Hatutan.com, (30 Dezembru 2022), Díli—Arguida ho inisiál MCS akompaña hosi nia defeza advogadu privadu José Guterres, Sesta (30/12/2022), hakat bá Tribunál Distritál Díli (TDD) hasoru malu ho Juiz Administradór Afonso Carmona.

Lee Mós : Kazu Instalasaun Set-Top Box RTTL,E.P, CAC Kontinua Rona Testemuña Atu Identifika Prezuizu bá Estadu

Comissão Anti Corrupção (CAC), liuhosi ekipa Medida Prevensaun no Kombate Korrupsaun, Kuarta, 12 fulan-Outubru 2022, hale’u tuku 10:08 halo buska no apreensaun inklui tau alzema (borgol) bá na’in empreza DILI ETERNAL INNOVATION INFORMATION, Lda, nu’udár sósiu hosi inisiál MCS, ne’ebé tempu ne’ebá asume knaar hanesan Sekretária iha Gabinete Prezidente Federasaun Futeból Timor Leste (FFTL), atuál Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo. Foto/Dok. Hatutan.com

Informasaun ne’ebé Hatutan.com asesu hosi fontes sira iha TDD ne’ebé lakohi atu publika sira-nia identidade hateten, prezensa  arguida MCS ho nia Defeza hasoru malu ho Juiz Administradór Afonso Carmona, atu husu TDD nia autorizasaun hodi halo pedidu bá Ministériu Públika (MP)   haree fila-fali evidénsia balun ne’ebé mak Komisaun Anti Korrupsaun (CAC, sigla portugés) halo ona apreensaun.

Na’in bá sósiu empreza DILI ETERNAL INNOVATION INFORMATION, Lda bá kazu  projetu instalasaun Set-top Box Rádiu Televizaun Timor Leste, Empreza Públiku (RTTL,E.P) konsidera katak evidénsia sira ka sasán  balu ne’ebé CAC halo apreensaun la’ós  evidensia krime. Tanba ne’e, arguida MCS ho nia defeza husu Tribuál nia despaixu atu foti fila -ali evidénsia hirak ne’ebé la inklui iha krime.

Tribunál haruka fila arguida MCS bá Ministériu Públika  tanba faktu no evidénsia hotu iha Ministeriu Públiku tanba prosesu kazu ne’e dadaun ne’e iha hela investigasaun laran.

Juiz Administradór TDD, Afonso Carmona, ne’ebé mak jornalista sira halo konfirmasaun rejeita atu fó  informasaun tanba prosesu ne’e sei iha segredu justisa.  

Molok ne’e, iha loron 12 fulan-Outubru 2022, CAC  liuhosi ekipa Medida Prevensaun no Kombate Korrupsaun, halo buska no apreensaun inklui tau alzema (borgol) bá arguida M nu’udár na’in ka sósiu empreza DILI ETERNAL INNOVATION INFORMATION, Lda, tanba deskonfia envolve iha projetu instalasaun Set-top Box RTTL,E.P ne’ebé lori prejuízu bá Estadu ho montante orsamentu $7,680.00.

Ekipa Medida Prevensaun no Kombate Korrupsaun CAC nian, iha parte dadeer destaka kedan hodi bá buka-tuir arguida MCS iha nia rezidénsia iha área Matadouro, Suku Vila Verde iha tuku 10:00 Otl, maibé na’in bá empreza ne’e iha hela servisu fatin sede FFTL Bairro dos Grilhos, Díli.

Ekipa ida hosi CAC deside bá direta iha sede FFTL, maibé bainhira ekipa ne’e to’o iha fatin iha tuku 10:08 Otl, la hetan ona na’in ba empreza ne’e tanba nia fila hikas ona bá nia uma.

Lee Mós : Kazu Instalasaun Set-Top Box RTTL,E.P, CAC Halo Buska no Apreensaun iha Gabinete MAPKOMS, FFTL ho Rezidénsia Likisá

Ekipa konjunta ne’e deside fila-fali ba rezidénsia Matadouro no iha ne’ebá ekipa ida hosi CAC hein hela iha ne’ebá.

Bainhira na’in bá empreza DILI ETERNAL INNOVATION INFORMATION, Lda to’o iha fatin, investigadór CAC nian ne’ebé lidera hela mandadu buska no apreensaun ne’e, halo introdusaun no esplikasaun kona-bá razaun sira-nia prezensa iha rezidénsia na’in ba empreza ne’e.

Hafoin halo esplikasaun, ekipa CAC diretamente tau alzema ka borgol na’in bá empreza ne’e, inklui  rekolla no halo apreensaun bá dokumentu sira ne’ebé iha,  inklui veíkulu ida ho marka Pajero Fortuner ho xapa matríkula A.28.832.

Ekipa CAC ne’e transporta kedan na’in bá empreza DILI ETERNAL INNOVATION INFORMATION, Lda bá iha nia servisu fatin FFTL, hodi rekolla no halo apreensaun ba dokumentu sira ne’ebé iha relasaun ho empreza ne’e.

Remata hosi FFTL, ekipa CAC nian kontinua transporta na’in ba empreza DILI ETERNAL INNOVATION INFORMATION, Lda ne’e bá edifísiu sentrál CAC nian hodi kumpre detensaun durante oras 72 nia laran.

Iha loron 15 fulan-Outubru 2022, Tribunál Distritál Díli (TDD),  hala’o prosessu primeiru interrogatóriu bá arguidu GDS ho arguida MCS ne’ebé deskonfia involve iha Kazu Instalasaun Set-Top Box Rádiu Televizaun Timor Leste Empreza Públika (RTTL,E.P).

 Arguidu nai’n-rua to’o iha Tribunál Distritál Díli iha tuku 9:00 dadeer ne’ebé hetan akompañamentu hosi investigadór sira Comissão Anti Corupção (CAC) ho borgól ka alzema iha liman.

Iha prosesu primeiru interrogatóriu ne’e, Ministériu Públiku (MP) liu hosi Prokuradór Matias Soares imputa krime Abuzu Podér, Brankeamentu Kapitais, Fraúde Fiskál, Partisipasaun  Ekonomia iha Negósiu no Konflitu ba Interese.

Lee Mós : Kazu Projetu Set-Top Box RTTL,E.P, Governu Sempre Prontu Koopera ho Instituisaun Judisiál

Jornalista : Rogério Pereira Cárceres