Hatutan.com, (10 Dezembru 2022), Díli—Forum emprezariál Timor-Leste ne’ebé organiza hosi Trade Invest TL hamutuk ho Kámara Komérsiu no Indústria Singapura (SCCCI), konsege atrai emprezáriu 100-resin hosi Singapura no Europa ne’ebé hakarak mai investe iha TL.

Forum emprezariál Timor-Leste ne’ebé organiza hosi Trade Invest TL hamutuk ho Kámara Komérsiu no Indústria Singapura (SCCCI), konsege atrai emprezáriu 100-resin hosi Singapura no Europa ne’ebé hakarak mai investe iha TL. Forum ne’e hala’o iha Singapura, Sesta (09/12/2022). Foto/Média PR.

Forum emprezariál Timor-Leste ne’e diskute oportunidade investimentu iha Timor-Leste hosi seitór privadu internasionál sira.

Lee Mós: Ramos-Horta Prefere TL Koopera ho Singapura Iha Área Intelijénsia Atu Kombate Krime Organizadu

Prezidente Repúblika (PR), José Ramos-Horta ne’ebé halo abertura ba forum emprezariál Timor-Leste ne’e konsidera katak forúm ida ne’e bo’ot no di’ak tebes.

Forúm investimentu ne’e sussesu bo’ot tanba investór atus ida resin mak partisipa, normalmente tuir ema balun dehan katak, investór interessadu sira mai partisipa ne’e, mai hosi rai seluk ne’ebé investe iha Singapura, iha aprezentasaun di’ák tebes hosi Timor-Leste, liu-liu Trade Singapura no Autoridade Nasionál Petroleum no Mineral (ANPM) inklui CCI-TL no reprezentante investidór ne’ebé investe ona iha Timor.

“Investidór sira tuir, haree no sira kontente tebes,” Hatutan.com sita deklarasaun Prezidente Repúblika José Ramos-Horta iha komuniadu, Sesta (09/12/2022).

Ramos-Horta konsidera forum ida-ne’e sai hanesan eforsu ida atu lori investidór sira ba halo investimentu barak liután iha Timor-Leste no bele kontribui mós ba adezaun Timor-Leste nian ba iha organizasaun rejionál ASEAN.

Xefe Estadu mós defende nesesidade hadi’a seitór judisiáriu, nune’e bele garante seguransa ba investimentu iha Timor-Leste.

Forum emprezariál Timor-Leste ne’ebé organiza hosi Trade Invest TL hamutuk ho Kámara Komérsiu no Indústria Singapura (SCCCI), konsege atrai emprezáriu 100-resin hosi Singapura no Europa ne’ebé hakarak mai investe iha TL. Forum ne’e hala’o iha Singapura, Sesta (09/12/2022). Foto/Média PR.

Durante aprezentasaun, Trade Invest introdúz kona-bá razaun Timor-Leste dada investidór no balansu durante tinan rua nulu nia laran.

Hafoin ida-ne’e, iha mós aprezentasaun hosi kompañia Internasionál ne’ebé investe ona iha Timor-Leste hanesan Bolloré, East Timor Trade, Timor Plaza inklui CCI-TL.

Aprezentasaun ikus liu mai hosi Autoriedade Nasionál Pretróleo no Minirais (ANPM) hodi esplika kona-bá prossesu investimentu iha Greater Sun Rise ne’ebé daudaun ne’e iha ona akordu atu dada mai Timor-Leste.

Hafoin forum emprezariál, Prezidente Repúblika hamutuk delegasaun kontinua vizita projetu Newater, nu’udár projetu transformasaun bee foer bá bee konsumu.

“Singapura halo resiklajem ba bee hosi dapur, haris fatin, udan been. Ne’e hotu sira aproveita halo nia resiklazen atu sai bee konsumu ba ema hotu. Ne’e teknolojia ida komplikadu tebes inklui karun. Ha’u la fiar ita bele halo, maibé ita bá atu haree no ne’e hatudu lideransa Singapura nian, lideransa ne’ebé sempre buka solusaun ruma ba dezafu ne’ebé Singapura no mundu enfrenta. Ne’e duni ita buka halo relasaun metin liu tán,  nune’e bele halo kapasitasaun ba funsionáriu hotu hodi garante adiministrasaun públika iha Timor,” Ramos-Horta esplika.

Ba Xefe Estadu, Singapura rai kiik ne’ebé avansadu ona iha infrastrutura, konservasaun bee no ambiente relasiona ho akesimentu globál.

Jornalista: Vito Salvadór