hahú tun, nune’e dezde tinan 2015 uainhira sei asume kargu hanesan Primeiru-Ministru tenta ona  apoiu tuir kbiit ne’ebé Governu no Estadu iha, atu nune’e nia bele hala’o nia vida.

Militante RENETIL ne’e afirma nia laiha serteza kona-bá jornalista Jill Jolliffe kondekoradu ona husi estadu Timor -este ka seidauk, maibé Jill Jolliffe nia servisu bá Timor la’ós de’it hanesan jornalista maibé mós nu’udár ativista ida ne’ebé luta maka’as mós bá Timor-Leste nia luta ba ukun rasik an.

“Jill Jolliffe merese atu povu Timor-Leste hatudu domin no respeitu, tamba sira nia kontribuisaun marka diferensa iha oinsá prosesu lori Timor-Leste nia kauza no objetivu bá independénsia atu fahe maka’as liután ba iha mundu laran tomak,” Rui Araújo haktuir.

Virgílio Guterres “Lamukan”. Foto/Elio dos Santos da Costa

Iha parte seluk, militante RENETIL, Virgílio Guterres “Lamukan” hateten povu Timor lakon nia belun di’ak ida, bun luta na’in ida ne’ebé ho naran Jill Jolliffe.

Virgílio Guterres hateten, Jill Jolliffe dezde nia sei klosan hanesan ativista nia solidariza ona ho luta povu Timor-Leste iha  1974-1975, no hanesan ativista Jill Jolliffe koñese lider sira uluk hanesan Borja da Costa, Nicolau Lobato no tamba Jill Jolliffe maka sai fonte bá kanselamentu vizita delegasaun Portugál nian mai Timor ne’ebé ikus mai provoka manifestasaun 12 Novembru 1991.

Advertisement

“Hanesan militante RENETIL lamenta tebes ho nia lakon, mais tamba nia moras kleur ona, ami hakarak hato’o kondolénsia profunda bá Jill Jolliffe nia mate, nia família no povu doben Timor-Leste,” Virgílio Guterres “Lamukan” hateten.

RENETIL sei halo rezolusaun ida perante kongresu bá dala-ualu ne’e atu hato’o votu de pesar bá Jill Jolliffe nia falesimentu atu onra no lembra Jill Jolliffe nia luta no apoiu bá povu Timor-Leste.

Jornalista: Vito Salvadór

 

 

Advertisement

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Nasionál

JSMP Ezije Altera Artigu 1475 Kodigu Sivíl Tanba Halo Diskriminasaun Relijioza

Published

on

Hatutan.com, (29 Fevereiru 2024), Díli– Programa Monitorizasaun Sistema Judisiáriu (JSMP, sigla Ingles) kontinua halo advokasia bá alterasaun artigu 1475 Kódigu Sivíl tanba konsidera hamosu diskriminasaun bá relijioza sira ne’ebé la’ós Katólika.

(more…)

Kontinua Le'e

Nasionál

Governu Aloka Millaun $12 bá Komisaun Altu Nivel Institusionál bá Vizita Papa Francisco

Published

on

Hatutan.com, (28 Fevereiru 2024), Díli- Governu liuhosi reuniaun Konsellu Ministru, Kuarta (28/02/2024),  delibera atu autoriza despeza to’o millaun $12 hosi fundu kontinjénsia bá Komisaun Altu Nivel Institusionál bá vizita Sua Santidade Papa Francisco.

(more…)

Kontinua Le'e

Nasionál

SEKOMS Halo Plájiu, Hamoe Instituisaun Estadu

Published

on

Hatutan.com, (28 Fevereiru 2024), Díli–Asia Justice and Right (AJAR)  konsidera atitude  plájiu  Sekretária Estadu Komunikasaun Sosiál (SEKOMS) hodi kopia konteúdu livru planu estratéjiku Konsellu Imprensa  (CI, sigla portugés) Timor-Leste  2022-2026 nu’udár aktu krime plagiatu no hamoe instituisaun Estadu.

(more…)

Kontinua Le'e
Advertisement

Trending