Hatutan.com, (07 Janeiru 2023), Díli—Prezidente Repúblika, José Ramos-Horta, atribui medalla méritu ba Embaixadór Korea do súl iha Timor-Leste, Kim Jeong Ho nu’udar rekoñesimentu ba kontribuisaun ne’ebé diplomata ne’e halo durante hala’o misaun iha Timor-Leste (TL).

Prezidente Repúblika, José Ramos-Horta, atribui medalla méritu ba Embaixadór Korea do súl iha Timor-Leste, Kim Jeong Ho nu’udar rekoñesimentu ba kontribuisaun ne’ebé diplomata ne’e halo durante hala’o misaun iha Timor-Leste (TL), Sábadu (07/01/23). Foto/Média PR.

Atribuisaun medalla méritu ne’ebé Estadu Timor-Leste oferese atu kontinua fortifika relasaun bilaterál rai rua nian no liu-liu atu diplomata hirak ne’e nafatin lembra Timor-Leste iha sira nia servisu atu nafatin fó kontribuisaun ba relasaun di’ak país rua.

Lee Mós: Estadu TL Kondekora Embaixadór Xina ho Medalla Méritu

“Ha’u hahú kedan iha primeiru mandatu, tanba sira mai reprezenta sira-nia rain no sira ida-idak, hotu-hotu halo kompromísiu buka hametin relasaun ho Timor-Leste. Entaun kuandu sira fila, ne’e buat ida Timor-Leste bele halo nu’udar Estadu, nu’udar Governu halo kondekorasaun ba sira-nia servisu no sira sei lembra sempre ida-ne’e,” Ramos-Horta heteten iha komunikadu Sábadu (07/01/23).

Advertisement

Xefe Estadu hatutan, diplomata sira-ne’e reprezenta sira-nia Xefe Estadu hodi hala’o missaun diplomátika Timor-Leste no presiza rekoñese servisu ne’ebé halo ona iha Timor-Leste.

“Embaixadór nia reprezenta nia Estadu, reprezenta Xefe Estadu. Ne’e duni ha’u uluk kedan nu’udar Ministru Negósiu Estranjeirus, Prezidente, ha’u nunka falta resessaun ruma ké embaixada ruma oferese, tanba ne’e hatudu amizade respeitu ba rai ne’e,” Xefe Estadu hateten.

Embaixadór Korea do súl iha Timor-Leste, Kim Jeong Ho, agradese ba Prezidente Repúblika, José Ramos-Horta, ne’ebé atribui ona medalla méritu no rekoñesimentu ba nia servisu durante tinan rua ho balun iha Timor-Leste.

“Ha’u agradese tebes ba na’i Prezidente-da-Repúblika ne’ebé mak mai na’in-rua hamutuk durante fulan 26 nia laran iha ne’e, ba di’ak tomak ne’ebé mak eselénsia halo ba ha’u. Mezmu ké tinan rua ha’u la halo buat barak, maibé, agradese tebes bele oferese medalla ida-ne’e ba ha’u, onra tebes ba ha’u, no ha’u dejeza nafatin prosperidade entre Timor-Leste no Korea ba futuru,” Kim Jeong Ho hateten.

Kim Jeong deklara, prontidaun governu Seul hodi apoia adezaun Timor-Leste nian ba ASEAN no apoiu iha área saida de’it mak Timor presiza.

Advertisement

Diplomata ne’e dehan, fízikamente nia husik hela Timor, maibé, nia nia fuan sei nafatin iha ba Timor-Leste, tan ne’e, prontu atu sai embaixadór boavontade Korea, atu promove Timor iha Korea, nune’e bele hametin liután lasu entre nasaun rua ne’e ba futuru.

Medalla méritu kria liu hosi Dekretu Lei Númeru 15/2009, hodi agradese militár, polísia no sivíl ne’ebé servi nasaun bá refosu ordem sosiál no asaun ne’ebé kontribui ba pás no estabilidade nasionál no mós simboliza gratidaun ba sidadaun ne’ebé dezempeña papél ativu, kruxiál iha dezenvolvimentu demokrásia iha Timor-Leste.

Jornalista: Vito Salvadór

Advertisement