Hatutan.com, (22 Dezembru 2022), Díli—Judicial System Monitoring Program (JSMP) rekomenda ba provedór eleitu Virgílio da Silva Guterres atu tau liu prioridade bá Promosaun Direitus Humanus no Governasaun di’ak.

Diretora JSMP, Ana Paula Marcal. Foto/Espesiál

“JSMP kongratula Provedór eleitu ne’ebé hetan konfiansa hosi Parlamentu Nasionál atu derije PDHJ. Nune’e, JSMP husu atu provedór tau prioporidade ba promove direitus umanus no Governasaun Di’ak iha Timor-Leste tuir kompenténsia ne’ebé Konstituisaun fó, hodi salvaguarda interese públiku no defende ita nia Lei Inan, ita nia Estadu Direitu Demokrátiku,” Hatutan.com sita deklarasaun Diretora Ezekutiva JSMP, Ana Paula Marçal iha komunikadu.

Lee Mós: Ramos-Horta Apresia no Fó Konfiansa Totál bá Virgílio Guterres Lidera PDHJ

JSMP mós rekomenda ba Provedór eleitu atu kumpri artigu 150 no 151 hosi KRDTL hodi efetivamente husu fiskalizasaun abstrata ho konstitusionalidade ba Supremu Tribunál Justisa, hodi halo verifikasaun konstitusionalidade ba omisaun hosi medida sira lejislativa ne’ebé durante ne’e sai kestaun públiku tanba la refleta interese povu nian.

Provedór eleitu mós tenke fó prioridade ba iha objetivu estratéjiku ne’ebé mak fixadu ba períodu tinan lima oin mai mak hanesan; asegura kapasidade no independénsia PDHJ hodi garante PDHJ bele implementa mandatu ho di’ak, asegura katak autoridade públika no komunidade iha koñesimentu di’ak kona-bá direitus umanus no Governasaun Di’ak.

Tenke garante katak, autoridade públika sira halo prevensaun no korresaun ba violasaun prinsípiu direitus umanus no governasaun di’ak, ikus maka ema vulnerável sira iha protesaun hasoru violasaun direitus umanus no bele hetan asesu ba atendimentu públiku ne’ebé di’ak.

JSMP hein katak, Provedór eleitu sei nakloke-an atu rona no konsidera hanoin hosi sosiedade sivíl relasiona ho kestaun direitu umanu sira ne’ebé durante ne’e sai preokupasaun komún nian.

Tuir informasaun hosi Parlamentu Nasionál informa katak ajenda Parlamentu Nasionál nian ba tomada de pose ba provedór eleitu hala’o iha 20 fulan Dezembru 2022 iha edifísiu Parlamentu Nasionál.

Iha 12 Dezembru 2022, Parlamentu Nasionál, liuhosi reuniaun Plenáriu, halo votasaun sekretu hodi hili Virgilio da Silva Guterres ba Provedór Direitus Umanus no Justisa (PDHJ) foun ba períodu tinan 2022-2026 ho votu afavór 34 kontra 29.

Virgílio da Silva Guterres halakon kandidatu sira mak hanesan Carmen Joela Pereira, Ivo Colimau Lay da Costa, Horacio de Almeida, Nelson Philomeno Rego de Jesus.

Jornalista: Vito Salvadór