Hatutan.com, (14 Dezembru 2022), Díli–Enkarregadu Negósiu Estadus Unidus iha Timor-Leste, Tom Daley, hamutuk ho reprezentante hosi Ministériu Edukasaun, Prezidente Autoridade Munisípiu Baucau, Xefe Suku Bahú, Komandante Komponente Terrestre Baucau, no Komandante Enjeñaria F-FDTL, Kuarta (14/12/2022),  ofisiálmente  inaugura eskola primária nia klase foun tolu iha Baucau ne’ebé konstrui hosi EUA nia Naval Seabees no Mariña  sira.

Enkarregadu Negósiu Estadus Unidus iha Timor-Leste, Tom Daley hamutuk ho autoridade sivil no militár Munisípiu Baucau, inaugura sala eskola ne’ebé konstrui hosi Forsa Mariña EUA iha Baucau. Foto/Espsiál

Fasilidade foun ne’e sei fó benefisia bá estudante hamutuk 90 no projetu ida ne’e ho valór $250,000. Estadus Unidus nia Naval Seabees no Marina hamutuk 25 harii eskola refere durante fulan haat nia laran, ho apoia hosi FALINTIL-Forsa Defeza Timor-Leste (F-FDTL) nia enjineria  na’in hitu. Projetu ne’e nu’udar projetu bá dala-105 ne’ebé konstrui ka reabilitadu hosi Seabess dezde tinan 2009. 

“Eskola ida ne’e sai nu’udar testemuña ba saida mak ita-nia parseria no kooperasaun hamutuk bele atinje hodi buka dezenvolvimentu bá Timor-Leste nia lideransa sira iha future,” dehan Enkarregadu Tom Daley ne’ebé Hatutan.com sita hosi komunikadu imprensa.

 “Mane no Feto sira ne’ebé dedika ona bá ami nia Forsa Naval EUA Seabeees serbisu maka’as iha projetu ne’e, hodi tau sira nia laran no neon durante hala’o serbisu iha fulan lima nia laran ikus ne’e. Ba estudante sira, ha’u enkoraja imi atu estuda no serbisu maka’as ba imi nia an rasik, ba imi nia família, no ba imi nia komunidade. Ita nia future depende ba imi nia susesu.”   

Advertisement

Estadus Unidus nia Naval Seabees konstrui ka reabilita ona klínika no eskola hamutuk 100 resin iha Timor-Leste nia laran hodi tulun harii future ne’ebé di’ak liu ba Timoroan sira. Ho espíritu amizade, Seabees kompleta ona projetu ho valór millaun $50 resin iha tinan 13 nia laran. Sira kontinua ho sira ninia prezensa iha Timor-Leste dezde tinan 2009, rotasaun grupu enjineria militár Amerikanu kada fulan neen.

Jornalista : Luciana Verdial