Hatutan.com, (09 Dezembru 2022), Díli- Comissão Anti Corrupção (CAC) seidauk hetan infrasaun administrativu no kriminalidade relasiona ho prosesu pagamentu subsídiu “fim do ano” $200 ne’ebé governu hahú lansa iha Munisípiu Díli.

Lee Mós : Simu Subsídiu $200, Komunidade Agradese bá Estadu ho Governu

Komunidade Suku Comoro simu subsidiu $200, Tersa (06/12/2022). Foto/Elio dos Santos da Costa.

Komisáriu CAC, Sérgio Hornai hateten, CAC no mós instituisaun sira seluk hanesan Provedoria Direitu Umanu no Justisa (PDHJ), sosiedade sivíl em-jerál, inkluíndu media komunikasaun sosiál hotu-hotu espera katak atribuisaun subsídiu $200 bá benefisiáriu sira komesa hahú dadauk no presija hotu-hotu kolabora nafatin ho sekretariadu tékniku ne’ebé responsabiliza bá iha distribuisaun subsídiu “fim do ano” hanesan Ministériu Solidariedade Sosiál no Inkluzaun (MSSI) ho nia estrutura sira tomak atu bele halo interpretasaun ho lolos no tebes dunik bá iha Dekretu-Lei ne’ebé define tiha ona hosi governu atu distribui subsídiu ne’e ba iha benefisiáriu alvu sira.

Nia afirma atu garante subsídiu $200 la’o ho susesu, dalan ida mak presiza iha giaun ida ne’ebé orienta sira no giaun ne’e rasik hanesan hotu-hotu hatene katak MSSI liuhosi Sekretáriu tékniku distribuisaun direitu subsídiu $200 estabelese ona hodi halo kontrolu no orienta servisu sira bá too iha autoridade lokal, hanesan xefe suku, atu nune’e, entre servisu sira ne’ebé dezeña tiha ona hosi governu liu hosi MSSI bele la’o iha konetividade no tuir tramitas sira ne’ebé lei permite.

“Ita hein katak subsídiu “fim do ano” ne’e sei fó ba iha sira ne’ebé elejível, prienxe formatu sira ne’ebé iha hanesan konsellu ne’ebé CAC halo. Ekipa CAC nian sei halo monitorizasaun nafatin, bele mai husi rede ne’ebé estabelese, bele mós mai husi média komunikasaun sosiál, no bele mós mai husu entidade sira ne’ebé iha relasionamentu tantu organizasaun juventude ka kamada sira ne’ebé sensivel ba kombate Kriminal korrupsaun,” Komisáriu CAC, Sérgio Hornai ba jornalista sira iha edifísiu Ministériu Finansas, Díli, Sesta (09/12/2022).

Nia hatutan uainhira simu informasaun hosi komunidade ka organizasaun ka instituisaun sira kona-bá indisu ruma ka pratika korrupsaun iha prosesu pagamentu subsídiu “fim do ano”, CAC sei dezenvolve informasaun sira ne’e para atu haree ida ne’ebé mak iha infrasaun administrativu no ida ne’ebé maka iha infrasaun kriminalidade.

Servisu balun ne’ebé CAC halo iha informasaun balun ne’ebé tama formalmente husi ekipa tékniku no koordenadór sira iha terrenu katak MSSI hanesan Ministériu responsavel ho ekipa Sekretariadu halo nafatin servisu liuliu desizaun sira bá iha pagamentu subsídiu “fim do ano” bá komunidade sira hahú hosi nasionál ba Munisípiu no too iha aldeia sira ne’ebé komunidade sira destaka.

“Ita seidauk iha relatóriu karik tama tamba loron hira ne’e há’u okupadu los maibé atu informa katak iha ha’u nia meza seidauk iha relatóriu ruma, maibé informasaun sira, notísia de krime sei mai hosi unidade informasaun no seguransa hamutuk ho diresaun prevensaun nian sei halo análiza atu haree rekomendasaun imediatu atu hato’o bá iha Sekretariadu tékniku ka governu para halo melloramentu ka iha medida seluk ne’ebé CAC tenke haree,” Nia subliña.

Governu hahú lansa ba públiku liuliu Munisípiu Díli, subsídiu “fim do ano” $200 bá komunidade sira iha loron 06 fulan-Dezembru 2022 no total uma-kain ka benefisiáriu iha territóriu Timor-Leste laran tomak hamutuk 339.954 .

Jornalista: Vito Salvadór