Hatutan.com, (30 Dezembru 2022), Díli—Orsamentu ne’ebé prevee bá Sekretáriu Estadu Juventude no Desportu (SEJD) hosi Orsamentu Jerál Estadu (OJE) tinan 2023 ho montante millaun $5.

Ekipa Atleta TL ne’ebé partisipa iha Olimpiade Xadrez Mundiál, iha Índia. Foto/Federasaun.

Hosi montante ne’e hatudu katak, iha redusaun makaas, tanba alokasaun OJE tinan 2022 ho montante millaun $9.

Lee Mós: To’o Marsu 2023 Laiha Liga Futeból, SEJD Foti Hikas Osan Ne’ebé Aloka Bá FFTL

Maski nune’e, Sekretáriu Estadu Juventude no Desportu (SEJD), Abrão Saldanha hateten, sei fó nafatin prioridade bá área desportivu no Juventude, maski iha tinan oin sei iha eleisaun Parlamentár.

“Tinan 2023 hanesan tinan polítika, tinan eleitorál ne’ebé sei iha eleisaun Parlamentár. Nune’e programa prioridade sira ne’ebé sei hala’o iha tinan 2023 mós redúz oitoan,” Abrão Saldanha hateten iha salaun CNE, Caicoli, Kinta (29/12/2022).

Iha área juventude, formasaun sira la’o nafatin no relasaun saudável atu evita joven sira monu iha risku isin rua sedu.

Atividade Parlamentu Foinsa’e, Formasaun Edukasaun Sívika no Formasaun skill development sira hanesan life skill, soft skill, career skill no employbility skill liu hosi sentru juventude sira no liu hosi organizasaun juventude sira.

“Atividade juvenil nian ita nafatin hala’o liu hosi promove joven pioneiru sira ne’ebé bele fó impaktu ba mudansa hanoin no inspira joven sira seluk atu bele mós iha mudansa ba sira nia moris lorloron nian,” nia hateten.

Iha área desportu prioritiza nafatin eventu nasionál sira no lokál sira inklui Kampionatu no liga sira kontinua eziste.

Maibé, iha tinan oin mós iha eventu internasionál lubuk ida nune’e asegura partisipasaun Timor-Leste nian iha jogu Sudeste Aziátiku hanesan Sea Games, Sea Para Games no Sammer Games ba espesiál olimpic, inklui eventu rejionál no internasionál ne’ebé tau ona iha planu.

“Iha nivel nasionál ita tau ona osan atu book iha eskola, agora daudaun ekipa iha hela munisípiu sira atu estabelese asosiasaun desportu eskolár, nune’e hahú book desportu hosi eskola sira. Tinan oin mós ita hahú book festival desportu munisipál nune’e iha tinan oin fali mai ita bele haree festivál desportu nasionál,” subliña.

Formasaun ba área sira desportu nian kontinua hala’o nafatin no iha fundus operasionál bá organizasaun desportiva sira, maibé sei reajusta modelu jestaun ne’ebé iha tuir orsamentu ne’ebé iha atu bele buka solusaun hamutuk ho federasaun sira hodi haree Estadu nia partisipasaun no saida mak federasaun sira nia partisipasaun.

“Tenke iha diskusaun atu parte rua ne’e bele parseria, tanba bolu naran parseiru entre Estadu liu hosi SEJD ho federasaun,” nia hateten tán.

SEJD sei haree atu hamutuk ho federasaun sira diskute kle’an programa sira atu bele fó apoiu operasionál.

Sekretáriu Estadu ne’e subliña maski orsamentu SEJD tinan 2023 tun hosi millaun $9 bá millaun $5 maibé atividade rutina sira la’o nafatin.

Jornalista: Vito Salvadór