Hatutan.com, (22 Dezembru 2022), Díli—Projetu PFMO-C2 “OSAN POVU NIAN, JERE HO DI’AK” sei oferese formasaun ba órgaun polisiál Comissão Anti-Corrupção (CAC) iha área espesialidade investigasaun kriminál nian.

Enkontru entre Komisáriu CAC, Sérgio Hornai akompañaa hosi Estrutura Espesialista Anti-Korrupsaun (EAK) ho reprezentante Projetu PFMO-C2 “OSAN POVU NIAN, JERE HO DI’AK” Cristinha no Hugo Lourenço iha Salaun Sorumutu CAC Faról Díli, Kinta (22/12/2022). Foto/CAC.

Kona-bá impelemtasaun projetu ne’e, iha ona konkordánsia entre parte rua liu hosi enkontru Komisáriu CAC, Sérgio Hornai akompañaa hosi Estrutura Espesialista Anti-Korrupsaun (EAK) ho reprezentante Projetu PFMO-C2 “OSAN POVU NIAN, JERE HO DI’AK” Cristinha no Hugo Lourenço iha Salaun Sorumutu CAC Faról Díli, Kinta (22/12/2022).

Lee Mós: Projetu PFMO Sei Fó Asisténsia ba CAC iha Área Prevensaun Korrupsaun

Parte rua mós ko’alia kona-bá kontinuasaun kooperasaun entre instituisaun rua liuliu bá realizasaun formasaun ba espesialista anti-korrupsaun nian iha rai laran no mós iha rai li’ur.

“Parte rua konkorda-malu sei hala’o formasaun espesialidade iha área investigasaun krminál ninian.  Formasaun sira sei kobre asuntu, kriminalidade korrupsaun, kriminalidade ekonomia finanseira, inklui formasaun ba IT Analisis Software,” Hatutan.com sita komunikadu.

Finalidade hosi formasaun ida-ne’e atu bele hakro’at abilidade no koñesimentu órgaun polisiál espesializada CAC nian, hodi hametin prinsípiu boa-governasaun, liu hosi missaun investigasaun kriminál ninian iha Timor-Leste (TL).

Projetu PFMO-C2 “OSAN POVU NIAN, JERE HO DI’AK” halo ona kooperasaun servisu ho Comissão Anti-Corrupção ho instituisaun judisiária sira seluk, realiza ona formasaun sira seluk kona-bá asuntu jestaun finansas públika iha tinan 2021.

Jornalista: Elio dos Santos da Costa