Hatutan.com, (04 Dezembru 2022), Díli-Daudaun ne’e, ema balun   espalla iha media sosiál Facebook ho narrativa ne’ebé hateten, Prezidente Repúblika (PR), José Ramos-Horta, kontra ka rejeita atu promulga proposta inisiál hosi Governu ne’ebé atu fó direitu saláriu désimu terseiru (gaji ke-13) bá funsionáriu sira ho tipu kontratu termu sertu no mós bá sira ne’ebé saláriu liuhosi $500.

Narrativa informasaun HOAX ne’ebé partilla iha Media Sosiál Facebook.

Iha narrativa ne’ebé espalla iha Facebook ne’e haktuir mós katak antes ne’e iha loron 9 fulan-Novembru 2022, Governu liuhosi sorumutuk Konsellu Ministru aprova ona proposta inisiál ne’ebé iha mak hanesan ho proposta tinan-tinan. Maibé, bainhira submete bá  iha Gabinete Prezidénsia Repúblika (GPR), Prezidente Republika, Jose Ramos-Horta husu atu hasai traballadór-sira ho kontratu termu sertu no hirak ne’ebé saláriu liuhosi $500.

Sita iha narrativa Facebook ne’e haktuir tan, iha Sesta-feira, 02 fulan-Dezembru 2022 liubá Konsellu Ministru  obrigadu tenke revè fila-fali. Iha reuniaun ne’e, haktuir mós katak, Ministru Finansas rasik mak defende katak pelo menus traballadór-sira ho rendimentu ki’ik $500 simu nafatin.

Ho desizaun Prezidente Republika, Jose Ramos-Horta  ne’e, bá tinan-ne’e funsiunariu hotu ne’ebé ho salariu liuhosi $500 sei la simu saláriu désimu terseiru hanesan tinan sira liubá, maske Governu esforsu ona atu fó, maibé Prezidente Republika deside hodi la Promulga Dekretu Lei bá Salariu Désimu Terseiru ne’ebé aprezenta hosi Governu.

Advertisement

Iha pájina Facebook refere dehan, ho desizaun Prezidente Republika nian ne’e bá tinan-ne’e funsiunariu hotu ne’ebé asumi kargu hanesan Diretór Nasional, Diretór Jeral no funsiunariu hotu ne’ebé salariu liuhosi $500 sei la simu hotu salariu Désimu Terseiru ka gaji ke-13.

Fontes importante iha Palásiu Prezidensiál ne’ebé rejeita atu publika nia identidade haktuir bá Hatutan.com, Domingu (04/12/2022), liuhosi mensajen WhatsApp hateten, saláriu désimu terseiru ne’e direitu traballadór hotu-hotu nian ne’ebé prevalese iha kódigu laborál no saláriu ne’e direitu arkeridu ba kontratu traballu normal.

Fontes ne’e hateten, to’o oras ida ne’e, Prezidente Repúblika, José Ramos-Horta, seidauk hola disaun veta Dekretu  Lei hosi Governu kona-bá saláriu désimu terseiru ka gaji ke-13.

Narrativa informasuan HOAX espalla iha Facebook

“Prezidente Repúblika nunka veta ka nunka la konkorda ho saláriu désimu terseiru ne’e. informasaun ne’ebé espalla iha Facebook katak Prezidente Repúblika veta saláriu désimu terseiru bá funsionáriu sira ne’ebé saláriu liu $500 kada fulan ne’e propaganda no HOAX,” fontes hosi Palásiu Prezidensiál ne’e informa.

Iha proposta ida hosi Governu submete mai Prezidente Repúblika, maibé Prezidente Repúblika  haruka fila bá Governu haree fila-fali polítika ne’e ho konsiderasaun justu ho poupansa ka lae? liuliu bá sira ne’ebé saláriu boot hanesan titulares sira bele simu saláriu désimu terseiru ka gaji ke-13?

“Maibe ne’e depende desizaun polítika Governo nian. Prezidente Repúblika husu bazeia ba polítika “justo” ho política poupansa. Presidente Repúblika  lá veta saláriu désimu terseiru ka gaji-13. Ne’e propaganda bosok, lohi povo sira no HOAX,” fontes ne’e afirma tan.

Advertisement

Artigu 44.º Subsídiu Anuál 1. Traballadór iha direitu hodi hetan subsídiu anuál hosi valór la ki’ik liu fali saláriu mensál 1, ne’ebé empregadór tenke selu to’o loron 20 Dezembru ba anu sivíl idaidak. 2. Kálkulu ba subsídiu anuál nu’udar proposionál ba fulan sira servisu nian ne’ebé halo ba tinan sivíl idaidak.

Jornalista : Vito Salvadór