Hatutan.com, (22 Dezembru 2022), Díli—Tribunál Distritál Díli (TDD) deside ona hodi absolve totál kazu arguidu António da Conceição “Kalohan” tanba kríme sira ne’ebé imputa hosi Ministériu Públiku (MP) la prienxe elementu kríme, iha Kinta (22/12/2022).

Bainhira deskonfia envolve iha kazu ne’e, MP imputa krime tolu bá arguidu hanesan eis Ministru Komérsiu Indústria no Ambiente (MKIA) maka, krime partisipasaun ekonomia iha negósiu no krime administrasaun danoza no aplika de’it pena multa bá krime falsifikasaun no anotasaun téknika ne’ebé MP imputa no aplika pena multa.

Lee Mós: PN Hasai Imunidade Deputadu António “Kalohan”

Juiz prosesu bá kazu ne’e, Ivan Suritai halo leitura akordaun iha sala julgamentu katak, razaun Tribunál absolve arguidu António Conceição hosi krime partisipasaun ekonomia iha negésiu no krimi administrazasaun danoza tanba durante julgamentu, Tribunál haree katak, krime sira ne’ebé MP imputa, la priénxe elementu sira krime nian.

Tanba ne’e Tribunál absolve duni arguidu António Conceiçao “Kalohan” hosi krime partisipasaun ekonomia iha negósiu no krime administrazasaun danoza.

Juiz Ivan Suritai mós deklara absolve arguidu António da Costa nu’udár eis diretór jerál MKIA, hosi krime partisipasaun ekonómika iha negósiu, krime administrasaun danoza no krime falsifikasaun no anotasaun téknika inklui pena multa.

Krime sira ne’ebé imputa hosi MP bá arguidu António da Costa, Tribunál hare katak la komprovadu.

Alende ne’e Tribunál fundamenta razaun ba aplikasaun pena absolvisaun bá arguidu, tanba halo serbisu bazeia bá orientasaun hosi superiór la’ós bá ninia indivídu.

Absolvisaun mós akontese ba arguidu na’in-tolu seluk mak hanesan, Arguida Julmira Ináçia Belo ho Arguidu Gaspár Policarpo Correia, hosi krime Partisipasaun Ekonómika no krime administrasaun danoza. Arguidu Paul Manuel da Costa Soares Viana, Tribunál absolve hosi krime administrasaun danoza no krime burla argravadu.

Maski nune’e, Tribunál kontinua kondena hodi aplika fali krime falsifikasaun anotasaun téknika bá agruidu Paul Viana, tanba hafoin rona faktu sira iha julgamentu, Tribunál entende katak arguidu Paulo Viana, komete duni kazu falsifikasaun anotasaun téknika.

Tribunál Distritál Díli aplika mós pena multa bá António Conceição hodi kondena selu pena multa inklui arguidu na’in-haat seluk hanesan arguida Julmira Inácia Belo, Gaspár Policarpo Correia no Paulo da Costa Soares.

Tribunál fó prazu tempu bá arguida Arguida Julmira Ináçia Belo, Gaspár Policarpo Correia no António da Costa ho Paulo da Costa Soares Viana atu selu pena multa durante loron 120 nia laran ne’ebé kada loron, Arguida Julmira Ináçia Belo tenke selu multa ho $5, Arguidu Paulo Viana sei selu ho $7.50, Arguidu Gaspár Policarpo selu ho $7. Enkuantu arguidu António Conceição Tribunál aplika pena multa durante loron 180 no kada loron tenke selu $10.

Iha desizaun sira Triunál nian ne’e absolve mós arguidu sira hosi Pena Indemizasaun Sivíl ne’ebé molok ne’e MP alega husu Tribunál atu aplika pena indemizasaun sivil bá arguidu sira, tanba aktu hirak mak sira komete, hamosu prejuizu bá Estadu RDTL.

“Bainhira MP konsidera desizaun Tribunál Primeira Intánsia ne’e la adekuadu no la justu bele rekorre desizaun ne’e bá Tribunál Rekursu,” Ivan Suritai hateten.

Jornalista: Rogério Pereira Cárceres