Connect with us
Pakote Ahi

Dili

Simu Subsídiu $200, Komunidade Agradese bá Estadu ho Governu

Published

on

Hatutan.com, (08 Dezembru 2022), Díli- Komunidade Suku Kampung Alor ho Suku Bemori,  Munisípiu Díli, hato’o sira-nia agradesimentu bá Estadu ho Governu tanba fahe ona osan $200 bá sira liuhosi programa subsídiu “Fim do Ano”.  

Lee Mós : Komunidade Comoro-Camea Simu Subsídiu $200

Komunidade benefisiariu sira simu subsídiu “fim do ano” $200. Foto/Elio dos Santos da Costa

Iha loron 08 fulan-Dezembru ne’e, komunidade benefisiáriu sira hosi Suku Kampung Alor ho Suku Bemori, lori sira-nia fixa família ho entuziazmu tuur hein rona sira-nia naran hodi hakat bá simu sira-nia direitu ne’ebé prevalese iha Dekretu-Lei Númeru   82/2022, 11 Novembru.

Bá hirak ne’ebé rendimentu kada fulan liu $500, idaidak ho konsiénsia hakat bá sede suku hodi prienxe formuláriu rejeita simu subsídiu “fim do ano”    tuir mandamentu iha Dekretu-Lei refere.

Advertisement

Xefe suku Bemori, Cristalina Pereira Soares,  hateten prosesu pagamentu iha nia suku la’o di’ak no komunidade sira kumpri oráriu hodi mai forma ho pasensia atu simu sira nia direitu.

“Iha Suku Bemori, komunidade sira kolabora di’ak tebes. Hirak ne’ebé ho rendimentu mensal liu $500 mai hato’o sira-nia deklarasaun hodi rejeita ka lakoi simu subsídiu ne’ebé iha tuir Dekretu-Lei númeru 82/2022,” Xefe Suku Bemori Cristalina Pereira Soares bá Hatutan.com iha Sede Suku Bemori.

Hahú inísiu pagamentu subsídiu “fim do ano” iha suku Bemori hetan supervizaun hosi Komisaun Anti Korrupsaun (CAC, sigla portugés) hodi garante transparénsia iha prosesu pagamentu no garante fundu ne’e fó duni bá alvu benefisiáriu ne’ebé prevalese iha Dekretu-Lei númeru 82/2022.

Abitante Aldeia Sentrál, Suku Bemori, Francisco do Carmo Pereira, sira kontente no agradese tebes bá Governu tanba bele ajuda sira iha situasaun ida difisil hahú kedas ho programa Cesta Bázika faze dahuluk to’o faze daruak no kontinua ho pagamentu subsídiu “fim do ano” $200 ne’e.

Xefe Suku Bemori, Cristalina Pereira Soares. Foto/Elio dos Santos da Costa

“Há’u simu tiha ona subsídiu $200 no há’u nia osan ne’e sei fó bá ferik-oan atu sosa buat ne’ebé ami presiza iha uma-laran,” Francisco do Carmo Pereira hateten.

Suku Bemori kompostu husi Aldeia hitu (7) mak hanesan Aldeia Baba Liurai Leste, Baba Liurai Oeste, Ailele Hun, Bemori Central, Sentru, Has-Laran no My Friend.

Advertisement

Total fixa família ka uma-kain ne’ebé simu subsídiu iha Suku Bemori família uma-kain 1.107 no orsamentu ne’ebé suku halo levantamentu iha Banco Nasionál Comércio Timor Leste (BNCT) hamutuk $ 221,400.00.

Xefe Suku Kampung Alor, Alcina Carvalho dos Santos, reprezenta komunidade Kampung alor nia naran hato’o agradesimentu bá Estadu no Governu ne’ebé iha planu no polítika di’ak hodi atribui  subsídiu “fim do ano” ho montante $200 bá kada uma-kain ho rendimentu ki’ik no vulneravel iha sosiedade iha fulan-Dezembru nia laran.

