Hatutan.com, (21 Dezembru 2022), Díli—Reuniaun Konsellu Ministru (KM) iha Kuarta 21 dezembru 2022, aprova ona projetu Dekretu-Lei númeru 10/2017, kona-bá estatutu Defensoria Públika.

Ministru Justisa (MJ), Tiágo Amarál Sarmento. Foto/Elio dos Santos da Costa.

Projetu Dekretu-Lei ne’e aprezenta hosi Ministru Justisa (MJ), Tiago Amaral Sarmento, hodi halo alterasaun dahuluk bá Dekretu-Lei nu. 10/2017, loron 29 fulan-marsu, Estatutu Defensoria Públika nian.

Lee Mós: MJ Esforsu Muda Estatutu Defensoria Públika Bá Autonomu Finanseiru

“Objetivu hosi diploma ida-ne’e, atu promove atualizasaun no reforma Estatutu Defensoria Públika nian, hodi adapta ho realidade atuál seitór justisa nian. Liu-liu relasiona ho direitu asesu ba justisa no Tribunál sira hosi sidadaun sira hotu, hodi presta direitu ho loloos,” Hatutan.com, sita komunikadu.

Advertisement

Relasiona ho estrutura organizativa Defensória Públika nian, destaka entre mudansa prinsipál ne’ebé propoin hela, kriasaun figura Defensór Públiku Jerál Adjuntu, ne’ebé tulun Defensór Públiku Jerál, no substitui iha ninia impedimentu no auzénsia sira; alterasaun regra nomeasaun ba Defensór Públiku Jerál, ne’ebé kabe bá Primeiru-Ministru; no alterasaun kompozisaun Konsellu Superiór Defensória Públiku nian, hodi halo Konsellu ne’e  autónomu, dinámiku no funsionál liután, nune’e mós definisaun ne’ebé di’ak-liu bá Defensória Munisipál nian sira.

Devér Defensór Públiku sira nian mós sei haluan, iha tempu hanesan konsagra garantia no prerogativa foun no define ho loloos importánsia ba sira nia misaun bazeia ba promosaun asesu ba justisa, liuhosi mekanizmu protesaun no informasaun jurídika.

Iha ámbitu ho protesaun jurídika, determina ninia modalidade sira no ámbitu aplikasaun no simplifíka regra prosedimentál sira ba aprezentasaun, apresiasaun no desizaun kona-ba pedidu protesaun jurídika nian, ne’ebé submete hosi sidadaun sira.

Haluan mós  importánsia kona-bá konsulta no esklaresimentu jurídiku ne’ebé Defensória Públika  maka tenke garante,  liuhosi ninia Gabinete sira, no estabelese mós kriasaun hosi klínika sira hodi asesu ba justisa.

Antes ne’e Ministru Justisa (MJ) Tiago Amaral Sarmento hateten durante mandate sei halo esforsu hotu nune’e Defensoria Publiku (DP) bele hetan ninia estatutu nu’udár instituisaun autónomu Finanseiru, no la tutela ba Ministériu Justisa ne’ebé hatodan orsamentu Ministériu Justisa nian.

Advertisement

Razaun halo esforsu atu Defensoria Publiku bele sai Institusaun autonomu ida tanba Lei Organizasaun Judisiária Tama ona Vigór ne’e ejize buat barak ona.

Razaun daruak maka, DP ne’e ninia natureza loloos autonomu nanis kedan tuir K-RDTL maibé tanba Governu foin hahú iha tempu ne’ebá ne’e mak halo nune’e DP iha MJ nia okos.

Ida ne’e halo orsamentu kada tinan ba Diresaun Jerál Serbisu Notariadu, Diresaun Jerál Terras no Propriedade inklui Departementu sira seluk menus tebes.

Jornalista: Rogério Pereira Cárceres

Advertisement