Hatutan.com, (28 Dezembru 2022), Díli- Prezidente Repúblika (PR), José Ramos-Horta, simu ona informasaun balun hosi Darwin-Austrália relasiona ho kazu baku membru ida hosi delegasaun Vise-Ministru Negósiu Estranjeiru no Kooperasaun (Vise-MNEK), Julião da Silva, iha festa natal hamutuk ne’ebé organiza hosi komunidade Xina-timoroan, Sábadu kalan (24/12/2022), iha Darwin-Austrália.

Lee Mós : Membru Delegasaun Vise-MNEK Hetan Baku iha Festa Natal Komunidade Xina-Timoroan iha Darwin

Prezidente Repúblika (PR), José Ramos-Horta. Foto/Elio dos Santos da Costa

Festa ne’ebé hala’o iha Portuguese & Timorese Social Club iha Darwin-Austrália ne’e hakotu ho problema fíziku ne’ebé rezulta membru ida hosi delegasaun vizita traballu Vise-MNEK nian bá Austrália hetan kanek no tenke evakua bá halo tratamentu intensivu iha ospitál balun iha Darwin.  

Relasiona ho kazu ne’e,  Prezidente Repúblika José Ramos-Horta rasik simu ona informasaun hosi família balun ne’ebé deskonfia sai hanesan vítima bá indísiu “asédiu seksuál”. Ho nune’e, vítima “asédiu seksuál” nia maun sira halo asaun hodi baku membru ida hosi delegasaun Vise-MNEK nian ne’e.

Advertisement

“Ha’u simu ona informasaun no ne’e problema ida ne’ebé monu iha MNEK nia responsabilidade, ha’u sei hein simu relatóriu hosi MNEK haree loloos saida mak akontese,” Prezidente Repúblika José Ramos-Horta, haktuir bá jornalista sira iha Palásiu Prezidensiál, Díli, Kuarta (28/12/2022).

Xefe Estadu mós subliña katak uainhira faktu hatudu katak membru delegasaun Vise-Ministru Negósiu Estranjeiru no Kooperasaun ne’ebé bá Darwin halo dunik asédiu seksual tenke simu sansaun disiplinár hosi Ministériu relevante atu evita hahalok nune’e akontese iha futuru.

“Se faktu sira ne’e konfirma, primeiru ha’u hatete kedas medida disiplinár interna MNEK nian tenke halo. Tanba bainhira ita li’ur, ita reprezenta ita-nia Estadu, ita-nia nasaun ita tenke hatudu komportamentu ne’ebé di’ak liu,” Ramos-Horta afirma.

Xefe Estadu mós lakohi halo komentáriu liu, tamba seidauk haree relatóriu ne’e loloos. “Ha’u seidauk simu informasaun ruma formál husi MNEK ha’u hanoin ne’e prosesu internu ida sira nian.”

Sei Hein Investigasaun

Advertisement

Vise-Ministru Negósiu Estranjeiru no Kooperasaun (V-MNEK), Julião da Silva. Foto/Elio dos Santos da Costa

Vise-Ministru Negósiu Estranjeiru no Kooperasaun (V-MNEK), Julião da Silva, ne’ebé Hatutan.com konfirma Aeroportu Prezidente Nicolau Lobato,  hateten prosesu hotu sei hein investigasaun,

“Ita hein investigasaun lai, karik iha informasaun bá mak hato’o. Ita hein rezultadu investigasaun hosi ita-nia konsuladu jerál iha Darwin, ita hein rezultadu,” Vise Ministru Julião da Silva hateten.

Nia argumenta akontesimentu ne’e akontese tamba iha de’it “cek cok” no bainhira kazu ne’e boot sira parese sei la fila mai Timor-Leste maibé tamba labarik ki’ik lahatene situasaun balun tamba ne’e di’ak liu hein rezultadu investigasaun.

Husu kona-bá membru delegasaun ne’ebé hetan baku ne’e Vise-MNEK Julião nia alin rasik, Vise Ministru ne’e la responde no husu atu hein de’it rezultadu investigasaun.

Jornalista: Vito Salvadór

Advertisement