Nia afirma iha suku Kampung Alor rasik too oras ne’e seidauk rejista dezintendimentu grave ruma maske iha komunidade ida rua mak ladun intende ho sistema nune’e sira halo reklamasaun balun ,maibé hanesan autiridade lokal rezolve ona no buat hotu lao di’ak.

“Ha’u nia suku ne’e desde simu osan iha loron dahuluk to’o to’o agora laiha dezintendimebtu ruma tamba komunidade sira kolabora ho di’ak hodi forma no priense deklarasaun sira ne’ebé prepara molok simu sira nia direitu,” Xefe Suku Kampung Alor ne’e tenik.

Prosesu pagamentu subsídiu “fim do ano” iha Suku Kampung Alor hetan  supervizaun hosi CAC ho Provedor Direitu Humanos no Jusitsa (PDHJ).

Advertisement

Xefe Suku Kampung Alor, Alcina Carvalho dos Santos. Foto/Elio dos Santos da Costa

Iha supervizaun ne’e, autoridade sira hanesan CAC no PDHJ halo observasaun direita ba prosesu pagamentu no halo mos supervizaun direita bá deklarasaun sira ne’ebé xefe  família sira priense hodi garante katak laiha falsifikasaun no indísiu ruma  kontra Dekretu-Lei númeru 82/2022.

Autoridade ne’e mós husu atu autoridade seguransa liliu Polísia Nasionál Timor-Leste (PNTL), tenke apoiu hodi asegura prosesu pagamentu subsídiu $200 bá komunidade sira tamba tuir nia uluk iha tempu Covid-19 polísia sira mai apoiu Ofisial Polísia Suku (OPS) maibé iha pagamentu subsídiu “fim do ano” ne’e PNTL rasik la mobiliza seguransa hodi apoiu OPS no situasaun ne’e lori risku tamba osan ne’ebé bá tau iha sede suku ne’e osan Estadu no ho montante ne’ebé boot.

Suku Kampung Alor kompostu husi aldeia  tolu (3), maka hanesan Aldeia Anin Fuik, Hamahon no Rai Lakan.

Total uma-kain ne’ebé simu subsídiu “fim do ano” hamutuk 1.322 no orsamentu ne’ebé sei seluk hamutuk $264, 400. 00.

Jornalista : Vito Salvadór

 

Advertisement

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Dili

Konfrontu iha Betó, Uma Ida Rahun no Ajente Polísia Ida Kanek Gráve

Published

on

Hatutan.com, (25 Marsu 2024), Díli-Kazu konfrontu entre membru grupu arte-marsiál iha Beto Leste, Suku Madohi, Postu Administrativu Dom Aleixo, Munisípiu Díli, Sábadu kalan  (23/03/2024), rezulta uma ida rahun no ajente polísia ida kanek gráve.

(more…)

Kontinua Le'e

Dili

Polísia Kaptura Suspeitu Na’in-6 iha Konfrontu Mascarenhas

Published

on

Hatutan.com, (20 Marsu 2024), Díli-Polísia Nasionál Timor-Leste (PNTL), Kuarta (20/03/2024), hale’u tuku 15:30 Otl, kaptura suspeitu na’in-neen (6) ne’ebé envolve iha kazu konfrontu entre juventude bairu Mascarenhas ho Quintál-Boot, Munisípiu Díli.

(more…)

Kontinua Le'e

Dili

Timoroan Barak Seidauk iha Konsiénsia Soe Lixu iha Lixeira

Published

on

Hatutan.com, (18 Marsu 2024), Díli-Reprezentante povu iha Parlamentu Nasionál (PN) konsidera timoroan barak iha Timor-Leste seidauk iha konsiénsia soe lixu iha leixaira ka fatin soe lixu nian.

(more…)

Kontinua Le'e
Advertisement

Trending