Hatutan.com, (30 Dezembru 2022), Díli-Sekretáriu Estadu Juventude no Desportu (SEJD), Abrão Saldanha, hateten to’o fulan-Marsu 2023, Federasaun Futeból Timor Leste (FFTL)  ho Liga Futeból Timor-Leste (LFTL) la realiza liga futeból époka 2022-2023, SEJD sei foti hikas osan $200,000 ne’ebé transfere bá FFTL hodi devolve bá kofre Estadu.

Lee Mós : Liga Futeból Timorense Presiza Tán Fundu $416,516

SEJD Abrão Saldanha. Foto/Dok. SEJD

Sekretáriu Estadu Juventude no Desportu (SEJD), Abrão Saldanha bá jornalista sira iha salaun CNE, Kinta (29/12/2022), hateten akordu ida ne’ebé estabelese ho FFTL ho modelu plurianuál katak liga ne’e hahú iha fulan-Dezembru 2022 no sei remata iha fulan-Marsu 2023, entaun tuir kontratu ne’ebé SEJD iha ho FFTL sei remata iha fulan-Marsu 2023 no uainhira liga futeból Timor-Leste lala’o, osan ho montaten $200,000 ne’ebé transfere tiha ona bá konta FFTL sei foti hikas bá kofre Estadu tamba iha kontratu laran klaru.

SEJD halo tiha ona transferénsia osan $200,000 bá liga époka 2022-2023 bá iha konta bankária FFTL tamba bazeia bá pedidu ne’ebé iha hatudu, katak órgaun liga ho federasaun sira konkorda malu maka sira aprezenta pedidu mai no pedidu ne’e SEJD haree katak FFTL ho LFTL hamutuk elabora ne’e maka SEJD transfere ona osan bá.

“Agora ita hein sira atu organiza liga, se sira la organiza ona, Governu bele buka medida seluk, no iha fulan-Janeiru 2023 ha’u bele buka maneira seluk,” Abrão Saldanha hateten.

Governante ne’e argumenta katak uainhira FFTL no LFTL falla organiza liga époka 2022-2023, medida ne’ebé iha mak SEJD sei buka atu organiza liga, bele modelu hanesan liga Timorense ne’ebé iha ka bele mos modelu seluk.  Tamba ne’e, SEJD hein FFTL no LFTL nia servisu iha tinan oin bazeia bá akordu.

“Ita hein too kontratu prazu ne’e hatudu katak LFTL ho FFTL la konsege organiza liga, governu tenke halo intervensaun,” Abrão Saldanha tenik.

Lee Mós : Nilton Gusmão Submete Pedidu Rezignasaun Bá Asembleia Jerál LFTL

Jornalista : Vito Salvadór